Tanielu 9:1-27
9 KO e tau fakamua a Tariu ko e tama a Ahasueru, ne tupu mai he tau tagata Metai, ne eke e ia mo patuiki ke he kautu a Kaletaia,
2 Ko e tau fakamua he eke a ia mo patuiki, ko au ko Tanielu ne iloa ai e au ke he tau tohi e totouaga he tau tau ne vagahau mai ai e Iehova ke he perofeta ko Ieremia, ke fakakatoatoa ai he eke a Ierusalema mo tau mena kua moumou, ko e fitugofulu ia e tau.
3 Ti hagao atu au ke he Iki ko e Atua ke kumi ai ke he liogi, mo e olelalo, mo e fakakanopogi, mo e ie talatala, mo e tau efuefuafi.
4 Ne liogi au kia Iehova haku Atua, mo e talahau atu ai au, kua pehe atu au, Ko e Iki na e, ko e Atua ne mua mo e matakutakuina, kua taofi e maveheaga, mo e fakaalofa kia lautolu kua fakaalofa atu kia ia, katoa mo lautolu kua omaoma ke he hana tau poaki;
5 Kua hala a mautolu, mo e mahani hepehepe, mo e mahani kelea a mautolu, kua fakafualoto a mautolu ha kua o kehe a mautolu mo e hau a tau poaki, mo e hau a tau fakafiliaga.
6 Ti nakai fanogonogo a mautolu ke he tau fekafekau hau ko e tau perofeta, ne vagahau mai ke he higoa hau ke he tau patuiki ha mautolu, mo e tau iki ha mautolu, mo e tau matua ha mautolu, katoa foki mo e tau tagata oti he motu.
7 Ko e Iki na e, ha ha ia koe e tututonu, ka e ha ha ia mautolu e ma, tuga he ha i ai kia mautolu he aho nai, ha i ai ke he tau tagata Iuta, mo lautolu ne nonofo i Ierusalema mo Isaraela oti, ko lautolu ne tata mai, katoa mo lautolu ne mamao ke he tau motu oti ne vega a lautolu ki ai, ha ko e tau hala ha lautolu ne hala ai a lautolu kia koe.
8 Ko e Iki na e, ha ha ia mautolu e ma, ko mautolu mo e ha mautolu e tau patuiki, mo e ha mautolu a tau iki, katoa mo e ha mautolu a tau matua, ha kua hala a mautolu kia koe.
9 Ha ha i ai ke he Iki, ha mautolu a Atua, e fakaalofa noa, ko ia foki kua fakamagalo e tau hala, ha kua fakafualoto a mautolu kia ia.
10 Nakai fanogonogo foki a mautolu ke he leo a Iehova ha mautolu a Atua, ke o ke he hana tau fakatufono, ne foaki mai ai e ia kia mautolu ke he hana tau fekafekau ko e tau perofeta.
11 Ko Isaraela oti foki, kua holi e lautolu e tau fakatufono hau mo e o kehe a lautolu, he nakai fia fanogonogo a lautolu ke he leo hau; ko e mena ia kua fakahoko mai ai kia mautolu e malaia, mo e tau mena ne omonuo ai e ia kua tohi ke he fakatufono a Mose ko e fekafekau he Atua, ka kua hala a mautolu kia ia.
12 Kua fakamoli e ia hana tau kupu ne vagahau mai e ia kia mautolu, katoa mo e ha mautolu a tau fakafili, ne fakafili a mautolu, ha kua fakahoko mai e ia kia mautolu e malaia lahi; he nakai eke ha mena i lalo he lagi oti, tuga ne tau mena kua eke i Ierusalema.
13 Tuga ne tohi ke he fakatufono a Mose, kua pihia he hoko mai ai kia mautolu e malaia oti nai; ka e nakai ole atu a mautolu ki mua a Iehova ha mautolu a Atua, kia liliu kehe a mautolu mo e tau hala ha mautolu, mo e manamanatu ai a mautolu ke he hau a fakamoli.
14 Ti kitekite a Iehova ke he malaia, mo e fakahoko mai ai kia mautolu; ha kua tututonu a Iehova ha tautolu a Atua ke he hana tau gahua oti kua eke e ia; ka e nakai fanogonogo a mautolu ke he hana leo.
15 Hanai, ko e Iki na e, ha mautolu a Atua, ne ta mai e motu hau mo e lima malolo mai he motu ko Aikupito, kua moua ai foki e koe e fakahekeaga tuga he eke he aho nai; kua hala a mautolu, kua mahani kelea a mautolu.
16 Ko e Iki na e, kua ole atu au kia koe ha ko e hau a tututonu oti, kia fakaliu kehe e koe hau a ita mo e hau a ita lahi mai he maga hau ko Ierusalema, ko e hau a mouga tapu; ko e tau hala ha mautolu, mo e mahani kelea he tau matua ha mautolu kua eke ai a Ierusalema katoa mo e motu hau mo mena ke eke fakakelea ki ai ke he tau motu oti kua agaagai mai kia koe.
17 Hanai, ha mautolu a Atua na e, kia fanogonogo mai a koe ke he liogi he hau a fekafekau, katoa mo e hana ole atu, mo e fakakikila atu e koe hau a fofoga ke he faituga hau kua eke mo mena kua moumou, kua ole atu ni ha ko e Iki.
18 Haku Atua na e, kia haga mai hau a na teliga mo e fanogonogo mai; kia fofoga mai a koe, mo e kitekite mai a ke he ha mautolu a tau mena kua moumou, mo e maga kua fakahigoa ai ke he higoa hau; ha kua nakai tuku atu e mautolu ha mautolu a ole atu kia koe ha ko e tututonu ha mautolu, ka ko e fakaalofa lahi hau.
19 Ko e Iki na e, kia fanogonogo mai. Ko e Iki na e, kia fakamagalo mai. Ko e Iki na e, kia haga mai a a koe, mo e eke ai ni e koe; aua neke mule mai a koe, ha ko koe ni haku Atua na e, ha kua fakahigoa ai ke he hau a higoa e maga hau mo e motu hau.
20 Ha ne vagahau atu au mo e liogi, mo e talahau atu e au haku a tau hala, mo e tau hala he haku a motu ko Isaraela, ha ne eke foki e au haku a ole ki mua a Iehova haku Atua mo e mouga tapu he haku Atua;
21 Ha ne vagahau au mo e liogi, ti piki mai kia au e tagata ko Kaperielu ne kitia fakamua e au ke he fakakiteaga, kua lele fakaave mai kia au, ke he magaaho ne eke ai e poa afiafi.
22 Kua fakaako mai e ia kia au, mo e vagahau mai e ia kia au, kua pehe mai, Tanielu na e, kua hau tuai au, ke fakaako atu kia koe ke iloilo ai a koe.
23 Ne kamata ai e olelalo hau ti hoko mai ai e kupu, ti kua hau ai au ke fakailoa atu kia koe, ha kua ofania lahi a koe; hanai, kia iloa e koe e kupu, mo e manamanatu a koe ke he fakakiteaga.
24 Ko e fitugofulu e vaha tapu kua kotofa ke he motu hau mo e maga tapu hau, ke fakaoti ai e holifono, mo e fakahiku ai e tau hala; ke eke ai foki e lukutoto ha ko e mahani kelea, mo e fakahoko mai ai e tututonu tukulagi, ke fakamau fakamailoga ai foki e fakakiteaga mo e perofetaaga, ke fakatākai foki e mena tapu ue atu.
25 Kia iloa foki mo e manamanatu, ke kamata mai he hoko atu e poaki kia liu taute mo e ati hake a Ierusalema, ke hoko atu ke he Mesia ko e Iki, ne fitu e vaha tapu mo e onogofulu ma ua e vaha tapu, to eke foki e puhala pulahi mo e kaupa ke he tau vaha matematekelea.
26 Ka mole atu onogofulu ma ua e vaha tapu, ti kelipopo ai e Mesia, ka e nakai fai mena kia ia; ko e tau tagata he maga ko e o mai ne fai, to fakaoti e lautolu e maga mo e faituga, ko e hana fakahikuaga foki ko e fakapuke haia; to ha i ai e tau ke hoko ke he fakahikuaga; kau mau e pule ke eke ai e motu mo tau mena kua moumou.
27 To fakamau foki e ia e maveheaga mo e tau tagata tokologa ke he vaha tapu taha; ko e maga foki ne veveheua aki e vaha tapu ti fakahiku ai e ia e poa katoa mo e poa mena kai, to hau ai foki ki luga he tau tapakau he tau mena vihiatia e taha kua moumou, ato hoko ke he fakahikuaga, kua mau e pule ke he mena ia, ti liligi ai e ita kia ia ne moumou.