Tau Fakafili 11:1-40
11 KO Iefeta ko e tagata Kiliata, ko e toa malolo a ia, ko e tama he fifine fakataka, ne fanau ai e Kiliata a Iefeta.
2 Ne fanau ai he hoana a Kiliata e tau tama tane kia ia; kua lalahi e tau tama tane he hoana, ti vega e lautolu a Iefeta, mo e pehe atu a lautolu kia ia, Nakai fai tufaaga a koe ke he magafaoa he matua tane ha mautolu, ha ko e tama he fifine kehe a koe.
3 Ti hola kehe ai a Iefeta he hana tau matakainaga, kua nofo ai a ia ke he motu ko Topa; ti fakapotopoto atu kia Iefeta e tau tagata fakateaga, ti feoaki a lautolu mo ia.
4 Kua hoko ke he hana aho ti tau ai e fanau a Amoni mo Isaraela.
5 Kua hoko e tau he fanau a Amoni mo Isaraela, ti o atu ai e tau patu Kiliata ke ta mai a Iefeta he motu ko Topa.
6 Ti pehe atu a lautolu kia Iefeta, Kia haele mai a koe, kia eke a koe mo takitaki kau ha mautolu, kia tau a tautolu mo e fanau a Amoni.
7 Ka e pehe mai a Iefeta ke he tau patu Kiliata, Nakai kia fakavihia mai a mutolu kia au, mo e vega e mutolu au he magafaoa he haku a matua tane? ti o mai he ha a mutolu kia au ainei he matematekelea a mutolu?
8 Ti pehe atu e tau patu Kiliata kia Iefeta, Ko e mena ia kua liu mai ai a mautolu kia koe ke o a koe mo mautolu, mo e tau a koe mo e fanau a Amoni, ti eke ai a koe mo iki kia lautolu oti kua nonofo i Kiliata.
9 Ti pehe mai a Iefeta ke he tau patu Kiliata, kaeke ke liliu a tautolu mo mutolu ke tau mo e fanau a Amoni, ka tuku mai ai foki e Iehova a lautolu kia au, to eke nakai au mo iki kia mutolu?
10 Ti pehe atu ai e tau patu Kiliata kia Iefeta, Kua fanogonogo mai a Iehova kia tautolu, kaeke ke nakai eke ai e mautolu pihia tuga ne kupu hau.
11 Ti o ai a Iefeta mo e tau patu a Kiliata, ti kotofa ai he motu a ia ke eke mo iki mo e takitaki kau kia lautolu. Kua vagahau ai e Iefeta hana tau kupu oti ki mua a Iehova i Misepa.
12 Ti fakafano atu e Iefeta e tau fekau ke he patuiki he fanau a Amoni, kua pehe atu, Ko e heigoa e mena kia taua mo au, kua hau ai a koe kia au ke tau ke he haku a kelekele?
13 Ti pehe mai e patuiki he fanau a Amoni ke he tau fekau a Iefeta, Ha kua fofo e Isaraela haku a kelekele ke he hana hake mai i Aikupito, ne kamata mai i Aranona ke hoko atu ki Iapoka, ti hoko atu ki Ioritana; ko e hanai, kia liuaki mai e mutolu ia mo e mafola.
14 Ti liu fakafano atu e Iefeta e tau fekau ke he patuiki he fanau a Amoni.
15 Kua pehe atu a ia kia ia, Kua pehe mai a Iefeta, Nakai ni fofo e Isaraela e kelekele a Moapi, mo e kelekele he fanau a Amoni;
16 Ha kua hake mai a Isaraela i Aikupito, mo e o age ke he tutakale ke hoko atu ke he Tahi Kula; kua hoko atu ki Katesa.
17 Ti fakafano age ai e Isaraela e tau fekau ke he patuiki a Etoma, kua pehe age, Kia toka e koe au ke fina atu ai ke he motu hau. Ka e nakai fanogonogo mai ai e patuiki a Etoma, ti fakafano atu foki ke he patuiki a Moapi, ka e nakai mafai a ia; ti nonofo ai a Isaraela Katesa.
18 Ti o age a lautolu ke he tutakale, mo e takai ai e motu ko Etoma mo e motu ko Moapi; kua hohoko atu a lautolu ke he fahi ne hake mai ai e la ke he motu ko Moapi, ti he api ai a lautolu ke he fahi atu a Aranona, ka e nakai laka ai e lautolu e katofia a Moapi; ha ko Aranona ko e katofia a Moapi haia.
19 Ti fakafano atu ai e Isaraela e tau fekau kia Sikono ko e patuiki he tau tagata Amori, ko e patuiki a Hesepona, kua pehe atu a Isaraela kia ia, Kia toka e koe au ke fina atu ai ke he kelekele hau ke hoko atu ai ke he haku a motu.
20 Ka e nakai talia e Sikono e kupu a Isaraela ke o age ai a lautolu he hana motu; ti fakapotopoto ai e Sikono hana motu oti ni, kua he api ai a lautolu i Iaesa; ti tau ai a lautolu mo Isaraela.
21 Ti tuku atu ai e Iehova ko e Atua a Isaraela a Sikono mo e hana motu oti ke he lima a Isaraela, ti keli e lautolu a ia; ti eke ai e Isaraela e motu oti ni he tau tagata Amori ko e tau tagata ne nonofo ai ke he motu ia.
22 Ti eke ai e lautolu e kelekele oti he tau tagata Amori, ke kamata mai a Aranona, ke hoko atu ki Iapoka; ti kamata mai he tutakale, ke hoko atu ki Ioritana.
23 Hanai, ko Iehova ko e Atua a Isaraela ne vega kehe e tau tagata Amori mai mua hana motu ko Isaraela, ka e eke ai kia e koe māu?
24 Nakai kia eke e koe, e tau mena kua ta atu ai kia koe, he atua hau ko Kemosa? ko e tau mena oti foki ke ta mai ai e Iehova ha mautolu a Atua kia mautolu to eke ai e mautolu ma mautolu ni.
25 Ko e hanai kua mua kia hau a mahani mitaki kia Palako ko e tama a Siporu ko e patuiki a Moapi? po ke taufetoko nakai a ia mo Isaraela? po ke tau nakai a ia mo lautolu,
26 He nofo a Isaraela i Hesapona mo e hana tau maga, mo Aroeru mo e hana tau maga, mo e tau maga oti ne tata age ki Aranona, ne tolu teau e tau? Kua nakai fofo ai e mutolu ma mutolu he ha ke he tau tau ia?
27 Ko au foki nakai hala atu au kia koe; ka e kelea e mena hau kua eke kia au, he o mai a mutolu ke tau kia au; ko Iehova ko e Fakafili, kia fakafili ai e ia ke he aho nai ke he fanau a Isaraela mo e fanau a Amoni.
28 Ka e nakai fanogonogo mai e patuiki he fanau a Amoni ke he tau kupu a Iefeta ne poaki atu ai e ia kia ia.
29 Kua hoko kia Iefeta e Agaga a Iehova, ti fina age ai a ia ki Kiliata mo Manase, kua fina age ai e ia ki Misepa i Kiliata, ti fina age ai a ia i Misepa i Kiliata ke he fanau a Amoni.
30 Ti omonuo ai e Iefeta e omonuo kia Iehova, kua pehe atu, Kaeke ke tuku mai e koe e fanau a Amoni ke he haku a lima;
31 Ti eke ni ma Iehova a ia kua hu mai he tau gutuhala he haku a fale ke fonofono au ka liu atu au mo e monuina mai he fanau a Amoni; to eke foki e au a ia mo poa huhunu.
32 Ti fina age ai a Iefeta ke he fanau a Amoni ke tau mo lautolu; ti tuku atu ai e Iehova a lautolu ke he hana lima.
33 Kua keli ai e ia a lautolu, ke kamata mai i Aroeru, ke hoko atu ki Meniti, ko e tau maga ne uafulu, ti hoko atu ni ki Apelakarame, ko e keliaga lahi mahaki ni; kua fakatokolalo ai e fanau a Amoni ki mua he fanau a Isaraela.
34 Ti fano ai a Iefeta ki Mitepa ke he hana fale; kitiala foki, ko e hana tama fifine kua hu mai ke fonofono a ia mo e tau topā mo e koli; ko e hana tama fuataha a ia, nakai fai tama tane a ia po ke tama fifine foki, ka ko ia ni.
35 Kua kitia e ia a ia ti hehe ai e ia hana tau tapulu, kua pehe atu, Oi te! haku a tama fifine na e, kua fakamamahi fakalahi mai e koe au; kua eke a koe mo taha ia lautolu kua fakalavelave mai kia au; ko au foki, kua vagahau atu e au kia Iehova, ti nakai maeke ke liuaki mai haku a kupu.
36 Ti pehe mai a ia kia ia, Haku matua na e, kua vagahau atu kia a koe kia Iehova? ati eke a e koe kia au tuga ne kupu kua fina atu ai ia koe; ha kua oti he taui atu ai e Iehova ha ko koe kia lautolu kua fai fi kia koe ko e fanau a Amoni.
37 Kua pehe mai foki a ia ke he hana matua tane, Kia eke ai e mena nai kia au; kia toka e koe au ua e mahina, ke fina atu au mo e hifo ki luga he tau mouga, mo e tagi ai au ha ko e haku a tamafine tote, ko au katoa mo e haku a tau kapitiga fifine.
38 Ti pehe atu a ia, Kia fano a koe; ti fakafano atu e ia a ia ke he tau mahina ne ua; ti fano ai a ia mo e hana tau kapitiga fifine, kua tagi ai a lautolu ki luga he tau mouga ha ko e hana tamafine tote.
39 Kua hoko ke he fakahikuaga he tau mahina ne ua, ti liu atu ai a ia ke he hana matua tane; ti eke e ia kia ia hana omonuo ne omonuo ai e ia; ko ia foki nakai iloa ha tane. Ti eke ia mo fakatufono kia Isaraela,
40 Ke he taha tau mo e taha tau ke o ai e tau tamafine a Isaraela ke fakaheke ke he tamafine a Iefeta ko e tama a Kiliata ke taki fa e aho ke he tau.