Tanielu 10:1-21
10 KO e tau tolu a Kuresa ko e patuiki a Peresia ne fakakite mai ai e taha mena kia Tanielu, ne fakahigoa ko Peletisara; ko e moli e kupu, ko e tau lahi ni; ne iloa foki e ia e mena, mo e iloa e fakakiteaga.
2 Ko e vaha ia, ne mānu ai au ko Tanielu ke he tolu e vaha tapu katoa;
3 Nakai kai ai au ha mena mitaki, ti nakai hoko foki ke he gutu haku ha maga kakano he tau manu, po ke uaina, ti nakai tākai ai au ato mole atu tolu e vaha tapu katoa;
4 Ko e aho uafulu ma fa he mahina fakamua, ne ha i ai au ke he kauvai he vailele lahi, ko Hitekelu haia.
5 Ti haga hake au mo e kitekite au, ti kitiala, ko e taha tagata kua tapulu ai ke he ie lino mo, e pipi hana tokupu ke he auro mitaki mai Upasa.
6 Ko e hana tino foki kua tuga ne tasesa haia, mo e hana fofoga ne tino mai tuga ne uhila, mo e hana na fofoga foki kua tuga ne tau lamepa puhopuho haia, ko e hana tau lima foki mo e hana tau hui kua tuga ne apa kula ne fakakikila, ko e leo hana ka vagahau a ia kua tuga ne tomumu he motu o tagata tokologa.
7 Ka ko au ni hoko au ko Tanielu ne kitia e fakakiteaga; ha ko e tau tagata ne fakalataha mo mautolu nakai kitia e lautolu e fakakiteaga, ka e hoko kia lautolu e matakutaku lahi ni, ti fehola a lautolu mo e fakamumuli.
8 Kua toe tokotaha au, ti kitia ai e au e mena lahi na kua fakakite mai, ti nakai tuai toe ha malolo ia au; kua mole atu haku a fulufuluola, ti fakapula ni au, kua nakai tuai fia malolo au.
9 Ka e logona e au e leo hana ne vagahau mai; kua logona e au e leo hana ne vagahau mai, ti pulumohea ai au kua fakafohifo ai au, kua fakafohifo ni ke he kelekele.
10 Ti kitiala, ko e lima kua piki mai kia au, mo e fakatu e ia au ke he haku tau tuli hui mo e haku a tau aloalolima.
11 Ti pehe mai a ia kia au, Tanielu na e, ko e tagata kua ofania lahi, kia manamanatu a ke he tau kupu kua vagahau atu ai e au kia koe, mo e tu a ki luga; ha kua fakafano mai au ainei kia koe. Kua oti he vagahau mai a ia kia au e tau kupu na, ti tu ai au mo e vivivivi.
12 Ti pehe mai a ia kia au, Tanielu na e, aua neke matakutaku a koe; ha ko e mena tali mai he aho fakamua ne taute e koe e loto hau ke manamanatu mo e fakamamahi ai e koe a koe ki mua hau a Atua, ne fanogonogo ai au ke he tau kupu hau, kua hau foki au ha ko e tau kupu hau.
13 Ka ko e iki he kautu a Peresia ne totoko mai a ia kia au ke he tau po ne uafulu ma taha; ti kitiala, ko Mekaeli ko e taha he tau iki ne mua, ne haele mai a ia ke lagomatai mai kia au, ti toka ai au ke he mena ia fakalataha mo e tau patuiki a Peresia.
14 Hanai, kua hau au ke fakailoa atu kia koe e tau mena ke tutupu ke he motu hau ke he tau aho a mui; ha kua mule agaia ni e fakakiteaga;
15 Kua vagahau mai a ia kia au ke he tau kupu ia, ti haga hifo ai au ke he kelekele, kua nakai vagahau au.
16 Ti kitiala, ko e taha tuga ne tagata ne piki mai ke he tau laugutu haku; ti vagahau atu e au, kua pehe atu kia ia ne tu mai ki mua haku, Ko e iki na e, kua mamahi ni au ha ko e fakakiteaga, kua nakai ni toe ha malolo ia au.
17 Kua maeke fefe ke he fekafekau he haku iki nai ke vagahau mo e iki nai haku? ha ko au nakai ni fai malolo au, kua nakai toe foki ia au ha fafagu.
18 Ti piki mai foki kia au e taha kua tino mai po ke tagata, kua fakamalolo mai e ia kia au.
19 Kua pehe mai a ia, Ko koe, ko e tagata kua ofania, ua matakutaku a koe, kia monuina a koe, kia fakamalolo a, kia fakamalolo a a koe, Kua oti hana vagahau mai kia au, ti malolo ai au, mo e pehe atu au, Kia vagahau mai a haku a iki; ha kua fakamalolo mai e koe au.
20 Ti pehe mai a ia kia au, Kua iloa nakai e koe e mena ne hau ai au kia koe? hanai, ko e liu ne fai au ke tau mo e iki a Peresia; kitiala, ka fina atu au, to hau ai e iki a Iavana.
21 Ka to fakakite atu e au kia koe e mena kua tohi ke he Tohi kua fakamoli, ti nakai ha i ai taha ke lagomatai mai kia au ke he tau mena na ka ko Mekaeli ni ha mutolu a iki.