Tau Fakafili 17:1-13
17 KO e taha tagata ha ha he mouga ko Efaraimo, ko Mika hana higoa.
2 Kua pehe age a ia ke he hana matua fifine, Ko e tau tupe ne taha e afe mo e taha e teau, ne uta ia koe, ne kaialu ai e koe, ti logona foki e au kua vagahau ai e koe; kitiala, ko e tau tupe ha ha ia au, ne uta e au. Ti pehe age ai hana matua fifine kia ia, Kia monuina a koe ia Iehova haku tama na e.
3 Kua liuaki atu ai e ia e tau tupe taha e afe ti taha e teau ke he hana matua fifine, Ti pehe mai hana matua fifine, Ne fakatapu e au e tau tupe ia mai he lima haku kia Iehova ma e tama haku, ke eke ai e tupua kua ta, mo e tupua ario; ko e hanai to liuaki atu ai e au māu.
4 Ka e liuaki atu e ia e tau tupe ke he hana matua fifine; ti uta ai he matua fifine hana e tau tupe ne ua e teau mo e age ke he tufuga eke e tau mena auro, ti eke ai e ia e tupua kua ta, mo e tupua ario, ti toka ai a laua ke he fale a Mika.
5 Ha ha he tagata ko Mika e fale he tau atua, ti eke ai e ia e efota mo e tau tupua, ti kotofa ai e ia taha he hana tau tama tane, kua eke a ia mo ekepoa kia ia.
6 Nakai fai patuiki ke he motu a Isaraela ke he vaha ia, ne takitaha e tagata mo e eke e tau mena kua tonu ke he hana ni a manatu.
7 Ko e fuata foki mai Petelehema-iuta mai he magafaoa a Iuta, ka ko e tagata he magafaoa a Levi a ia, ne nofo paea a ia ke he mena ia.
8 Ti fina atu a ia he maga ko Petelehema-iuta ke api fakahanoa ke he maga ka moua ai; ti hoko atu ai hana fenoga ke he mouga ko Efaraimo ke he fale a Mika.
9 Ti huhu a Mika kia ia, Ne hau a koe i fe? Ti tali mai ai kia ia ko e tagata he magafaoa a Levi au, mai Petelehema-iuta kua fano fakahanoa au ke api ke he mena ke moua ai.
10 Ti pehe atu ai a Mika kia ia, Kia nonofo a taua mo au, kia eke a koe mo matua haku mo e haku a ekepoa; ka ko au, to ta atu ai e au kia koe taki hogofulu e tupe ke he tau tau, katoa mo e tau tapulu mo e tau mena kai. Ti fina age ai e tagata he magafaoa a Levi.
11 Kua loto ki ai e tagata he magafaoa a Levi, ti nonofo ai a laua mo ia, ne ha i ai e fuata mo ia ke tuga ne taha he hana tau tama tane.
12 Ti kotofa ai e Mika e tagata he magafaoa a Levi, ti eke e fuata mo ekepoa kia ia, ti ha i ai a ia ke he magafaoa a Mika.
13 Ti pehe age a Mika, ko e hanai, Kua iloa ai e au to mahani mitaki mai a Iehova kia au, ha kua ha ha ia au e tagata he magafaoa a Levi kua eke mo ekepoa.