Tanielu 4:1-37
4 KO au ko e patuiki ko Nepukanesa, ko e haku a kupu hanai ke he tau motu oti, mo e tau kautu, mo e tau vagahau kehekehe kua nonofo ke he lalolagi oti, kia tupu lahi ai ha mutolu a monuina.
2 Ne manatu e au kua lata ke fakakite atu e au e tau fakamailoga mo e tau mena ne eke he Atua ne mua ue atu kia au.
3 Kua lahi mahaki hana tau fakamailoga! ko e hana tau mana ko e tau mana malolo haia! ko e hana kautu ko e kautu tukulagi haia! ko e hana pule ke hahau mo hahau ia.
4 Ko au ko Nepukanesa ne nofo fakatekiteki au ke he fale haku, ne monuina foki au ke he haku a fale iki.
5 Ne miti au ti matakutaku ai au, ko e tau manatu haku foki ke he haku a moheaga katoa mo e tau mena ne kitia e au ne fakaatukehe ai au.
6 Ko e mena ia ne pule au ke ta mai ai e tau tagata iloilo oti i Papelonia ki mua haku, kia fakailoa mai e lautolu kia au e kakano he miti.
7 Ti o mai ai e tau taulaatua, mo e tau tagata mana, mo e tau tagata Kaletaia, katoa mo e tau tagata iloilo ke he tau fetu, ti tala age e au e miti kia lautolu, ka e nakai fakailoa mai e lautolu hana kakano.
8 Ka e fakamui ne hau ai ki mua haku a Tanielu, ko e hana higoa ko Peletisara, ne fakalata ke he higoa he haku atua, ha ha ia ia foki e agaga he tau atua tapu, ti tala age e au kia ia haku a miti, kua pehe age,
9 Peletisara na e, ko e patu he tau taulaatua, ha kua iloa e au ha ha ia koe e agaga he tau atua tapu, kua nakai fai mena galo kua uka kia koe; kia talahau mai la kia au e tau fakakiteaga ne kitia e au ke he haku a miti, katoa mo e hana kakano.
10 Ko e tau fakakiteaga ne kitia e au ke he haku a mohega; kitiala, ne kitia e au e akau i loto he lalolagi, kua lahi ni hana a tokoluga.
11 Ne tupu e akau mo e malolo a ia, ko e hana tokoluga foki kua hoko ke he lagi, kua kitia a ia mai he motuaga he lalolagi oti.
12 Ne fulufuluola hana tau lau, ti loga foki hana tau fua, ha ha i ai foki e tau mena kai ma e tau mena oti; ne fakamalu ai i lalo hana e tau manu he vao; ne momohe ai e tau manu lele ke he hana tau la, ti kai ai ni he tau mena momoui oti kana.
13 Ne kitia e au ke he tau fakakiteaga ke he moheaga haku, kitiala, ko e leoleo ko e taha kua tapu ne hifo mai a ia he lagi.
14 Ne ui a ia mo e leo lahi, kua pehe age, Kia hio a ki lalo e akau, mo e hahala hana tau la; kia lulululu kehe hana tau lau, mo e fakamavehevehe hana tau fua; kia fehola e tau manu mai lalo hana, mo e tau manu lele mai hana tau la.
15 Ka ko e tagutugutu he hana tau vaka, kia toka ai a ia ke he kelekele, kia mau ai ke he pipi lapatoa mo e apa kula ke he motie he vao; kia pala ai ke he hahau mai he lagi, kia eke foki hana tufaaga fakalataha mo e tau manu ke he motie he kelekele;
16 Kia maliu hana loto tagata, mo e tuku atu kia ia e loto he manu, ato mole atu fitu e tau hana.
17 Ko e mena na ko e pule he tau leoleo haia, ko e kupu ha lautolu ne tapu kua poaki ai e mena na; kia iloa ai he tau tagata momoui kua pule a ia ne Mua ue atu ke he kautu he tau tagata, kua tuku atu ai e ia kia lautolu kua finagalo ki ai a ia, kua kotofa foki e ia e tau tagata fakateaga ke pule ki ai.
18 Ko e miti hanā ne kitia e au ko au ko Nepukanesa ko e patuiki; ko koe foki Peletisara na e, kia talahau mai la e koe hana kakano, ha kua nakai maeke ke he tau tagata iloilo oti he kautu haku ke fakailoa mai kia au e kakano; ka e maeke ni kia koe; ha ko e mena ha ha ia koe e agaga he tau atua tapu.
19 Ti ofomate ai a Tanielu ne fakahigoa ai ko Peletisara, tokai ko e taha e magalā katoa, ne fakaatukehe foki a ia ha ko e hana tau manatu. Ti vagahau ai e patuiki kua pehe age, Peletisara na e, aua neke fakaatukehe a koe ha ko e miti po ke hana kakano. Ti tali age a Peletisara kua pehe age, Haku iki na e, kia ha i ai e miti kia lautolu kua fakavihia a koe; kia ha i ai kia lautolu kua fai fi kia koe hana kakano.
20 Ko e akau ne fioia e koe ne tupu lahi mo e malolo, ko e hana tokoluga ne hoko ke he lagi, ne kitia mai he lalolagi oti;
21 Kua fulufuluola hana tau lau, ti loga foki hana tau fua, ha ha i ai foki e tau mena kai ma e tau mena oti; kua nonofo i lalo hana e tau manu he vao, kua momohe ai foki e tau manu lele he he hana tau la,
22 Ko e patuiki na, ko koe ni haia; kua tupu lahi mo e malolo a koe, ha kua lahi e lilifu hau kua hoko ke he lagi, ko e pule hau foki kua hoko ke he motuaga he lalolagi.
23 Ne fioia he patuiki e leoleo, ko e taha kua tapu, ne hifo mai he lagi a ia, kua pehe age, Kia hio a ki lalo e akau mo e moumou ai, ka ko e tagutugutu he hana tau vaka kia toka ai a ia ke he kelekele, kia mau ai ke he pipi lapatoa mo e apa kula ke he motie he vao; kia pala ai foki ke he hahau mai he lagi, kia eke foki hana tufaaga fakalataha mo e tau manu he vao ato mole atu fitu e tau hana.
24 Ko e patuiki na e, ko e hana kakano hanai, ko e pule hanai hana ne Mua ue atu kua hoko atu ke he iki haku ko e patuiki;
25 To vega a koe mai he tau tagata, ka e nonofo a koe fakalataha mo e tau manu he vao, ti taumafa ai a koe he motie tuga ne tau povi, ti haumia a koe he hahau mai he lagi, ke mole atu fitu e tau hau, ato iloa ai e koe kua pule a ia ne Mua ue atu ke he kautu he tau tagata, ti tuku atu ai e ia kia lautolu kua finagalo a ia ki ai.
26 Ne poaki mai foki e lautolu ke toka ai e tagutugutu he tau vaka akau; to tumau ai e kautu hau ke eke ai e koe, ka iloa ai e koe kua pule a ia, Kua haele ke he lagi.
27 Hanai ko e patuiki na e, kia mitaki kia koe haku a tau kupu nai, kia tiaki e koe e tau hala hau, ka e eke e mahani tututonu, kia tiaki a hau a tau mahani kelea, ka e fakaalofa a koe ke he tau tagata matematekelea, po ke maeke nakai ke fakaleva atu hau a monuina.
28 Ne hohoko e tau mena oti ia ke he patuiki ko Nepukanesa.
29 Kua mole atu hogofulu ma ua e mahina kua faifano a ia ki luga he fale he patuiki he kautu a Papelonia.
30 Ti vagahau ai e patuiki, kua pehe age, Nakai kia ko Papelonia lahi hanai, ne eke ai e au ke he haku a malolo lahi ni, ke eke mo fale he kautu, kia fakaheke ai foki haku a lilifu?
31 Ha ne vagahau ai e patuiki, ti vagahau hifo ai e leo mai he lagi, kua pehe mai, Ko e patuiki na e, ma Nepukanesa, ko e kupu kia koe hanai, kua uta kehe ia koe hau a kautu.
32 To vega kehe a koe mo e tau tagata, ke nofo a koe fakalataha mo e tau manu he vao; to kai motie a koe tuga ne tau povi, to mole atu ai fitu e tau hāu, ato iloa e koe kua pule a ia ne Mua ue atu ke he kautu he tau tagata, ti tuku atu ai foki e ia kia lautolu kua finagalo ki ai a ia.
33 Ko e magaaho ia ni ne fakamoli ai e kupu ia kia Nepukanesa; ti vega ai a ia he tau tagata, ti kai motie foki a ia tuga e tau povi, ti haumia hana tino he hahau mai he lagi, ato tutupu ai hana tau lauulu tuga ne tau fulu aeto, mo e hana tau mahina mata lima tuga ne tau mahina hui he tau manu lele.
34 Kua oti e tau aho ia, ti haga hake ai au haku tau mata ke he lagi, ko au ko Nepukanesa, ti liu lotomatala ai au; ti fakaaue atu ai au kia ia ne Mua ue atu, kua fakaheke atu foki e au mo e fakalilifu atu kia ia kua moui tukulagi, ko e hana pule ko e pule tukulagi haia, ko e hana kautu foki ke hahau mo hahau ia.
35 Ko lautolu oti kua nonofo ke he lalolagi, kua tuga he nakai ha i ai a lautolu; kua eke foki e ia ke lata mo e hana finagalo ke he tau kau he lagi, katoa mo lautolu kua nonofo ke he lalolagi, ti nakai ha i ai taha ke taofi hana lima, po ke pehe age kia ia, Ko e heigoa kia e mena kua eke e koe?
36 Ko e vaha ia ne liu lotomatala ai au; ne liu mai foki kia au haku a lilifu, mo e haku a fulufuluola ke lilifu ai haku a kautu; ko e haku a tau pule foki, mo e tau iki ha ha ia au, kua kumi mai a lautolu kia au, ne fakamau ai foki kia au haku a kautu, mo e lafilafi mai kia au e lilifu lahi.
37 Hanai, ko au ko Nepukanesa, kua fakamonu atu e au, mo e fakaaue, mo e fakaheke atu ke he Patuiki he lagi, kua fakamoli e ia hana tau gahua oti, mo e tonu hana tau puhala, kua maeke foki kia ia ke fakatokolalo ai a lautolu kua o fano mo e mahani fakatokoluga.