Tau Fakafili 19:1-30
19 KO e vaha ia nakai fai patuiki a Isaraela, kua nofo paea ai e tagata Levi ke he fahi he mouga ko Efaraimo; ti uta ai e ia e hoana mana, ko e hoana fakahoa, mai Petelehema-iuta.
2 Kua faivao hana hoana fakahoa, ti fano kehe a ia ia ia ke he magafaoa he hana matua tane i Petelehema-iuta ti ha ha i ai a ia ke he tau mahina ne fa.
3 Ti matike ai hana tane, ti fina age a ia ke vagahau fakamitaki mo ia mo e liuaki mai e ia a ia; ne fakalataha mo ia hana fekafekau mo e tau asini ne ua. Ti ta age ai he fifine a ia ke he fale he hana matua tane; kua kitia he matua he tama fifine a ia ti fiafia ai a ia ke feleveia mo ia.
4 Ti taofi he matua fugavai hana a ia, ko e matua tane he tama fifine, ti nonofo ai a laua mo ia ke he tau aho ne tolu; ti kai ai a lautolu mo e inu mo e momohe ai a lautolu ke he mena ia.
5 Ti hoko ke he aho fa kua uhu matike a lautolu ke he magaaho pogipogi, ti matike ai a ia ke fano. Ti pehe age ai e matua tane he tamāfine ke he figona hana, Kia fakamalolo ai hau a loto ke he taha mena kai, ti o ai a mua.
6 Ti nonofo ai a laua, kua kai mo e inu fakalataha ai a laua, ha kua pehe age e matua tane he tamāfine ke he tagata, Kia loto mai a koe ti momohe a tautolu, ti fakafiafia ai e koe hau a loto.
7 Ti matike e tagata ke fano ka e ole fakamakamaka kia ia hana matua fugavai, ti liu foki mohe ai a ia.
8 Ti uhu matike a ia ke he magaaho pogipogi he aho lima, ko e o ne fai; ti pehe age ai e matua tane he tamāfine, Kia fakamalolo ā hau a loto; ti fakahautoka a laua, kua hoko ke he magaaho pale e la, ti kai fakalataha ai a lautolu.
9 Ti matike e tagata, ke o ai a lautolu mo e hana hoana fakahoa mo e hana fekafekau; ti pehe mai ai hana matua fugavai kia ia, ko e matua tane he tamāfine, Kitiala, ko e po ne fai e aho nai, ko e afiafi tuai aenai, kia momohe a tautolu; kitiala, kua teitei oti e aho nai, kia mohe a a koe i hinai, mo e fakafiafia ai hau a loto, ti uhuala a mutolu a pogipogi mo e o atu ai ke he fenoga ha mutolu, ti fano a koe ke he kaina hau.
10 Ka e nakai mafai e tagata ke momohe ai a lautolu, kua matike a ia mo e fano; ti hoko atu a ia ke he mena ne fehagai mo Iepusi, (ko Ierusalema haia;) ha ha ia ia e na asini ua kua fakanofoa, kua fakalataha foki mo ia hana hoana fakahoa.
11 Kua tata age a lautolu ki Iepusi, kua tokolalo lahi ni e la; ti pehe age e fekafekau ke he hana iki, Kia o a tautolu mo e afe age ke he maga na he tau tagata Iepusi, mo e momohe ai a tautolu.
12 Ka e pehe age hana iki kia ia, Aua neke afe a tautolu ke he maga he tau tagata kehe, nakai ko e fanau a Isaraela a lautolu, ka e o atu a tautolu ki Kipeā.
13 Ti pehe age a ia ke he hana fekafekau, Hau ā ke fakatata atu ke he taha he tau mena na, kia momohe a tautolu i Kipeā po ko Rama.
14 Ti o ai a lautolu, kua o a lautolu; kua tata age a lautolu ki Kipeā a Peniamina ti to ai e la.
15 Ti afe atu ai a lautolu ke he mena ia, ke huhu atu ke momohe ai i Kipeā; kua hohoko ki ai a lautolu, ti nonofo ai a lautolu ke he malamalaega he maga, ka e nakai fai tagata ke talia a lautolu ke he hana fale ke momohe ai.
16 Kitiala, ko e tagata fuakau kua hau ai he gahua hana he vao he afiafi, ko e tagata foki a ia mai he mouga ko Efaraimo, kua nofo paea ai a ia i Kipeā; ka ko e tau tagata he maga, ko e tau tagata he magafaoa a Peniamina a lautolu.
17 Kua haga hake e ia hana tau mata, ti kitia e ia e fenoga ke he malamalaega he maga. Ti pehe age ai e tagata fuakau, Ko e fano a koe ki fe? ne hau i fe foki a koe?
18 Ti tali age a ia kia ia, Ne o mai a mautolu i Petelehema-iuta ko e o atu ne fai ke he fahi he mouga ko Efaraimo, ne hau ai au he mena ia, ti fina age ai au ki Petelehema-iuta, ka kua fano nai au ke he fale a Iehova, ti nakai talia he taha au ke he hana fale;
19 Ka e ha ha i ai e tau kakau saito mo e tau mena ke kai ai ha mautolu a tau asini, katoa mo e tau mena kai mo e uaina māku, mo e hau a fekafekau fifine, mo e fuata ne fakalataha mo e hau a fekafekau, nakai ni nofogati ai ke he mena taha.
20 Ti pehe age e tagata fuakau, Kia monuina a koe, kia tuku mai kia au e tau mena kua nofogati ai a koe, ka e aua neke mohe ai a koe ke he malamalaega.
21 Ti ta mai ai e ia a lautolu ke he hana fale ti fagai ai e ia e tau asini; kua holoholo e lautolu ha lautolu a tau hui, ti kai ai a lautolu mo e inu.
22 Ha ne fakafiafia ai e lautolu ha lautolu a tau loto, kitiala, ko e tau tagata he maga, ko e tau tagata kolokolovao, kua agaagai a lautolu e fale kua tukituki atu ke he gutuhala; kua pehe age a lautolu ke he tagata hana e fale, ko e tagata fuakau haia, Kia ta mai ā e koe kia mautolu e tagata na kua fina atu ke he fale hau, kia iloa e mautolu a ia.
23 Ti hu atu ai e patu he fale kia lautolu, kua pehe age a ia kia lautolu, Aua ia, haku a tau matakainaga na e, aua neke eke e mutolu e mahani kelea ia, ha kua hu mai e tagata nai ke he haku fale, ua eke e mutolu e mena kelea na;
24 Kitiala, ko e haku a tama fifine, ko e tamāfine tote, katoa mo e hana hoana fakahoa, to ta mai e au a laua ki fafo kia mutolu, ke fakakelea atu e mutolu a laua, mo e eke ai e mutolu kia laua e tau mena oti kua loto ki ai a mutolu, ka ko e tagata ia, aua neke eke e mutolu e mena kelea na kia ia.
25 Ka e nakai mafai e tau tagata ke fanogonogo kia ia, ti toto atu ai he tagata hana hoana fakahoa, ti ta age e ia a ia kia lautolu ki fafo; kua iloa e lautolu a ia, mo e eke fakakelea atu e lautolu kia ia ke he po katoa ni; kua hoko ke he pogipogi, kua matafatafa ata e aho ti fakafano atu e lautolu a ia.
26 Ti fina age ai e fifine ke he pogipogi, ke he magaaho mahegihegi ti veli ai a ia ke he gutuhala he fale he tagata ne ha i ai hana iki, kua hoko atu ke he aho.
27 Kua matike hana iki ke he magaaho pogipogi, mo e hafagi e gutuhala he fale, kua hu atu a ia ke fano ai ke he hana fenoga; kitiala, ko e fifine, ko e hoana fakahoa hana kua veli ai ke he gutuhala he fale, mo e hana tau lima ha ha i luga he akau fakalava he gutuhala.
28 Ti pehe age a ia, Matike ā, ke o a tautolu; ka e nakai tali mai ai taha, ti uta e ia a ia, mo e fakaheke ai a ia ki luga he asini, ti matike e tagata mo e fano ke he hana maga.
29 Kua hoko a ia ke he hana fale, ti uta e ia e titipi, ti toto ai e ia hana hoana fakahoa, ti helehele ai e ia a ia katoa mo e hana tau hui motua ke he tau tufaaga ne hogofulu ma ua, ti fakafano atu ai e ia ke he tau fahi oti a Isaraela.
30 Ti pehe age a lautolu kua kitekite ki ai, Nakai eke pihia, to nakai kitia ha mena pehena tali he o hake mai ai e fanau a Isaraela he motu ko Aikupito kua hoko mai ke he aho nai; kia manamanatu ai a mutolu, kia fifili ai e mutolu, ti vagahau mai ai e mutolu.