Tanielu 12:1-13
12 KO e vaha ia to tu ki luga a Mekaeli, ko e iki ne mua, ko ia ne tu ha ko e tau tagata he hau a motu; to hohoko mai foki e tau aho ke matematekelea ai; nakai kitia ha vaha pihia tali he fakatoka eke e tau motu ke hoko mai ke he vaha ia; ko e vaha foki ia to laveaki ai hau a tau tagata, ko lautolu oti kua tohi ke he tohi.
2 Ko e tokologa foki kau momohe ke he efuefu he kelekele to ala mai a lautolu, ko e falu ke he moui tukulagi ka ko e falu ke he ma mo e vihiatia tukulagi.
3 To lautolu foki ne iloilo to kikila mai a lautolu tuga ne kikila he lagi likoliko; ko lautolu foki kua fakamafoki mai e tau tagata tokologa ke mahani tututonu ai, to tuga ne tau fetu a lautolu tukulagi tukumuitea.
4 Ka ko koe Tanielu na e, kia puipui a e koe e tau kupu, mo e fakamau fakamailoga ai e koe e tohi, ato hoko ke he vaha ke fakahiku ai; to tafepoi tafeliuaki foki e tau tagata tokologa, to tupu lahi ai foki e mahani iloilo.
5 Ko au ko Tanielu, ne kitekite atu au, ti kitiala, ko e falu tokoua ne tutu mai, ko e taha ke he kauvai ke he fahi mai nai he vailele, ka ko e taha ke he kauvai he fahi atu he vailele.
6 Ti pehe age e taha ke he tagata ne tapulu ai ke he ie lino, ha ha i luga he vai he vailele, To hoko mai a fe e fakahikuaga he tau mena ia ke ofo ai?
7 Ti logona e au e tagata ne tapulu ai ke he ie lino, ha ha i luga he vai he vailele, kua nikiti e ia ki luga ke he lagi hana lima matau mo e hana lima hema, mo e omonuo ai e ia kia ia kua moui tukulagi, ke hohoko e tau mena ia, ke he tau, mo e tau tau, mo e maga ne veveheua aki e tau; ka oti he tuki malipilipi ai e ia e malolo he motu tapu, ti hohoko ai e tau mena oti ia.
8 Ne logona foki e au, ka e nakai ni maama kia au; ti pehe age au, Ko e Iki na e, ko e heigoa kia e fakahikuaga he tau mena ia?
9 Ti pehe mai a ia, Kia fano a koe, ma Tanielu na e, ha kua puipui mo e fakamau fakamailoga ai e tau kupu ato hoko ke he vaha ke fakahiku ai.
10 To fakamea ai e tokologa, mo e fakahina ai a lautolu, mo e kamatamata ai a lautolu; ka e mahani kelea e tau tagata mahani kelea to nakai maama ai foki taha ia lautolu ko e tau tagata mahani kelea; ka e maama ai ni e tau tagata iloilo.
11 Ke kamata mai he vaha kua uta kehe ai e poa huhunu mau, ke hoko atu ke he vaha ke tuku ai e mena vihiatia ke moumou aki, ko e katoa he tau aho ko e taha e afe, ti ua e teau ti hivagofulu e aho.
12 Uhoaki a ia kua tatali atu mo e hoko atu a ia ke he tau aho taha e afe mo e tolu e teau mo e tolugofulu ma lima e aho.
13 Ka ko koe kia fano a koe ato hoko ke he fakatulakiaga; ha ko e mena to okioki a koe, to tu mai foki a koe ke he tufaaga hau ka hoko ke he tau aho ke fakahiku ai.