Tanielu 2:1-49
2 KO e tau ua ne patuiki ai a Nepukanesa; ne miti ai a Nepukanesa e tau miti, ti fakaatukehe ai hana loto, ti mohealafia a ia.
2 Ti pehe age e patuiki ke ui ke he tau taulaatua, mo e tau tagata mana, mo e tau tagata ne eke e tau lagatau he tau taulaatua, katoa mo e tau tagata Kaletaia ke o mai, mo e fakailoa ai e lautolu ke he patuiki hana tau miti; ti o mai ai a lautolu mo e tutu ki mua he patuiki.
3 Ti pehe age e patuiki kia lautolu, Kua miti e au, ti fakaatukehe ai haku loto he fia iloa e au e miti.
4 Ti pehe age e tau tagata Kaletaia ke he patuiki ke he vagahau Arama, Ko e patuiki na e, kia moui tukulagi a koe. Kia tala mai e koe e miti ke he tau fekafekau hau, ti fakakite atu ai e mautolu e alito.
5 Ne tali age he patuiki ke he tau tagata Kaletaia, kua pehe age, Kua mole atu ia au e mena; kaeke ke nakai fakailoa mai e mutolu kia au e miti mo e hana alito, to helehele fakaikiiki ai a mutolu, to eke foki ha mutolu a tau fale mo toloaga veve.
6 Kaeke foki ke fakailoa mai e mutolu e miti mo e hana alito, to moua ai e mutolu ia au e tau mena fakaalofa, mo e taui, katoa mo e lilifu lahi; hanai kia fakailoa mai kia au e miti mo e hana alito.
7 Ne tali age foki a lautolu, kua pehe age, Kia tala mai la he patuiki e miti ke he hana tau fekafekau, ti fakailoa atu ai e mautolu hana alito.
8 Ti tali age e patuiki, kua pehe age, Ne iloa ni e au to fakamule a mutolu he kitia e mutolu kua mole atu ia au e mena.
9 Ka ko e mena kaeke ke nakai fakailoa mai e mutolu kia au e miti, ko e taha ni e fakatufono kia mutolu; ha kua taute e mutolu e tau kupu pikopiko mo e fakavai ke vagahau mai kia au, ato leva; hanai, kia talahau mai kia au e miti, ti iloa ai e au kua maeke kia mutolu ke fakailoa mai kia au hana alito.
10 Ti tali age he tau tagata Kaletaia ke he patuiki kua pehe age, Nakai fai tagata ke he lalolagi kua maeke ke fakailoa mai e mena he patuiki; ha ko e mena nakai fai patuiki, po ke iki, po ke pule kua huhu mai ha mena pehena ke he taulaatua, po ke tagata mana, po ke tagata Kaletaia.
11 Ko e mena foki kua huhu mai he patuiki, ko e mena uka ia; nakai ha i ai taha kua maeke ke fakailoa atu ai ke he patuiki, ka ko e tau atua ni, kua nakai haele ai a lautolu fakalataha mo e tau tagata.
12 Ko e mena ia ne ita mo e vale lahi ai e patuiki, ne pehe age foki a ia ke fakaoti ai e tau tagata iloilo oti i Papelonia.
13 Ti hoko atu ai e poaki ke kelipopo ai e tau tagata iloilo, ti kumi ai e lautolu a Tanielu mo e hana tau kapitiga ke kelipopo.
14 Ti tali age ai e Tanielu mo e pulotu mo e iloilo ke he takitaki he kau leoleo he patuiki ko Arioka, kua fina age ke kelipopo e tau tagata iloilo oti i Papelonia;
15 Kua vagahau a ia, kua pehe age kia Arioka, ne ha i ai e pule mai he patuiki, Ko e heigoa kia e mena ne fakatepetepe ai e poaki he patuiki? Ti fakailoa ai e Arioka kia Tanielu.
16 Ti hu atu a Tanielu mo e ole atu ai ke he patuiki, kia fakahautoka a ia, to fakailoa atu e ia e alito he miti ke he patuiki.
17 Ti fano a Tanielu ke he hana fale, mo e fakailoa atu ai e ia e mena ke he hana tau kapitiga, ko Hanania, mo Mesaelu, mo Asaria,
18 Kia olelalo atu a lautolu ke fakaalofa mai e Atua he lagi ha ko e mena galo na, ke aua neke fakaoti ai a Tanielu mo e hana tau kapitiga fakalataha mo e tau tagata iloilo oti i Papelonia.
19 Ti fakakite mai ai ke he fakakiteaga ke he po kia Tanielu e mena ne galo; ti fakaaue atu ai a Tanielu ke he Atua he lagi.
20 Kua vagahau atu e Tanielu, kua pehe atu, Kia fakaaue atu ke he higoa he Atua tukulagi tukumuitea; ha ko e hana ni e iloilo mo e mana.
21 Ko ia foki ne liliu ai e tau tau mo e tau vaha; kua uta kehe e ia e tau patuiki, kua kotofa foki e ia e tau patuiki; kua foaki mai e ia e iloilo kia lautolu kua iloilo, mo e maama kia lautolu kua iloa e manamanatu.
22 Ko ia kua fakakite mai e tau mena hokulo mo e tau mena galo; kua iloa e ia e tau mena ha ha he pouli, ko e maama foki kua nofo fakalataha mo ia.
23 Kua fakaaue atu au mo e fakaheke atu kia koe, ko e Atua he haku a tau matua, kua foaki mai kia au e iloilo mo e malolo; kua fakailoa mai nai foki e koe kia au e mena ne ole atu ai e mautolu kia koe; ha kua fakailoa mai e koe kia mautolu e mena he patuiki.
24 Ti hu atu ai a Tanielu kia Arioka, ne kotofa he patuiki ke kelipopo ai e tau tagata iloilo oti i Papelonia; kua fano a ia kia ia mo e pehe age kia ia, Aua neke fakaoti e koe e tau tagata iloilo i Papelonia; kia uta e koe au ki mua he patuiki, ti fakailoa ai e au e fakamatalaaga ke he patuiki.
25 Ti fakaave a Arioka mo e huhu atu ai a laua mo Tanielu ki mua he patuiki, ti pehe atu a ia kia ia, Kua moua e au e tagata he paeaaga he fanau a Iuta, ke fakailoa atu ai ke he patuiki e fakamatalaaga.
26 Ti vagahau ai e patuiki kia Tanielu ne fakahigoa ai ko Peletisara, kua pehe mai, Kua maeke kia kia koe ke fakailoa mai kia au e miti ne kitia e au, katoa mo e hana alito?
27 Ti tali atu a Tanielu ki mua he patuiki, kua pehe atu, Nakai maeke ke he tau tagata iloilo, mo e tau tagata mana, mo e tau taulaatua, mo lautolu ne iloilo he kitekite ke he tau fetu, ke fakakite atu ke he patuiki e mena he patuiki ne galo, ne poaki atu ai e ia.
28 Ka e ha i ai e Atua ke he lagi kua fakakite mai e tau mena galo, mo e fakailoa mai ke he patuiki ko Nepukanesa e tau mena ke hohoko mai ke he tau aho a mui. Ko e hau a miti mo e tau mena ne fioia ai e koe ke he hau a moheaga, hanai;
29 Ko koe, ko e patuiki na e, ne tutupu ai hau a tau manatu ki luga he moheaga hau ke he tau mena ke hohoko mai ke he tau aho a mui. Ko ia kua fakakite mai e tau mena galo kua fakailoa mai e ia kia koe e tau mena ko e hohoko mai ne fai.
30 Ko au foki, nakai fakakite mai kia au e mena galo nai ha kua ha ha ia au e iloilo kua mua ke he tau tagata momoui oti, ka ko e hanai kia fakailoa ai ke he patuiki e fakamatalaaga, mo e iloa ai e koe e tau manatu he hau a finagalo.
31 Ko koe, ko e patuiki na e, ne fioia e koe, kitiala, ko e taha tupua lahi; ko e tupua lahi na ne mitaki ue atu hana a fulufuluola, ne tu a ia ki mua hau, ko e hana a tino mai foki ko e mena ke matakutaku ai.
32 Ko e ulu he tupua na, ko e auro mitaki haia; ko e hana fatafata mo e hana tau lima ko e ario ia; ko e hana manava mo e hana tau tega ko e apa kula haia,
33 Ko e hana tau hui, ko e lapatoa haia, ko e hana tau tauuluhui ko e lapatoa taha maga, ka ko e kelekele taha maga.
34 Ne kitekite a koe ti talai ai e maka mai he kaumaka ka e nakai talai mai ai ke he tau lima, ne lauia ai e tupua ke he hana tau tauuluhui ne eke ai e lapatoa mo e kelekele, ti malŏlŏ ai e tau mena ia.
35 Ti malŏlŏ fakaikiiki fakalataha ai e lapatoa, mo e kelekele, mo e apakula, mo e ario, katoa mo e auro, kua tuga ne tau gati saito ke he tau mena taholi saito, ti havilia ai he matagi, ti nakai ni moua ha mena ke ha i ai a lautolu; ka ko e maka ne lauia ai e tupua ne eke a ia mo mouga lahi, kua puke ai e lalolagi oti.
36 Ko e miti hanā, ko e tala atu ne fai e mautolu hana alito ke he patuiki.
37 Ko e patuiki na e, ko koe ko e patuiki he tau patuiki; ha kua foaki mai he Atua he lagi kia koe e kautu, mo e malolo, mo e lilifu, mo e fakahekeaga;
38 Ko e tau mena oti foki kua nonofo ai e tau tagata, kua ta atu ai e ia kia koe e tau manu he vao, mo e tau manu lele he pulagi, kua tuku atu e ia e tau mena oti ia ke he pule hau; ko e ulu he auro ko koe ni haia.
39 Ka mole atu a koe to tu mai taha kautu kua nakai tatai a ia mo koe; mo e taha foki e kautu ke tolu aki, ko e apa kula haia, to pule foki a ia ke he lalolagi oti.
40 Ko e kautu foki ke fa aki to malolo a ia tuga ne lapatoa; ha kua malipilipi fakaikiiki mo e tuki malipilipi ai e tau mena oti ke he lapatoa, tuga ne malipilipi ai e tau mena oti ia ke he lapatoa, to malipilipi fakaikiiki pihia, mo e tuki malipilipi ai hau a kautu.
41 To vevehe ai foki e kautu, he fioia e koe e tau tauuluhui mo e tau matahui, ko e lapatoa falu a mena, ka ko e kelekele he tagata eke kapiniu kelekele falu a mena; ka e pete ni e tau mena ia to ha ha ia ia e malolo he lapatoa, he fioia e koe e lapatoa ne fiofio mo e kelekele he tagata eke kapiniu kelekele.
42 Ko e tau matahui foki ko e lapatoa falu a mena ka ko e kelekele falu a mena, to pihia ni e kautu, to malolo falu a mena ka e lolelole falu a mena.
43 Ne fioia e koe e lapatoa kua fiofio mo e kelekele he tagata eke kapiniu kelekele, to fakalataha pihia foki a lautolu mo e fanau he tau tagata, ka e nakai pipiki atu a lautolu ko e taha ke he taha, tuga he nakai fiofio foki e lapatoa mo e kelekele.
44 Ko e vaha he tau patuiki ia to fakatu ai he Atua he lagi e kautu nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia, ka ko ia to tumau tukulagi a ia;
45 Tuga he fioia e koe e maka ne talai mai he mouga, ka e nakai talai mai ai he tau lima, ti malipilipi fakaikiiki ai e lapatoa, ko e apa kula, ko e ario, katoa mo e auro. Ko e mena ia kua fakailoa mai ai he Atua ne mua ue atu ke he patuiki e tau mena ke hohoko mai a mui; kua moli ni e miti, to fakamoli foki hana fakamatalaaga.
46 Ti fakaveli fakafohifo ai e patuiki ko Nepukanesa, kua hufeilo a ia kia Tanielu, kua pehe age a ia ke ta age e lautolu kia ia e tau poa katoa mo e tau mena manogi.
47 To vagahau atu e patuiki kia Tanielu, kua pehe atu, Ko e moli, ko e Atua ha mutolu, ko e Atua he tau atua a ia, mo e Iki he tau patuiki, kua fakakite mai e ia e tau mena galo, heute he maeke kia koe ke fakakite mai e mena galo nai.
48 Ti ta age ai he patuiki e lilifu lahi kia Tanielu, kua foaki age foki e ia kia ia e tau mena fakaalofa loga, ko e tau mena mitaki lahi, ne kotofa foki e ia a ia ke pule ke he fahi kautu oti ko Papelonia, ke eke foki a ia mo pule ne mua he tau tagata pulotu oti i Papelonia.
49 Ne ole age e Tanielu ke he patuiki, ti kotofa a ia a Sataraka, ko Mesako, mo Apeteniko ke pule a lautolu ke he tau gahua he fahi kautu ko Papelonia; ka ko Tanielu, ne nofo ai a ia ke he gutuhala he patuiki.