Tanielu 5:1-31
5 NE eke he patuiki ko Pelesara e galue lahi ma e tau iki taha e afe ha ha ia ia, ti inu uaina ai a ia ki mua he tokoafe ia.
2 Ne pehe age a Pelesara, he inu ai a ia e uaina, ke ta age e tau kapiniu auro mo e tau kapiniu ario ne ta mai he matua hana ko Nepukanesa he faituga i Ierusalema, ke inu ai e patuiki, mo e tau iki ha ha ia ia, mo e hana tau hoana, katoa mo e hana tau hoana fakahoa.
3 Ti ta age e lautolu kia ia e tau kapiniu auro ne ta mai ai he faituga he fale he Atua i Ierusalema, ti inu ai e patuiki mo e tau iki ha ha ia ia, mo e hana tau hoana, katoa mo e hana tau hoana fakahoa.
4 Ne inu uaina a lautolu, mo e fakaheke atu ke he tau atua auro, mo e ario, ko e apa kula, ko e lapatoa, ko e akau, mo e maka.
5 Ko e magaaho ia ne hoko mai ai e tau matalima he tagata, mo e tohi ai ke he puga he kaufale ne fehagai mo e tokaaga lamepa ke he fale he patuiki; ne kitia foki he patuiki e lima ne tohi.
6 Ti faliu ai e fofoga he patuiki, ne fakaatukehe ai a ia ha ko e hana tau manatu, ne tagatagatō foki e tau tutakiaga he hana patutua, ko e hana tau tulihui foki ne fepakaki ko e taha ke he taha.
7 Ne ui e patuiki mo e leo lahi, kia ta mai e tau tagata mana, mo e tau tagata Kaletaia, katoa mo e tau tagata kua iloilo ke he tau fetu; ti vagahau ai e patuiki, kua pehe age ke he tau tagata iloilo i Papelonia, Ko e tagata kua totou e mena na kua tohi mo e fakailoa mai kia au hana alito, to fakatapulu e au a ia ke he tapulu kula uhi, ti kahoa ai a ia ke he kahoa filifili auro, to pule foki a ia ko e tokoua maka ke mua kia ia ke he kautu.
8 Ti o age ai e tau tagata iloilo oti he patuiki, ka e nakai maeke kia lautolu ke totou e mena ne tohi mo e fakailoa ai ke he patuiki hana kakano.
9 Ti fakaatukehe lahi ai e patuiki ko Pelesara, ne faliu ai hana fofoga, ne fakahahaku foki e tau iki ha ha ia ia.
10 Ti hu atu ai e patuiki fifine ke he fale ne eke ai e galue, ha ko e tau kupu he patuiki mo e tau iki ha ha ia ia; ne vagahau ai e patuiki fifine kua pehe age, Ko e patuiki na e, kia moui tukulagi a koe, aua neke fakaatukehe a koe ha ko e hau a tau manatu, aua neke faliu foki hau a fofoga.
11 Kua fai tagata ke he kautu hau ha ha ia ia e agaga he tau atua tapu, ne kitia foki ia ia ke he vaha he matua hau e maama, mo e loto matala, mo e iloilo ke lata mo e iloilo he tau atua; ne kotofa a ia he matua hau ko e patuiki ko Nepukanesa, ko e matua hau ni ko e patuiki ne eke a ia mo takitaki he tau taulaatua; mo e tau tagata mana, mo e tau tagata Kaletaia, mo e tau tagata iloilo ke he tau fetu.
12 Ha kua kitia kia Tanielu na, ne fakahigoa ai he patuiki ko Peletisara, ko e pulotu lahi, mo e iloilo, mo e lotomatala, ke fakamatala ai e ia e tau miti, ke talahau ai e tau kupu galo, ke fakamatala ai e tau mena uka; hanai kia ui ai a Tanielu to fakailoa mai e ia e kakano.
13 Ti ta mai ai a Tanielu ki mua he patuiki; ti vagahau ai e patuiki, kua pehe age kia Tanielu, Ko Tanielu kia a koe mai he paeaaga he tau tagata Iuta ne ta mai he patuiki ko e matua haku i Iuta?
14 Kua logona e au e tala kia koe ha ha ia koe e agaga he tau atua, ha ha ia koe foki e maama, mo e lotomatala, mo e iloilo ne mua ue atu.
15 Kua ta mai tuai ki mua haku e tau tagata iloilo, ko e tau tagata mana kia totou ai e lautolu e tau mena na kua tohi, mo e fakailoa mai kia au hana kakano; ka e nakai maeke kia lautolu ke fakailoa mai e kakano he tau kupu.
16 Ka kua logona e au e tala kia koe ke fakamatala e kakano he tau mena, mo e talahau ai e tau mena galo; hanai kaeke kua maeke kia koe ke totou mai e mena ne tohi, mo e fakamatala mai kia au hana kakano, to tapulu ai a koe ke he tapulu kula uhi to kahoa ai foki a koe ke he filifili auro, to pule foki a koe, ko e tokoua maka ke mua kia koe ke he kautu.
17 Ti tali age ai a Tanielu ki mua he patuiki, kua pehe age, Kia toka ai kia koe hau a tau mena fakaalofa, ti ta age e koe ke he taha hau a taui; ka ko e mena ne tohi to totou atu ai e au ke he patuiki mo e fakailoa atu e au kia ia e kakano.
18 Ko koe na ko e patuiki na e, ne foaki he Atua ne mua ue atu ke he matua hau ko Nepukanesa e kautu, mo e pule, mo e lilifu, mo e fakahekeaga;
19 Ko e pule foki ne foaki atu kia ia, ne vivivivi mo e matakutaku ai ki mua hana e tau motu, mo e tau kautu, mo e tau vagahau kehekene; ne kelipopo e ia a ia ne finagalo a ia ke keli, ne fakamoui e ia a ia ne finagalo a ia ke fakamoui, ne ta hake e ia a ia ki luga ne finagalo a ia ke ta hake, ne fakatokolalo foki e ia a ia ne finagalo ai a ia ke fakatokolalo.
20 Ka e hoko ke he aho kua fakatokoluga ai hana loto, mo e fakamao e ia hana loto kua fakatokoluga ai a ia, ti palu hifo ai a ia he hana nofoaiki, ne uta kehe foki ia ia hana lilifu.
21 Ne vega kehe foki a ia mo e tau tagata, ti maliu hana loto ke tuga ne loto he manu, ti nofo foki a ia fakalataha mo e tau asini he vao; ti taumafa ai a ia e motie tuga ne tau povi, ne haumia foki hana tino ke he hahau mai he lagi, ato iloa e ia kua pule e Atua ne mua ue atu ke he kautu he tau tagata, ti kotofa e ia e tagata ke pule ai ne finagalo ki ai a ia.
22 Ko koe foki ko e tama hana, Pelesara na e, pete he iloa e koe e tau mena oti ia, nakai fakatokolalo ai e finagalo hau,
23 Ka kua fakatokoluga a koe ke he Iki he lagi; kua ta mai foki ki mua hau e tau kapiniu he fale hana, kua inu uaina ai a koe, mo e tau iki ha ha ia koe, ko e faoa fifine hau mo e hau a tau hoana fakahoa; kua fakaheke atu foki a koe ke he tau atua ario, mo e auro, mo e apakula, mo e lapatoa, mo e akau, mo e maka, nakai kitekite a lautolu, nakai logona, nakai iloa ha mena; ka ko e Atua ha ha he lima hana hāu a fafagu, ha ha ia ia foki hau a tau puhala oti, kua nakai fakaheke a koe ki ai.
24 Ti fakafano mai e ia i mua hana e lima; ti tohi ai e tohi na.
25 Ko e tohi kua tohi hanai, Mene, Mene, Tikele, Uperesi.
26 Ko e kakano he kupu hanai, Mene, Kua totou he Atua e kautu hau kua fakahiku ai e ia.
27 Tikele, Kua fafati a koe ke he fua tautau, ti kitia kua māmā a koe.
28 Peresi, Kua vevehe hau a kautu kua foaki age ki Metai mo Peresia.
29 Ti pehe age a Pelesara, Kia fakatapulu e lautolu a Tanielu ke he tapulu kula uhi, mo e kahoa ai a ia ke he filifili auro, mo e fakamatala ai e lautolu ke pule a ia ko e tokoua maka ke mua kia ia ke he kautu.
30 Ko e po ia ni ne kelipopo ai e patuiki a Kaletaia ko Pelesara.
31 Ne moua ai e Tariu ko e tagata Metai e kautu ke he tau onogofulu ma ua hana.