Tau Fakafili 2:1-23
2 KUA hake e agelu a Iehova i Kilikala ki Pokima, kua pehe atu, Ne ta hake e au a mutolu i Aikupito, ti fakahoko e au a mutolu ke he motu ne omonuo ai au ke he tau matua ha mutolu; ti pehe atu au, Nakai fakahui tukulagi e au haku a maveheaga mo mutolu.
2 Ko mutolu foki, aua neke eke e mutolu ha maveheaga mo lautolu kua nonofo ke he motu nai; kia moumou e mutolu ha lautolu a tau fatapoa; ka e nakai fanogonogo mai a mutolu ke he kupu haku; kua eke e mutolu e mena nai he ha?
3 Ko e mena ia kua pehe atu ai au, Nakai vega e au a lautolu mai mua ha mutolu; ka e eke a lautolu mo tau akau fotofoto ke he ha mutolu a tau kahokaho, to eke foki ha lautolu a tau atua mo hele kia mutolu.
4 Ne vagahau ai e agelu a Iehova e tau kupu oti na ke he fanau oti a Isaraela, ti tagi fakaleo lahi ai e motu.
5 Ti ui ai e lautolu e higoa he mena ia ko Pokima; ti eke ai e lautolu ke he mena ia e poa kia Iehova.
6 Ne fakafano atu e Iosua e motu ke o, ti o ai e fanau a Isaraela, takitaha ke he hana tufaaga ke eke ma lautolu e motu.
7 Ne fekafekau ai e motu kia Iehova ke he tau aho oti a Iosua, mo e tau aho oti he tau patu kua momoui agaia ka kua mate a Iosua, ko lautolu ne iloa e tau gahua lalahi oti ne eke e Iehova ma Isaraela.
8 Ne mate a Iosua ko e tama a Nuno ko e fekafekau a Iehova; ne taha e teau ti hogofulu e tau ne moui ai a ia.
9 Ti tanu e lautolu a ia ke he katofia he hana tufaaga i Timenata-heresa ke he mouga ko Efaraimo ke he fahi tokelau he mouga ko Kaasa.
10 Ne fakalataha atu foki e hau oti ia ke he ha lautolu a tau matua; kua mole atu a lautolu, ti tupu ai e taha hau nakai iloa e lautolu a Iehova mo e tau gahua ne eke ai e ia ma Isaraela.
11 Ti mahani kelea e fanau a Isaraela ki mua a Iehova, mo e fekafekau ai a lautolu kia Paala.
12 Kua tiaki e lautolu a Iehova ko e Atua he tau matua ha lautolu, ne ta mai a lautolu he motu ko Aikupito, ka e mumui atu a lautolu ke he tau atua kehe, ko e tau atua he tau motu ne agaagai mai kia lautolu, kua fakaveveli fakafohifo a lautolu ki ai, mo e fakahogohogomanava atu a lautolu kia Iehova.
13 Kua tiaki e lautolu a Iehova, mo e fekafekau ai a lautolu kia Paala mo Asaira.
14 Ti tupu lahi ai e ita a Iehova kia Isaraela, ti tuku atu e ia a lautolu ke he tau lima he tau tagata fofo mena, ti fofo ai e lautolu ha lautolu a tau mena, ti tuku atu e ia a lautolu ke he tau lima ha lautolu ne fai fi kia lautolu ne agaagai mai kia lautolu; ti nakai maeke a lautolu ke tutu atu ki mua ha lautolu ne fai fi kia lautolu.
15 Ko e tau mena oti foki ne o a lautolu ki ai, ha ha i ai e lima a Iehova ke kelea ai a lautolu, tuga ne vagahau mai ai e Iehova, tuga ne omonuo foki e Iehova kia lautolu; ti matematekelea lahi ai a lautolu.
16 Ti fakatu e Iehova e tau fakafili, ti laveaki mai e lautolu a lautolu he tau lima ha lautolu ne fofo ha lautolu a tau mena.
17 Ka e nakai fanogonogo a lautolu ke he tau fakafili ha lautolu, ka e mumui atu a lautolu ke he tau atua kehe ke faivao ai, ti fakaveveli fakafohifo a lautolu ki ai; kua o kehe vave a lautolu mo e puhala ne o ai e tau matua ha lautolu, ke omaoma ai ke he tau poaki a Iehova; kua nakai eke pihia e lautolu.
18 Ka fakatu e Iehova e fakafili ma lautolu, ti ha ha i ai a Iehova mo e fakafili ia, ti laveaki mai e ia a lautolu he tau lima ha lautolu ne fai fi kia lautolu ke he tau aho oti he fakafili; he tokihala a Iehova ha ko e tauoi ha lautolu, ha ko lautolu ne favale atu mo e fakamamahi atu kia lautolu.
19 Ka kua mate e fakafili, ti liliu a lautolu, ti homo atu ha lautolu a mahani kelea, ke he mahani kelea he tau matua ha lautolu, he mumui atu a lautolu ke he tau atua kehe mo e fekafekau ki ai, mo e fakaveveli fakafohifo a lautolu ki ai. Nakai toka e lautolu ha lautolu a tau mahani mo e ha lautolu a mahani matauka.
20 Ko e tau mena ia ne tupu lahi ai e ita a Iehova kia Isaraela, ti pehe mai a ia, Ha kua holi he motu nai haku a maveheaga ne poaki atu e au ke he tau matua ha lautolu, ti nakai fanogonogo a lautolu ke he haku a tau kupu.
21 Ko e mena ia nakai tuai vega e au ki mua ha lautolu ha tagata he tau motu ne toka e Iosua he mate a ia.
22 Kia kamatamata ai a Isaraela kia lautolu po ke taofi e lautolu ke he puhala a Iehova ke o ai, tuga he taofi ai he tau matua ha lautolu, po ke nakai?
23 Ko e mena ia ne toka ai e Iehova e tau motu na, nakai vega alumaki e ia a lautolu; ti nakai tuku atu e ia a lautolu ke he lima a Iosua.