Tagi Aue a Ieremia 4:1-22
4 OI te! kua pau tuai e auro, kua faliu e auro mitaki; kua liligi ai e tau maka tapu ke he tau matahala he tau puhala oti.
2 Ko e tau tama tane fakahele a Siona, kua tatai mo e auro mitaki, Oi te! kua fakalata a lautolu ke he tau lupo kelekele ne eke ai he tau lima he tagata eke kapiniu kelekele.
3 Kua tuku age he tau luko ha lautolu a tau huhu, kua fakahuhu e lautolu ha lautolu a tau punua; ka ko e tama fifine he haku motu kua favale a ia tuga ne tau iaena ke he tutakale.
4 Kua piki e alelo he tama kai huhu ke he hana aloalogutu he fia inu; kua ole mena kai he tau tama ikiiki, ka e nakai tufatufa age e taha ma lautolu.
5 Ko lautolu ne kai e tau mena mitaki ne mamate a lautolu ke he tau puhala; ko lautolu ne tauteute ai ke he tau ie kula kua tatakoto ai a lautolu ke he tau toloaga veve.
6 Kua mua he lahi e mahani kelea he tama fifine he haku a motu ke he hala a Sotoma ne fakaoti ai ke he magaaho ke kemo ai e mata, ti nakai hohoko ki ai e tau lima.
7 Ne mua he mea e tau naseri hana ke he kiona, ne mua e hina ha lautolu ke he puke huhu, ne mua e fulufuluola he tau tino ha lautolu ke he tau penina, ne mitaki a lautolu po ke tau safaira.
8 Kua mua e uli e tau tino ha lautolu ke he tau mena uli, nakai kitia a lautolu po ko hai he o fano a lautolu; kua pipiki ha lautolu a tau kili ke he tau hui motua ha lautolu, kua pakupaku ia tuga ne tau akau.
9 Kua mua e mitaki ha lautolu ne mamate ke he pelu kia lautolu ne mamate he hoge; ha ko lautolu ia, kua mole atu a lautolu, kua mamate he hoge he nakai fai mena kua tutupu mai he fonua.
10 Ne tunu he tau lima he tau fifine fakaalofa e fanau ni ha lautolu, ne eke mo mena kai ha lautolu ke he malaia he tama fifine he haku motu.
11 Kua fakaoti mai e Iehova hana ita, kua liligi ai e ia hana ita lahi; ne tafu e ia e afi i Siona, kua huhunu ai hana tau fakaveaga.
12 Ko e tau patuiki he lalolagi mo lautolu oti ne nonofo ke he atu motu, nakai manatu e lautolu kua maeke he huhu mai he tau gutuhala a Ierusalema a lautolu kua favale mai mo lautolu kua fai fi mai kia tautolu.
13 Ha ko e tau hala he hana tau perofeta mo e tau mahani kelea he hana tau ekepoa ne fakamaligi ai e toto he tau tagata nakai hala i loto ia ia;
14 Kua hehe fano a lautolu ke he tau puhala ko e tau matapouli a lautolu, ne kelea a lautolu he toto, nakai maeke ke he tau tagata ke piki atu ke he tau tapulu ha lautolu.
15 Kia o kehe a a mutolu kua nakai mea, ne tauhea atu ai e tau tagata kia lautolu, Kia o kehe, o kehe ā, aua neke piki mai; ka kua fehola a lautolu ti hehe fano a lautolu; ti pehe age e tau tagata he tau motu kehe, Nakai nonofo ai foki a lautolu.
16 Ko e fofoga a Iehova ne fakamavehevehe ai a lautolu, nakai tuai kitekite mai a ia kia lautolu; nakai fakalilifu atu a lautolu ke he tau ekepoa, nakai fakalofa atu a lautolu ke he tau patu.
17 Ka kua poko agaia e tau mata ha mautolu he kitekite a mautolu ke he ha mautolu a lagomatai nakai aoga; ne hagao atu a mautolu ke he ha mautolu a fale toko ke he motu kua nakai maeke ke laveaki mai.
18 Ne takahao a lautolu ke he ha mautolu a tau tuagahui, nakai maeke kia mautolu ke o ke he ha mautolu a tau puhala; kua tata mai ha mautolu a fakahikuaga, kua katoatoa ha mautolu a tau aho; ha kua hoko ha mautolu a fakahikuaga.
19 Ne mua he mafiti a lautolu ne tutuli a mautolu ke he tau aeto he pulagi; ne tutuli e lautolu a mautolu ke he atu mouga, ne lamalamati mai a lautolu kia mautolu ke he tutakale.
20 Ko e fafagu he tau pokoihu ha mautolu, ko ia ne fakauku e Iehova, ne moua a ia ke he tau luo ha lautolu, ko ia ne pehe age ai a mautolu, to nonofo a mautolu ke he hana fakamalumalu ke he tau motu.
21 Kia olioli a mo e fiafia a koe ko e tama fifine a Etoma na e, kua nofo ke he motu ko Usa; to hoko atu kia koe foki e kapiniu, to konahia ai a koe, mo e nakai fai felevehi ai.
22 Ko e tama fifine a Siona na e, kua oti tuai e fakahala he hau a tau mahani kelea, nakai fakapaea atu foki e ia a koe; ko e tama fifine a Etoma na e, to taui atu hau a tau mahani kelea, to fakakite au hau a tau hala.