Tau Fakafili 14:1-20
14 KUA hifo a Samisoni ki Timenata, ti kitia ai e ia e fifine i Timenata, ko e fifine Filisitia.
2 Ti hake a ia mo e tala age ai e ia ke he hana matua tane, mo e hana matua fifine, kua pehe age, Kua kitia e au e fifine i Timenata, ko e fifine Filisitia; hanai, kia ta mai e mua a ia ke eke mo hoana haku.
3 Ti pehe age ai hana matua tane mo e hana matua fifine kia ia, Nakai kia fai fifine he tau tama fifine he hau a tau matakainaga mo e haku a motu oti, ke fano ai a koe ke uta hoana mai he tau tagata Filisitia kua nakai peritome? Ti pehe age a Samisoni ke he hana matua tane, Kia ta mai e koe a ia maku, ha kua mitaki ni a ia kia au.
4 Ka e nakai iloa hana matua tane mo e hana matua fifine, kua mai ia Iehova e mena na; kua kumi mena a ia ke lagā ai e tau mo e tau tagata Filisitia. Ha ko e vaha ia kua pule ai e tau tagata Filisitia kia Isaraela.
5 Ti o hifo ai a Samisoni, mo e hana matua tane mo e hana matua fifine ki Timenata; kua hoko atu a lautolu ke he uluvine a Timenata, kitiala, kua fina age ai e punua leona ke fonofono a ia mo e tagi.
6 Ti hifo ai ki luga hana e Agaga a Iehova, ti hehe ai e ia e leona, tuga ne hehe ai e punua koti, ka e nakai fai mena a ia ke he hana lima; ka e nakai tala age a ia ke he hana matua tane mo e hana matua fifine e mena kua eke e ia.
7 Ti hifo a ia mo e vagahau ai mo e fifine; kua mitaki ni a ia kia Samisoni.
8 Kua mole falu a aho ti liu atu a ia ke ta mai ai a ia; ti afe age a ia ke kitekite ke he tino he leona mate; kitiala; ko e fuifui lago meli katoa mo e meli ha ha he tino he leona mate.
9 Ti toto mai e ia ke he hana lima, ti fano a ia mo e kai ai, kua hoko age a ia ke he hana matua tane mo e hana matua fifine, ti age ai e ia kia laua, ti kai ai e laua; ka e nakai tala age e ia kia laua, ne toto mai e ia e meli he tino he leona mate.
10 Ti hifo ai hana matua tane ke he fifine, ti eke ai e Samisoni e taonaga ke he mena ia, ha kua mahani ke eke pihia he tau fuata.
11 Kua kitia e lautolu a ia ti ta age ai e lautolu e tau tagata tokotolugofulu ke fakalataha a lautolu mo ia.
12 Ti pehe age a Samisoni kia lautolu, Hanai, to tala atu e au kia mutolu haku a moki, kaeke ke tala mai ai e mutolu hana kakano ke he tau po ne fitu he taonaga, mo e moua ai e mutolu, ti ta atu ai e au kia mutolu e tau ie lino ne tolugofulu mo e tau tapulu ne tolugofulu;
13 Kaeke ke nakai maeke ia mutolu ke tala mai hana kakano, ti ta mai ai e mutolu kia au tolugofulu e ie lino, mo e tolugofulu e tapulu. Ti pehe age a lautolu kia ia, Kia tala mai a e koe e moki hau, ke fanogonogo atu ai a mautolu.
14 Ti pehe age ai a ia kia lautolu, Ne fina atu ai e tau mena kai mai ia ia kua kai mena, ti fina atu ai e mena humelie mai ia ia kua malolo. Kua nakai maeke ia lautolu ke talahau ai hana moki ke he tau aho ne tolu.
15 Kua hoko ke he aho fitu, ti pehe age a lautolu ke he hoana a Samisoni, Kia ole a koe ke he tane hau, kia fakakite mai e ia kia mautolu e moki, neke huhunu ai e mautolu a koe mo e magafaoa he hau a matua ke he afi, kua ui mai kia e mutolu kia mautolu ke fakanofogati ai a mautolu? Nakai kia pihia?
16 Ti tagi ai e hoana a Samisoni kia ia, kua pehe atu, Kua fakavihia mai e koe au, nakai ni fakaalofa mai a koe kia au; kua talahau e koe e moki ke he tau tagata he haku a motu, ka e nakai fakakite mai ai e koe kia au; ti pehe mai a ia kia ia, Kitiala, nakai fakakite age e au ke he haku a matua tane, mo e haku a matua fifine; ke fakakite atu kia e au kia koe?
17 Kua tagi atu a ia kia ia ke he tau aho fitu ne eke ai e taonaga; kua hoko ke he aho fitu ti fakakite ai e ia kia ia, he ole fakafi ai e ia kia ia, ti tala age ai e ia e moki ke he tau tagata he hana motu.
18 Ti pehe age ai e tau tagata he maga ke he aho fitu, ka kua nakaila to e la, Ko e heigoa e mena kua mua hana humelie ke he humelie he meli? ko e heigoa foki kua mua hana malolo ke he malolo he leona? Ti pehe age a ia kia lautolu, Aua he uta e mutolu haku a punua povi fifine mo e keli aki e kelekele, po kua nakai kitia e mutolu haku a moki.
19 Ti hifo ai ki luga hana e Agaga a Iehova; ti hifo a ia ki Asikelona, mo e keli ai e ia ia lautolu e tau tagata tokotolugofulu, ti uta e ia ha lautolu a tau tapulu, ti age ai e ia e tau tapulu kia lautolu ne talahau ai e moki; kua ita lahi a ia ti hake ai a ia ke he fale he hana matua.
20 Ka kua age ai e hoana a Samisoni ke he hana kapitiga, ko e tagata kua eke mo kapitiga hana.