Tau Fakafili 18:1-31
18 KO e vaha ia nakai fai patuiki a Isaraela; ko e vaha ia foki ne kumi ai he taha veveheaga he magafaoa a Tano e mena ke nonofo ai a lautolu; ha kua hoko ke he aho ia nakaila oti atu kia lautolu ha lautolu a kelekele ne tufatufa ai ke he tau magafaoa a Isaraela.
2 Kua fakafano atu he fanau a Tano mai he tau magafaoa ha lautolu e tau tagata tokolima mai he fahi motu ha lautolu, ko e tau tagata malolo, i Soraa mo Esetaola, ke toko atu ke he motu mo e kitekite ki ai; ne pehe atu a lautolu kia lautolu, Kia o a mutolu, ti toko atu a mutolu ke he motu. Ti hohoko atu a lautolu ke he mouga ko Efaraimo ke he fale a Mika, ti momohe ai a lautolu ke he mena ia.
3 Ne tata age a lautolu ke he fale a Mika, ti iloa ai e lautolu e leo he fuata he magafaoa a Levi, ti afe age ai a lautolu; ti pehe age a lautolu kia ia, Ko hai ne ta mai a koe ke he mena nai? Ko e heigoa hāu ne fa eke ki hinai? Ti heigoa ke moua ai māu ke he mena nai?
4 Ti pehe age a ia kia lautolu, Kua eke pehe mo e pehe e Mika kia kua palepale foki e ia au, ti eke ai au mo ekepoa kia ia.
5 Ti pehe age a lautolu kia ia, Kia huhu la e koe ke he Atua, ke iloa ai e mautolu, po ke monuina nakai ha mautolu a fenoga kua o atu ai a mautolu?
6 Ti pehe age e ekepoa kia lautolu, Kia o a a mutolu mo e monuina; ha ha i mua a Iehova ha mutolu a puhala kua o atu ai a mutolu.
7 Ti o ai e tau tagata tokolima, kua hoko ki Laisa, ti kitekite a lautolu ke he tau tagata ha ha i ai, kua nonofo fakahanoa a lautolu tuga ne mahani he tau tagata Saitonu; ne nonofo fakatekiteki ai a lautolu mo e nonofo fakahanoa ni; nakai ha i ai foki taha ke he motu ke fakama a lautolu ke he taha mena, ko e taha kua pule; ne mamao foki a lautolu mo e tau tagata Saitonu, ti nakai feutaaki mena a lautolu mo e tau tagata.
8 Ti hoko a lautolu ke he tau matakainaga ha lautolu i Soraa mo Esitaola. Ti pehe age ha lautolu a tau matakainaga kia lautolu, Ko e heigoa kia ha mutolu a kupu?
9 Ti pehe age a lautolu, Kia mamatike a ke o hake a tautolu kia lautolu, ha kua kitia e mautolu e motu, kitiala, kua mitaki lahi ni; kua nonofo noa kia a mutolu? aua neke temagao a mutolu ke o atu, ke hoko atu ai a tautolu ke eke ma tautolu e motu.
10 Ka o atu a mutolu, to hohoko atu a mutolu ke he motu kua nonofo fakahanoa, mo e kelekele laulahi; ha kua foaki mai he Atua kia mutolu e motu kua nakai hogeia ai ha mena taha he tau mena oti ke he lalolagi.
11 Ti o ai he mena ia falu mai he magafaoa he tau tagata Tano mai Soraa mo Esitaola, ko e tau tagata tokoono e teau, kua tauteute ai mo e tau kanavaakau ke tau.
12 Kua o hake a lautolu mo e heapi i Kiriata-iarima i Iuta; ko e mena ia ne ui ai e mena ia ko Maane-tano, ke hoko mai ke he aho nai; kitiala, ha ha i ai i tua a Kiriata-iarima.
13 Ti o atu ai a lautolu he mena ia ke he mouga ko Efaraimo, ti hohoko atu ai a lautolu ke he fale a Mika.
14 Ti pehe age e tau tagata tokolima ne o atu ke toko ke he motu ko Laisa, kua pehe age a lautolu ke he tau matakainaga ha lautolu, Kua iloa nakai e mutolu ha ha he tau fale nai e efota, mo e tau tupua, mo e tau tupua kua ta, mo e tupua ario? ko e hanai kia fifili la e mutolu e mena ke eke.
15 Ti afe age ai a lautolu, kua hohoko a lautolu ke he fale he fuata he magafaoa a Levi, ko e fale a Mika, ti feofanaki a lautolu mo ia.
16 Ko e tau tagata toko ono e teau kua tauteute mo e tau kanavaakau ke tau, ko e fanau a Tano, ne tutu a lautolu ke he mena ne hu atu ai ke he gutuhala.
17 Ka e o hake e tau tagata tokolima, ne o ke toko atu ke he motu, kua huhu atu ai a lautolu, ti uta ai e lautolu e tupua kua ta, mo e efota, mo e tau tupua, mo e tupua ario; ka ko e ekepoa kua tu ai a ia ke he mena ne hu atu ai ke he gutuhala mo e tau tagata tokoono e teau, kua tauteute mo e tau kanavaakau ke tau.
18 Kua huhu atu a lautolu ke he fale a Mika, mo e uta ai e lautolu e tupua kua ta, mo e efota, mo e tau tupua, mo e tupua ario; ti pehe age ai e ekepoa kia lautolu, Ko e heigoa kia e mena kua eke e mutolu?
19 Ti pehe age a lautolu kia ia, Kia fakamate a, kia tuku e koe hau a lima ke he gutu hau, ti o a tautolu mo koe, kia eke ai a koe mo matua ha mautolu mo e ekepoa ha mautolu; po ke mena fe kua mitaki he eke a koe mo ekepoa ke he magafaoa he tagata tokotaha, po ke eke a koe mo ekepoa ke he veveheaga he magafaoa, mo e taha magafaoa a Isaraela?
20 Ti fiafia ai e loto he ekepoa, ti uta ai e ia e efota, mo e tau tupua, mo e tupua kua ta, ti fina atu a ia fakalataha mo e tau tagata.
21 Ti tafilu a lautolu, mo e o ai a lautolu; ti tuku atu ki mua ha lautolu, e tau tama ikiiki, mo e tau manu, mo e tau kavega.
22 Kua mamao a lautolu mo e fale a Mika, ti fakapotopoto ai e tau tagata ha ha he tau fale ne katofia mo e fale a Mika, ti tutuli atu a lautolu ke he fanau a Tano.
23 Ti tauui atu a lautolu ke he fanau a Tano, ti hahaga mai ai e tau mata ha lautolu, kua pehe mai a lautolu kia Mika, ko e heigoa ne mamahi ai a koe ne fakapotopoto mai ai kia koe e tau tagata na?
24 Ti pehe atu a ia, Kua holataki e mutolu haku tau atua ne eke ai e au, mo e ekepoa, ti kua o a mutolu, ti ko e heinoa kia kua toe māku? ko e heigoa e kupu na, ne pehe mai ai a mutolu, Ko e heigoa kia ne mamahi ai a koe?
25 Ti pehe mai e fanau a Tano kia ia, Aua neke logona e mautolu hau a leo, neke feoho atu kia mutolu e tau tagata manava hogohogo, ti keli ai e lautolu a koe mo e hau a magafaoa.
26 Ti o ai e fanau a Tano ke he fenoga ha lautolu. Kua kitia e Mika kua mua ha lautolu a malolo ke he malolo hana, ti tafilu a ia, mo e liu atu ai a ia ke he hana fale.
27 Ka e o a lautolu, ti uta e lautolu e tau mena ne eke e Mika, mo e ekepoa ha ha ia ia, kua hohoko atu a lautolu ki Laisa ko e motu kua nonofo fakatekiteki, kua nonofo fakahanoa ni; ti keli e lautolu a lautolu ke he pelu, mo e huhunu e lautolu ha lautolu a maga ke he afi.
28 Ti nakai ha i ai taha ke laveaki a lautolu, ha kua vaha mamao ia mo Saitonu, ti nakai feutaaki mena foki e lautolu mo e tau tagata; ha ha i ai e motu ke he pahua ne tata age ki Peterehopo. Ti ati ai e lautolu e maga, mo e nonofo ai a lautolu.
29 Ti fakahigoa e lautolu e maga ko Tano, ko e higoa he matua tane ha lautolu ko Tano, ne fanau ai kia Isaraela; ka ko e higoa fakamua he maga ko Laisa haia.
30 Ti fakatu ai he fanau a Tano e tupua kua ta, ma lautolu, ko Ionatana foki ko e tama a Keresoma, ko e tama a Mose haia, ko ia mo e hana fanau ne eke a lautolu mo tau ekepoa ke he magafaoa a Tano, kua hoko ke he aho he fakapaeaga he motu.
31 Ne fakatu e lautolu ma lautolu e tupua ne ta e Mika, ne eke e ia, ke he tau aho oti ne ha i ai e fale he Atua i Sailo.