Tanielu 7:1-28
7 KO e tau fakamua a Pelesara ko e patuiki a Papelonia, ne miti a Tanielu mo e kitia ai e ia e tau fakakiteaga ke he mohega hana, ti tohi ai e ia e miti mo e talahau ai e ia e tau mena oti.
2 Ne talahau ai e Tanielu kua pehe age, Ne kitia ai e au ke he tau mena ne fakakite mai he po, ti kitiala, ko e tau matagi ne fa he lagi ne to lahi mai ke he tahi lahi.
3 Ti hake ai mai he tahi fa e manu favale lalahi ne kehekehe ko e taha ke he taha.
4 Ko e manu fakamua, ne tuga e leona a ia, ne fai tapakau foki po ke tau tapakau he aeto, ne kitekite au ato futifuti hana tau tapakau, ne lagaaki foki a ia mai he kelekele, ti fakatu ai a ia ke he hana tau hui po ke tagata, mo e foaki age kia ia e loto he tagata.
5 Kitiala, ko e taha manu favale foki, ko e manu ne ua aki haia, ne tuga e urosa, kua matike ai a ia ke he taha fahi, ha he gutu hana tolu e hui kahokaho ne kakati ai ke he hana tau nifo, ti vagahau a lautolu kia ia, kua pehe age, Matike ā, kia kai ai e koe e tau tino loga.
6 Kua mole atu e tau mena ia, ne kitekite atu au, ti kitiala, ko e taha tuga e nameri, ha he tau hana foki fa e tapakau he manu lele; ha ha i ai foki ke he manu favale fa e ulu; ne ta age foki e pule kia ia.
7 Kua mole atu e tau mena ia ti kitia e au ke he tau fakakiteaga he po, kitiala, ko e manu favale ne fa aki, ne matakutakuina mo e mao, mo e malolo lahi ni; ne fai nifo lapatoa lalahi a ia, ne kai ai a ia mo e gutimoehui ai, ka ko e tau mena ne toe ne taholi ai e ia ke he hana tau hui. Ne kehe foki a ia mo e tau manu favale oti ne mumua kia ia, ha ha i ai foki hogofulu e hoe ke he ulu hana.
8 Ne manamanatu ai au ke he tau hoe, ti kitiala, ko e taha hoe tote ne tupu hake ke he vaha he tau hoe ia, ti ta aki ai ki mua hana tolu e hoe ne tutu ai fakamua; ti kitiala, ha ha he hoe na e tau mata tuga ne tau mata he tagata, katoa mo e gutu ne vagahau fakahakehake.
9 Ne kitekite au ato tuku mai e tau nofoaiki, ne nofo ai foki A ia mai i tuai hana tau aho, kua hina hana tapulu tuga ne kiona, mo e hana tau lauulu kua tuga ne tau fulu mamoe mitaki; ko e hana nofoaiki ko e afi puhopuho haia, mo e hana tau veli ko e afi huhunu mena haia.
10 Ne tafe mai e afi ne fina atu ai i mua hana, ko e afe ni e afe ne fekafekau kia ia, ti hogofulu e afe kua taki hogofulu e afe ne tutu ki mua hana; ne eke ai e fakafiliaga, mo e fofola ai e tau tohi.
11 Ti kitekite ai au ha ko e tau kupu fakatokoluga ne vagahau mai he hoe, ne kitekite au ato kelipopo e manu favale, ne fakaoti foki hana tino, mo e liti a ia ke he afi puhopuho.
12 Ka ko e tau manu favale ne toe, kua uta kehe ha lautolu a pule; ka kua fakaloa ai ha lautolu a moui kua hoko ke he taha vaha mo e taha tau.
13 Ne kitia e au ke he tau fakakiteaga he po, ti kitiala, ne haele mai mo e tau aolagi Taha kua tuga e Tama he tagata, ne hoko foki a ia kia Ia ne mai i tuai hana tau aho, ti ta mai ai e lautolu a ia ki mua hana.
14 Ti foaki age kia ia e pule, mo e fakahekeaga, mo e kautu, kia fekafekau kia ia e tau motu oti, mo e tau kautu, mo e tau vagahau kehekehe; ko e hana pule ko e pule tukulagi haia, nakai mole atu ia, ko e hana kautu foki nakai fakaoti ia.
15 Ko au ko Tanielu ne mamahi ai haku loto i loto ia au, ko e tau fakakiteaga ne kitia ai e au ne fakaatukehe ai au.
16 Ne hoko atu au ke he taha ia lautolu ne tutu ai, mo e huhu atu e au kia ia e kakano he tau mena oti ia. Ti tala mai a ia kia au, ne fakailoa mai foki kia au e kakano he tau mena oti ia.
17 Ko e tau manu lalahi ne fa a lautolu, ko e tau patuiki ia ne toko fa, ko lautolu ia ke tutu mai he lalolagi.
18 Ka to moua e kautu e lautolu ne tapu kia ia ne Mua ue atu, to eke foki ma lautolu e kautu tukulagi, ke tukulagi tukumuitea.
19 Ti fia iloa e au e kakano he manu favale ne fa aki, ne kehe a ia mo e tau manu oti; ne matakutakuina lahi ni, ko e tau nifo hana ko e lapatoa ia, ko e hana tau mahina hui ko e apa kula haia, ne kai a ia, ne gutimoehui ai, ti taholi ai ke he hana tau hui e tau mena ne toe.
20 Ne fia iloa foki e au e kakano he tau hoe hogofulu ha ha he ulu hana, katoa mo e taha ne tupu hake, ne to hifo ai tolu e hoe ki mua hana; ko e hoe foki ia ne ha i ai e tau mata, mo e gutu ne vagahau ai ke he tau kupu fakatokoluga, ko e hana tino mai foki ne mua he lahi ke he tau manu favale oti ia.
21 Ne kitekite atu au ti tau e hoe na mo e tau tagata tapu, mo e kautu a ia kia lautolu;
22 Ato haele mai a ia Ne mai i tuai hana tau aho, mo e tuku atu e ia e fakafiliaga ke he tau tagata tapu hana ne Mua ue atu; kua hoko mai foki e vaha kua moua mai he tau tagata tapu e kautu.
23 Ne talahau mai a ia kua pehe mai, Ko e manu favale ne fa aki, to eke ia mo kautu ne fa aki ke he lalolagi, to kehe a ia mo e tau kautu oti, to kai foki e ia e lalolagi oti, mo e taholi ai mo e gutimoehui ai.
24 Ko e hana tau hoe foki ne hogofulu, mai he kautu ia to tutu mai e tau patuiki tokohogofulu, ka mole atu foki a lautolu to tu mai taha, to kehe a ia mo lautolu ne mumua atu, to fakatokolalo ai e ia e tau patuiki ne tokotolu.
25 To fai kupu a ia kia ia ne Mua ue atu, mo e fakaoti e ia e tau tagata tapu hana ne Mua ue atu, to manatu e ia ke liliu kehe e tau tau mo e fakatufono; to tuku atu foki a lautolu ke he hana pule ato mole atu e tau mo e tau tau, mo e maga ne veveheua aki e tau.
26 Ka to nofo e fakafiliaga, ti uta kehe ai e lautolu hana pule, kia fakahiku ai mo e fakaoti ke hoko ke he fakahikuaga.
27 Ko e kautu, mo e pule, katoa mo e lilifu he tau kautu i lalo hifo he lagi oti, to tuku atu ia ke he motu he tau tagata tapu hana ne Mua ue atu, ko e hana kautu, ko e kautu tukulagi haia, to fekafekau mo e omaoma kia ia e tau pule oti ni.
28 Ti hiku ai e tau mena ia; ko au ko Tanielu ne lahi haku a fakaatukehe ha ko e haku e tau manatu, ti faliu ai foki haku mata; ka e taofi e au e tau mena na ke he loto haku.