Tanielu 8:1-27
8 KO e tau tolu he nofo ai a Pelesara mo patuiki, ko au ko Tanielu, ne kitia ai e au e fakakiteaga, kua mole atu e mena ne kitia fakamua e au.
2 Ne kitia foki e au ke he fakakiteaga, ne kitia e au he ha i ai au ke he fale he patuiki i Susana, ha ha i ai ke he fahi kautu ko Elama; ne kitia foki e au ke he fakakiteaga ha ha i ai au tata age ke he vailele ko Ulai.
3 Ne haga hake au ti kitia ai e au, kitiala ne tu ke he kauvai he vailele e mamoe tane, ha ha ia ia ua e hoe, ne leleva foki e tau hoe, ka e homo atu e loa he taha hoe ke he taha, ne tupu fakamui e hoe ne loa.
4 Ne kitia e au kua hoka atu he mamoe tane ke he fahi lalo, mo e fahi tokelau, mo e fahi toga; kua nakai fai manu taha foki ne maeke ke tu ki mua hana, ti nakai ha i ai taha ke laveaki mai he lima hana, ka e eke ni e ia e tau mena ne loto ki ai a ia, mo e fakatokoluga ni a ia.
5 Ne manamanatu ai au, kitiala, ko e koti tane ne hau ai he fahi lalo ke he fuga kelekele oti, ka e nakai piki a ia ke he kelekele; ne fai hoe lahi foki e koti ke he vaha he hana tau mata.
6 Ne fina atu a ia ke he mamoe tane ne ua e hoe hana, ne kitia ai e au ne tu ke he kauvai he vailele, kua oho atu a ia kia ia mo e hana malolo lahi.
7 Ne kitia e au a ia, kua fakatata a ia ke he mamoe tane, kua ita mahaki a ia kia ia, mo e keli e ia e mamoe tane, kua papaki ai e ia hana tau hoe ne ua; kua nakai ni maeke ke he mamoe tane ke tu ki mua hana, ka e liti e ia a ia ke he kelekele, mo e taholi e ia a ia; ti nakai ha i ai taha ke laveaki a ia mai he lima hana.
8 Ti fakatokoluga lahi ni e koti tane; kua malolo a ia, ti fati ai e hoe lahi; ka e tutupu hake fa e hoe lalahi ke hukui aki, kua hagao atu ke he tau matamatagi ne fa he lagi.
9 Ne tupu hake foki mai loto he taha ha lautolu taha hoe tote, ne tupu lahi ni a ia ke he fahi toga, mo e fahi uta, katoa mo e motu fulufuluola.
10 Ne tupu lahi foki a ia, kua hoko ke he tau kau he lagi, mo e liti hifo e ia ke he kelekele falu he kau katoa mo e falu a fetu, mo e taholi ai e ia.
11 Ne fakatokoluga a ia kua hoko ni ke he iki he kau, mo e uta kehe ia ia e poa huhunu mau, ti ulu ki lalo foki e ia hana faituga tapu.
12 Ti tuku atu kia ia e kau, katoa mo e poa huhunu mau ha ko e hala, ne liti ai e ia e tau kupu moli ke he kelekele, ti eke e ia e tau mena ne loto a ia ki ai, mo e monuina a ia.
13 Ti logona ai e au, taha tagata tapu ne vagahau, ne pehe age foki taha tagata tapu kia ia ne vagahau, Ato a fe kia e fakakiteaga ke he poa huhunu mau, mo e hala kua eke mo tau mena moumou, ti tuku atu ai e faituga katoa mo e kau, kia taholi ai?
14 Ti pehe mai a ia kia au, Ato katoatoa ai e tau afiafi mo e tau pogipogi ne ua e afe mo e tolu e teau, ti fakatapu ai e faituga.
15 Ne kitia e au e fakakiteaga, ko au ni ko Tanielu, ti kumi ai e au e kakano, ti kitiala, kua tu mai ki mua haku taha kua tino mai po ke tagata.
16 Ti logona ai e au e leo he tagata ke he vaha he tau kauvai a Ulai, kua ui, kua pehe age, Kaperielu na e, kia fakamatala a e koe e fakakiteaga ke he tagata nai.
17 Ti hau ai a ia tata age ke he mena ne tu ai au; ne hau a ia ti matakutaku ai au, ne veli fakafohifo ai au; ti pehe mai a ia kia au, Kia iloa e koe, ko e tama he tagata na e, ha ko e vaha he fakahikuaga to hoko ai e fakakiteaga.
18 Kua vagahau mai a ia kia au, kua pulumohea ai au kua fakafohifo ni au ke he kelekele; ka kua piki mai a ia kia au, mo e fakatu e ia au ki luga.
19 Kua pehe mai foki a ia kia au, Kitiala, to fakailoa atu e au kia koe e tau mena ke tutupu ke he vaha ke fakahiku ai e ita; ha ko e hana vaha kua kotofa to hoko ai e fakahikuaga.
20 Ko e mamoe tane ne kitia e koe ha ha i ai ua e hoe, ko e tau patuiki ia a Metai mo Peresia.
21 Ko e koti tane fulufulu foki, ko e patuiki a Iavana haia; ka ko e hoe lahi ha ha he vaha he tau mata hana, ko e patuiki fakamua haia.
22 Kua fati foki e hoe na, ka e fa e hoe ne tutu mai ai ke hukui aki, to tutu mai fa e kautu mai he atu motu, ka e nakai ha i ai hana malolo.
23 Ka hoko ke he fakahikuaga he kautu ha lautolu, ka fakakatoatoa ai e tau holifono he tau tagata holifono, ti tu mai ai e patuiki mata vale, kua iloa foki e ia e tau kupu galo.
24 To malolo lahi a ia, ka e nakai ni ko e malolo hana; to homo atu a ia he moumou mena, to monuina a ia, to eke foki e ia e tau mena ne loto a ia ki ai, to fakaoti e ia a lautolu ne malolo, katoa mo e motu tapu.
25 Ko e hana pulotu foki ke monuina ai hana tauteaga mena fakavai, to fakatokoluga a ia ke he hana loto, to fakaoti foki e ia e tau tagata tokologa kua nonofo fakatekiteki; to tu atu foki a ia ke he Iki he tau iki; to malipilipi ai a ia, ka e nakai malipilipi ai a ia he tau lima.
26 Ko e fakakiteaga he tau afiafi mo e tau pogipogi ne talahau ai kua fakamoli ia; kia puipui ai foki e koe e fakakiteaga, ha ko e tau aho loga hana to hoko mai ai.
27 Ko au ko Tanielu, nakai fahia au, ne gagao foki au fala aho; ti matike au mo e eke ai e tau fekau he patuiki; ne ofomate lahi au he fakakiteaga, ka e nakai, iloa ai e taha.