Tanielu 3:1-30
3 NE eke he patuiki ko Nepukanesa e tupua auro, ne onogofulu e kupita hana tokoluga; ne ono e kupita hana laulahi; ne fakatu ai e ia ke he kelekele tatai a Turu, ke he fahi kautu ko Papelonia.
2 Ti fakafano atu he patuiki ko Nepukanesa ke fakapotopoto ai e tau iki, ko e tau pule, ko e tau alagavaka, ko e tau fakafili, ko e tau tagata leveki tupe, ko e tau tagata iloilo ke he tau fakatufono, ko e tau tagata ne fakamatala e tau fakatufono, katoa mo e tau pule oti he tau fahi kautu, ke o mai a lautolu ke fakatapu e tupua kua fakatu he patuiki ko Nepukanesa.
3 Ti fakapotopoto mai ai e tau iki, ko e tau pule, mo e tau alagavaka, ko e tau fakafili, ko e tau tagata leveki tupe, ko e tau tagata iloilo ke he tau fakatufono, ko e tagata ne fakamatala e tau fakatufono, katoa mo e tau pule oti he tau fahi kautu, ne o mai a lautolu ke he fakatapuaga he tupua ne fakatu he patuiki ko Nepukanesa, ti tutu ai a lautolu ki mua he tupua ne fakatu ai e Nepukanesa.
4 Ti ui age ai he tagata fakamatala kupu mo e leo lahi, Ko e kupu hanai kia mutolu ko e tau motu na e, mo e tau kautu, mo e tau vagahau kehekehe.
5 Ko e magaaho ka logona ai e mutolu e leo he pu, he kofe, he kitara, he sapeka, he saniteri, he sumefono, katoa mo e tau akau fakatagi kehekehe oti, kia fakaveveli ai a mutolu mo e hufeilo ke he tupua auro kua fakatu he patuiki ko Nepukanesa.
6 Ko e tagata foki kua nakai fakaveli ai mo e hufeilo, to liti a ia ke he magaaho ia ni ki loto he gutuumu ne puho ai e afi.
7 Hanai foki, kua hoko ke he magaaho ke logona ai he tau tagata oti e leo he pu, he kofe, he kitara, he sapeka, he saniteri, katoa mo e tau akau fakatagi kehekehe oti, ti fakaveveli ai e tau motu oti, mo e tau kautu, mo e tau vagahau kehekehe, ke hufeilo a lautolu ke he tupua auro ne fakatu he patuiki ko Nepukanesa.
8 Ti o age ai e tau tagata Kaletaia ke hokotaki age a lautolu ke he tau tagata Iuta.
9 Ne vagahau ai a lautolu ke he patuiki ko Nepukanesa kau pehe age, Ko e patuiki na e, kia moui tukulagi a koe.
10 Ko e patuiki na e ne eke e koe e fakatufono ke he tau tagata oti kia fakaveveli mo e hufeilo a lautolu ke he tupua auro ka logona ai e lautolu e tau leo he pu, he kofe, he kitara, he sapeka, he saniteri, he sumefono, katoa mo e tau akau fakatagi kehekehe oti ni.
11 Ko e tagata kua nakai fakaveli ai mo e hufeilo, to liti a ia ki loto he gutuumu ne puho ai e afi.
12 Ha ha i ai e tau tagata Iuta, ko lautolu ne kotofa e koe ke pule ke he tau mena he fahi kautu ko Papelonia, ko Sataraka, ko Mesako, mo Apetiniko; ko e patuiki na e, nakai fakalilifu atu he tau tagata na kia koe, nakai fekafekau a lautolu ke he tau atua hau, ti nakai fakaveveli fakafohifo ai a lautolu ke he tupua auro ne fakatu e koe.
13 Ti pehe age a Nepukanesa mo e ita mo e ita lahi kia ta mai la a Sataraka, mo Mesako, mo Apetiniko. Ti takitaki mai ai e lautolu e tau tagata na ki mua he patuiki.
14 Ti vagahau ai a Nepukanesa kua pehe age kia lautolu, Sataraka na e, Mesako na e, mo Apetiniko, ko e pauaki kia a mutolu kua nakai fekafekau ai a mutolu ke he tau atua haku, mo e nakai hufeilo ke he tupua auro ne fakatu e au?
15 Hanai kaeke kua tauteute a mutolu ka logona ai e mutolu e tau leo he pu, he kofe, he kitara, he sapeka, he saniteri, he sumefono. katoa mo e tau akau fakatagi kehekehe oti, ke fakaveveli mo e hufeilo a mutolu ke he tupua ne eke e au, mitaki, kaeke foki ke nakai hufeilo ai a mutolu, to liti ai a mutolu ke he magaaho ai ni ki loto he gutuumu ne puho ai e afi; ko hai foki e atua ke laveaki mai a mutolu he pule haku?
16 Ne tali age a Sataraka, mo Mesako, mo Apetiniko ke he patuiki kua pehe age, Nepukanesa na e, nakai aoga ke tali atu a mautolu kia koe ke he mena na;
17 Kaeke ke pihia, kua maeke ni ke he Atua ha mautolu, kua fekafekau ki ai a mautolu ke laveaki a mautolu mai he gutuumu ne puho ai e afi, to laveaki mai ni e ia a mautolu he pule hau, ko e patuiki na e.
18 Ha ko e mena, ka nakai pihia, kia iloa e koe ko e patuiki na e, nakai fekafekau a mautolu ke he tau atua hau, ko e tupua auro foki kua fakatu e koe nakai ni hufeilo ki ai a mautolu.
19 Ti puke ai a Nepukanesa he ita lahi, kua kehe tuai hana fofoga kia Sataraka, mo Mesako, mo Apetiniko; kua vagahau ai a ia, kua pehe age, kia tafu fakalahi e lautolu e gutuumu ke lagafitu ke mua hana kakā ke he kakā ne fa fakakakā ai he tau aho.
20 Ti pehe age a ia ke he tau tagata ne mua he malolo ke he kau hana, ke lili e lautolu a Sataraka, mo Mesako, mo Apeteniko, kia liti a lautolu ke he gutuumu ne puho ai e afi.
21 Ti lili ai e tau tagata ia mo e tau fihui ha lautolu, mo e tapulu tino ha lautolu, mo e ha lautolu a tau tapulu leleva, katoa mo e ha lautolu a tau tapulu, mo e liti a lautolu ki loto he gutuumu ne puho ai e afi.
22 Ne fakatepetepe e poaki he patuiki, mo e kakā lahi ni e gutuumu, ko e mena ia ne kelipopo ai he afi puhopuho e tau tagata na ne lapolapo hake ai a Sataraka, mo Mesako mo Apeteniko.
23 Ka ko e tau tagata toko tolu nai, ko Sataraka, ko Mesako, mo Apeteniko, ne to hifo a lautolu kua lili ki loto he gutuumu ne puho ai e afi.
24 Ti ofomate ai e patuiki ko Nepukanesa, ti matike fakaave a ia, kua vagahau ai a ia, kua pehe age ke he hana tau tui, Nakai kia liti e tautolu toko tolu e tagata kua lili ki loto he afi? Ti tali age a lautolu ke he patuiki kua pehe age, Ko e patuiki na e, kua pihia ni.
25 Ti tali age a ia, kua pehe age, Kitiala, kua kitia e au toko fa e tagata, kua toko noa, kua evaeva ai a lautolu i loto he afi, kua nakai ni fai mamahi a lautolu; kua tono mai foki a ia ne fa aki tuga ne tama he tau atua.
26 Ti fakatata age a Nepukanesa ke he gutu he gutuumu ne puho ai e afi, ti vagahau ai e ia kua pehe age, Sataraka na e, Mesako, mo Apeteniko, ko e tau fekafekau he Atua ne mua ua atu, o mai a, kia o mai a a mutolu. Ti o age ai a Sataraka, mo Mesako, mo Apeteniko mai loto he afi.
27 Ti fakapotopoto ai e tau iki, ko e tau pule, ko e tau pule he tau fahi motu, katoa mo e tau tui he patuiki, kua kitekite a lautolu ke he tau tagata na kua nakai maeke ke he afi ke huhunu e tau tino ha lautolu, nakai vela foki ha lautolu a tau lau ulu, nakai kehe foki e tau fihui ha lautolu, ti nakai ni namu afi a lautolu.
28 Kua vagahau ai a Nepukanesa, kua pehe age, Kia fakaaue atu ai ke he Atua a Sataraka, Mesako, mo Apeteniko, kua fakafano mai hana agelu, kua laveaki mai ai e ia hana tau fekafekau ne tau kia ia, kua liliu kehe foki e kupu he patuiki mo e tuku atu e lautolu ko e tau tino ha lautolu ke aua neke fekafekau a lautolu mo e hufeilo ke he taha atua, ka ko e Atua ha lautolu hokoia.
29 Ko e mena ia kua eke ai e au e fakatufono hanai, Ko e motu, po ke kautu, po ke vagahau kehe kua fai kupu teao ke he Atua a Sataraka, Mesako, mo Apeteniko, to helehele fakaikiiki a lautolu, to eke foki e tau fale ha lautolu mo toloaga veve, ha kua nakai fai atua foki kua maeke ke laveaki pehenā.
30 Ti fakalilifu ai he patuiki a Sataraka, Mesako, mo Apeteniko ke he fahi kautu ko Papelonia.