Sefanaia 3:1-20
3 OI te fakaalofa ke he maga fakafualoto mo e kelea, ko e maga favale!
2 Nakai fanogonogo a ia ke he leo; nakai talia e ia e akonakiaga; nakai tua a ia kia Iehova, nakai fakatata atu a ia ke he hana Atua.
3 Ko e hana tau iki i loto ia ia ko e tau leona tagi a lautolu; ko e hana tau fakafili ko e tau luko ne totolo ke he afiafi a lautolu; nakai toka ai e lautolu ha mena ato a pogipogi.
4 Ko e hana tau perofeta ko e tau tagata mahani fakateaga a lautolu mo e mahani fakavai; ko e hana tau ekepoa kua holimafafo e lautolu e faituga, kua holi e lautolu e fakatufono.
5 Ko Iehova ha ha i loto ia ia kua tututonu haia, nakai eke e ia ha mahani hepehepe; ko e taha pogipogi mo e taha pogipogi kua fakamaama mai ai e ia hana tau fakafiliaga, nakai noa ni, ka ko e tagata mahani hepehepe nakai iloa e ia e ma.
6 Kua fakaoti e au e tau motu kehe; kua eke ha lautolu a tau kolo mo tau mena kua moumou; kua eke e au ha lautolu a tau puhala mo tau mena tiaki, kua nakai fina age ai taha; kua maona ha lautolu a tau maga nakai ha i ai ha tagata, ti nakai nofo ai taha.
7 Ne pehe atu au, Kia matakutaku mai a koe kia au kuenaia, kia talia a e koe e akonakiaga, ti nakai fakaoti ai e mena kua nofo ai a ia, ke lata mo e tau mena oti ne kotofa e au ke hoko kia ia; ka e uhu matike a lautolu, ti eke e lautolu kia kelea ai ha lautolu a tau mena oti ne eke.
8 Ko e mena ia kia tatali mai a mutolu kia au, kua pihia mai a Iehova, ke hoko atu ke he aho ke matike atu ai au ke he tau mena ne fofo he tau; ha ko e mena tonu kia au ke fakapotopoto ai e tau motu kehe, ke tutuuta ai e tau kautu, kia liligi atu e au ki luga ha lautolu haku a ita, ko e haku a ita lahi oti ni; ha ko e mena to fakaoti ai e lalolagi oti ni ke he afi he haku a ita tafuā.
9 Ha ko e vaha ia to liuaki atu e au ke he tau motu e vagahau mitaki, kia ui atu a lautolu oti ke he higoa a Iehova, mo e fekafekau a lautolu kia ia mo e loto fakalataha.
10 Ko e fahi atu he tau vailele a Aitiope to ta mai ai e poa kia au he tau tagata haku kua ole mai, ko e tamafifine ni he haku a tau tagata ne fakamavehevehe.
11 Ko e aho ia to nakai ma a koe ha ko e hau a tau mahani oti ne fakafualoto mai ai a koe kia au; ha ko e aho ia to uta kehe e au mai loto ia koe a lautolu ha ha ia koe kua hula mo e fakatokoluga; ti nakai fakatokoluga ai foki a koe ke he haku a mouga tapu.
12 Ka to toka e au i loto ia koe e tau tagata loto holoilalo mo e nonofogati, to tua foki a lautolu ke he higoa a Iehova.
13 Ko lautolu ne toe kia Isaraela nakai eke e lautolu e mahani hepehepe, ti nakai vagahau mo e pikopiko a lautolu; ti nakai moua ai ke he tau gutu ha lautolu e alelo fakavai; ka to kai a lautolu mo e tatakoto a lautolu, ti nakai ha i ai taha ke fakamatakutaku atu kia lautolu.
14 Ko e tama fifine a Siona na e, kia lologo a. Isaraela na e kia kalaga a; ko e tama fifine a Ierusalema na e kia fiafia a, mo e olioli ni mo e loto katoa.
15 Kua uta kehe e Iehova hau a fakahala, kua aau kehe e ia a lautolu ne fai fi kia koe; ko e Patuiki a Isaraela, ko Iehova, ha ha i ai a ia i loto ia koe, to nakai kitia foki e koe e malaia.
16 Ko e aho ia to pehe atu ai ki Ierusalema, Aua neke matakutaku a koe; Siona na e, aua neke tagatagatō ai hau a tau lima.
17 Ko Iehova hāu a Atua ha i o loto ia koe kua malolo a ia; to fakamoui ai e ia; to olioli a ia kia koe mo e fiafia; ko e hana fakaalofa nakai vagahau ai a ia; to olioli ni a ia kia koe mo e leo fiafia.
18 To fakapotopoto ai e au a lautolu kua mānu ha ko e tau galue ne kotofa, (ko e hau a tau tagata a lautolu,) kua pehia a lautolu he mena ke ma ai ha ko ia.
19 Kitiala, ko e vaha ia to fakamamahi ai e au kia lautolu oti kua favale kia koe; to fakamoui foki e au a ia kua koki fakateto, to fakapotopoto foki e au a ia ne vega kehe, to foaki age foki e au kia lautolu e fakahekeaga mo e higoa ke he tau motu oti ne fakama ai a lautolu.
20 Ko e vaha ia to ta mai ai e au a mutolu, ko e vaha ia foki to fakapotopoto ai e au a mutolu; to foaki atu ai ni e au kia mutolu e higoa mo e fakahekeaga ke he tau motu oti he lalolagi, ka liuaki ai e au ha mutolu a paeaaga, ko mutolu kua kitekite ki ai, kua pihia mai a Iehova.