Tau Fakafili 15:1-20
15 KUA mole atu falu a aho, ko e vaha ne helehele ai e tau saito; ti ahi atu ai e Samisoni hana hoana ne uta ai e ia e punua koti; kua pehe age a ia, to fina atu au ke he hoana haku ke he poko, ka e nakai toka hana matua a ia ke hu atu ki ai.
2 Kua pehe age hana matua kia ia, Ne pehe au kua fakavihia e ia a ia, ti age e au a ia ke he hau a kapitiga; nakai kia mua he mitaki hana tehina kia ia? kia eke ai a ia mo hukui hana kia koe.
3 Ti pehe age a Samisoni kia lautolu, To mea au ainei ke he tau tagata Filisitia, pete he eke e au e mena kelea kia lautolu.
4 Ti fano a Samisoni, ti tapaki ai e ia e tau alope ne tolu e teau; ne uta foki e ia e tau hulu, ti liliu ai e ia e taha hiku ke he taha hiku, ti tuku ai e ia taha hulu ke he vaha he na hiku ne ua ke he lotoga.
5 Ti tugi ai e ia e tau hulu ke he afi, mo e fakafano atu ai e ia a lautolu ke he tau saito kua tutu agaia, he tau tagata Filisitia; ti huhunu ai e tau tanakiaga saito katoa mo e tau saito kua tutu agaia, katoa mo e tau ulu olive.
6 Ti huhu age he tau tagata Filisitia, Ko hai ne eke e mena nai? Ti pehe age ai a lautolu, Ko Samisoni ko e figona he tagata Timenata, ha kua fofo ai hana hoana mo e age ke he hana kapitiga. Ti o hake e tau tagata Filisitia mo e huhunu ai a ia mo e hana matua tane ke he afi.
7 Ti pehe age a Samisoni kia lautolu, Kua eke e mutolu e mena na, ka to taui atu ai au kia mutolu, ka mole ia to tokai.
8 Ti keli ai e ia a lautolu ko e tau hui ki luga he tau tega, ko e keliaga lahi ni; ti hifo ai a ia, kua nofo a ia ke he hala lalo maka ko Etama.
9 Ti o hake ai e tau tagata Filisitia, ti heapi ai a lautolu i Iuta, ti fofola atu ai a lautolu ke hoko ki Lehe.
10 Ti pehe atu e tau tagata Iuta kia lautolu, Kua o mai a mutolu ke tau mo mautolu he ha? Ti pehe atu ai a lautolu, Kua o mai a mautolu ke lili a Samisoni, ke eke kia ia tuga ne eke ai e ia kia mautolu.
11 Ti o hifo ai e tau tagata i Iuta ne tolu e afe ke he hala lalo maka ko Etama, ti pehe age a lautolu kia Samisoni, Nakai kia iloa e koe kua pule he tau tagata Filisitia kia tautolu? ko e heigoa e mena nai kua eke e koe kia mautolu? Ti pehe age a ia kia lautolu, Tuga ne eke e lautolu kia au, kua eke pihia ni e au kia lautolu.
12 Ti pehe age a lautolu kia ia, Kua hifo mai a mautolu ke lili a koe, mo e tuku atu a koe ke he lima he tau tagata Filisitia. Ti pehe age ai a Samisoni kia lautolu, Kia omonuo mai a mutolu kia au ke nakai keli ai e mutolu au.
13 Ti tala age e lautolu kia ia, kua pehe age, Nakai; ka e lili e mautolu a koe, mo e tuku atu e mautolu a koe ke he tau lima ha lautolu, ka e nakai keli e mautolu a koe. Ti lili e lautolu a ia ke he tau toua fou ne ua, ti ta hake ai e lautolu a ia mai he lalo maka.
14 Kua hoko a ia ki Lehe, ti kalaga fiafia ai e tau tagata Filisitia kia ia. Ti hifo ai e Agaga a Iehova ki luga hana, ti eke ai e tau toua ha ha he tau lima hana ke tuga ne manoa lino kua huhunu ai ke he afi, ti mavete mai hana tau liliaga he hana tau lima.
15 Ti moua ai e ia e hui kauloa fou he asini, ti fakaolo atu e ia hana lima, mo e toto ai, ti keli aki e tau tagata ne taha e afe.
16 Ti pehe age a Samisoni, ko e hui kauloa he asini, ko e tumutumu, ko e tau tumutumu ne ua, ko e hui kauloa he asini kua keli aki e au e tau tagata ne taha e afe.
17 Kua oti ai hana tau kupu ti liti ai e ia e hui kauloa he lima hana; kua ui ai e mena ia ko Rama-lehe.
18 Ti fia inu lahi a ia; ti ui ai e ia kia Iehova, kua pehe atu, Kua foaki mai e koe ke he hau a fekafekau e fakamouiaga lahi nai, ka ko ainei ke mate kia au he fia inu, ti to ai au ke he tau lima he tau tagata nakai peritome?
19 Ti ihi ai he Atua e maka ke he mena pokopoko ha ha i Lehe, ti fina atu ai e vai, kua inu ai a ia, ti liu mai ai hana agaga, kua moui ni a ia; ko e mena ia kua ai ai e higoa he mena ia ko Eniakori ha ha i Lehe kua hoko mai ke he vaha nai.
20 Kua fakafili e ia a Isaraela ke he vaha ne pule ai e tau tagata Filisitia, ke he tau tau ne uafulu.