Tau Fakafili 20:1-48
20 TI o atu ai e fanau oti a Isaraela, mo e faka potopoto ai e fakapotopotoaga kia Iehova, i Misepa, ke tuga ne tagata tokotaha, ne kamata mai i Tano ti hoko atu ki Peresepa katoa mo e magamotu ko Kiliata.
2 Ti tutu ai e tau iki oti he motu, ko e tau magafaoa oti a Isaraela ke he fakapotopotoaga he motu he Atua, ne fa e teau afe tagata, ko e kau ne o kua toto e tau pelu.
3 (Kua logona he fanau a Peniamina, kua o hake e fanau a Isaraela ki Misepa.) Ti pehe atu ai e fanau a Isaraela, Kia tala mai la e koe kia mautolu po ke eke fefe e mena kelea nai?
4 Ti tali mai he tagata he magafaoa a Levi, ko e tane he fifine kua keli, kua pehe mai, Ne o atu a maua mo e hoana fakahoa haku ki Kipeā a Peniamina ke momohe ai;
5 Ti mamatike mai ai kia au e tau tagata Kipea, ti agaagai mai ai a lautolu kia au ke he fale he po; ne manatu e lautolu ke keli au, ka e fakakelea e lautolu haku a hoana fakahoa ti mate ai a ia.
6 Ti toto ai e au haku a hoana fakahoa, mo e helehele e au a ia, ti fakafano atu ai e au, ke he motu oti he tufaaga a Isaraela; ha kua eke ai e lautolu e mahani kelea mo e matahavala ke he motu a Isaraela.
7 Kitiala, ko mutolu oti ko e fanau a Isaraela, kia fakakite mai e mutolu ki hinai ha mutolu a kupu, mo e ha mutolu a pulega.
8 Ti tutu ai e motu oti ke tuga ne tagata tokotaha, kua pehe, Nakai fano taha ia tautolu ke he hana fale ie, to nakai fano foki taha ia tautolu ke he hana fale;
9 Ka ko e hanai, to eke ai e tautolu e mena nai ki Kipeā; to eke e tautolu e vili ke he falu a tagata ke o hake ki ai;
10 To uta e tautolu e tau tagata tokohogofulu mai he tokoteau he tau magafaoa oti a Isaraela, mo e tokoteau mai he taha afe, mo e taha afe e tagata mai he hogofulu e afe, ke uta oho ma e motu; kia eke ai e lautolu ka hoko atu a lautolu ki Kipeā a Peniamina ke lata mo e tau mena kelea oti kua eke e lautolu ke he motu a Isaraela.
11 Ti fakapotopoto ai e tau tagata Isaraela oti ke tau mo e maga; kua loto fakalataha a lautolu ke tuga ne tagata tokotaha.
12 Ti fakafano atu he tau magafaoa a Isaraela e tau tagata ke he magafaoa oti a Peniamina, kua pehe atu, Ko e heigoa kia e mena kelea nai kua eke ai e mutolu?
13 Ko e hanai kia tuku mai a e mutolu e tau tagata kolokolovao ha ha i Kipeā, kia kelipopo ai e mautolu a lautolu, mo e tuku kehe ai e kelea ia Isaraela. Ka e nakai mafai e fanau a Peniamina ke fanogonogo ke he tau kupu he tau matakainaga ha lautolu ko e fanau a Isaraela;
14 Ka kua fakapotopoto ai e fanau a Peniamina i Kipeā mai he tau maga ha lautolu, ke o atu a lautolu ke tau mo e fanau a Isaraela.
15 Ti totou ai e fanau a Peniamina ke he aho ia mai he tau maga ha lautolu, ko e uafulu e afe, ti ono e afe tagata kua toto e tau pelu, katoa mo e tau togata i Kipeā, ne fitu teau e tagata kua homo.
16 Ha i ai ke he tau tagata oti nai e tau tagata hema kua homo, ne tokofitu e teau; ne maeke kia lautolu oti na ke liti maka ke he filo ne liti aki e tau maka, ke he fulu ulu, ti nakai hepe.
17 Ti totou ai e lautolu e tau tagata Isaraela, ka e totou kehe a Peniamina, ne fa e teau afe e tagata kua toto e tau pelu; ko e tau tagata tau a lautolu oti na.
18 Ti tutu a lautolu mo e o hake ki Peteli ke huhu atu ai ke he Atua; kua pehe atu ai e fanau a Isaraela, Ko hai ia mautolu kia ke mumua hake ke tau mo e fanau a Peniamina? Ti pehe mai ai a Iehova, Kia mumua atu a Iuta.
19 Ti tutu ai e fanau a Isaraela ke he aho a pogipogi, kua heapi ai a lautolu fehagai mo Kipeā.
20 Ti o atu ai e tau tagata Isaraela ke tau mo Peniamina; ti tatanaki atu ai e tau tagata Isaraela ke tau mo Kipeā.
21 Ti o atu ai e fanau a Peniamina i Kipeā; ti keli ai e lautolu ia Isaraela ke he aho ia, ko e tau tagata uafulu e afe, ti ua e afe e tagata.
22 Kua fakamalolo e motu, ko e tau tagata Isaraela, ti liliu tatanaki ai a lautolu ke he mena ne tatanaki ai a lautolu ke he aho fakamua.
23 Ti o hake e fanau a Isaraela, mo e tagi ai a lautolu ki mua a Iehova, kua hoko ke he afiafi, mo e huhu a lautolu kia Iehova, kua pehe atu, To liu fakatata atu nakai au ke tau mo e fanau a Peniamina haku a matakainaga? Ti pehe mai ai a Iehova, Kia o hake a mutolu kia ia.
24 Ti fakatata ai e fanau a Isaraela ke he fanau a Peniamina ke he aho ua.
25 Ti fina atu ai a Peniamina i Kipeā ke fonofono a lautolu ke he aho ua; ti liu keli ai e lautolu e fanau a Isaraela, ne hogofulu e afe ti valu e afe e tagata; ko lautolu oti na ne toto e tau pelu.
26 Ti o hake ai e fanau a Isaraela oti mo e motu oti, kia hohoko atu a lautolu ki Peteli, ti tagi ai a lautolu, mo e nonofo ai a lautolu ki mua a Iehova, mo e fakakanopogi ai a lautolu ke he aho ia, kua hoko ke he afiafi; ti eke ai e lautolu e tau poa huhunu katoa mo e tau poa fakaaue ki mua a Iehova.
27 Ti huhu ai he fanau a Isaraela kia Iehova; ha kua ha i ai e puha he maveheaga he Atua ke he tau aho ia;
28 Ko Fineaso ko e tama a Eleasaro, ko e tama a Arona, kua tu ai a ia ki mua hana ke he tau aho ia;) kua pehe atu a lautolu kia ia, To fina atu foki kia au ke tau mo e fanau a Peniamina haku a matakainaga po ke tokai? Ti pehe mai a Iehova kia o hake a mutolu ha ko e mena to tuku atu e au a lautolu ke he lima hau a pogipogi.
29 Ti tatao e tau kau a Isaraela ke agaagai ai ki Kipeā.
30 Ti o hake ai e fanau a Isaraela ke he fanau a Peniamina ke he aho tolu, kua tatanaki atu ke tau ki Kipeā, ke tuga ne aho fakamua.
31 Ti o atu ai e fanau a Peniamina ke fonofono e motu, ti futia mai a lautolu he maga; ti kamata e lautolu ke ta e motu kua keli ai e falu tuga ne tau aho, ko e katoatoa tokai ko e tokotolugofulu e tagata Isaraela ke he tau puhala tu, ne hake ai e taha hala ki Peteli, ka e fina atu ai e taha i Kipeā ke he tutakale.
32 Ti pehe age e fanau a Peniamina kua kelipopo ai a lautolu ki mua ha tautolu tuga ne eke ke he kamataaga; ka e pehe age e fanau a Isaraela Kia fehola a tautolu kia futia mai a lautolu he maga ke he tau puhala tu.
33 Ti mamatike mai ai e tau tagata oti a Isaraela he tau mena ha ha i ai a lautolu, ti tatanaki ai a lautolu ke tau ki Paalatamara, mo e tau kau a Isaraela kua tatao ne feoho mai ai he tau mena ha ha i ai a lautolu ke he fonua i Kipeā.
34 Ti o age ai ke tau mo Kipeā e tau tagata ne hogofulu e afe kua fifili mai ia Isaraela oti, ti lahi mahaki ni e tau; ka kua nakai iloa e lautolu kua hoko mai e malaia kia lautolu.
35 Kua keli ai e Iehova a Peniamina ki mua a Isaraela, kua fakaoti ai he fanau a Isaraela ia Peniamina ke he aho ia, ko e tau tagata ne uafulu e afe ti lima e afe ti taha ni e teau e tagata; ko lautolu oti ia ne toto ai e tau pelu.
36 Ti kitia ai he fanau a Peniamina kua keli ai a lautolu; ha kua tukumuli ai e tau tagata Isaraela ki mua a Peniamina, nukua tua a lautolu ke he tau kau ne kotofa e lautolu ke tatao tata age ki Kipea.
37 Ti alumaki e tau kau ne tatao, ti feoho atu a lautolu ki Kipeā; kua fofola ai e tau kau ne tatao, ti keli ai e lautolu e maga oti ke he pelu.
38 Na fai fakamailoga kua kotofa ke he tau tagata Isaraela mo e tau kau ne tatao; ke fakapuho hake ai e lautolu e afi lahi, mo e ahua mai he maga.
39 Kua liu ki tua e tau tagata Isaraela ke he tau; ti kamata ai a Peniamina ke keli a lautolu; ko e katoatoa he tau tagata Isaraela ne keli tokai ko e tokotolugofulu e tagata; ha kua pehe age a lautolu, Ko e moli kua kelipopo ni a lautolu ki mua ha tautolu, tuga ne tau fakamua.
40 Kua kamata ke hake ai e puho he afi mai he maga, ko e ahua fakatupou, ti haga ki tua a Peniamina, kitiala, kua hake ke he lagi e puho he afi mai he maga oti.
41 Kua liliu atu e tau tagata Isaraela ti ofomate ai e tau tagata Peniamina; ha kua kitia e lautolu kua hoko kia lautolu e malaia.
42 Ti liliu ai a lautolu ki mua he tau tagata Isaraela ke he puhala ke he tutakale; ka kua pipiki atu e tau kia lautolu; ko e faoa he tau maga kua fakaoti ai e lautolu a lautolu ke he vaha loto ha lautolu.
43 Kua agaagai e lautolu a Peniamina, mo e tutuli e lautolu a lautolu, mo e taholi e lautolu a lautolu, ko e mena maekevave ia kia lautolu, ke hoko ni ki Kipeā, ke he fahi kua hake ai e la.
44 Kua keli ai ia Peniamina e tau tagata ne hogofulu e afe ti valu e afe; ko e tau tagata toa a lautolu oti na.
45 Ti tafilu ai a lautolu mo e fehola a lautolu ke he tutakale ke he maka ko Rimoni; ti fakaotioti ai e lautolu ke he tau puhala tu e tau tagata ne lima e afe; kua tutuli e lautolu a lautolu he hoko atu ki Kitoma, mo e keli ai e lautolu e tau tagata ne ua e afe.
46 Ko e tau tagata oti ne keli ia Peniamina ke he aho ia, ne uafulu e afe ti lima e afe e tagata ne toto e tau pelu; ko e tau tagata toa a lautolu oti na.
47 Ka ko e tau tagata toko ono e teau ne tafilu a lautolu, mo e fehola ke he tutakale ke he maka ko Rimoni; ti nonofo ai a lautolu ke he maka ko Rimoni ke he tau mahina ne fa.
48 Ti liliu atu e tau tagata Isaraela ke he fanau a Peniamina, mo e keli ai e lautolu ke he pelu e tau tagata he tau maga, katoa mo e tau manu, mo e tau mena oti ne moua ai e lautolu; ti huhunu ai e lautolu ke he afi e tau maga oti ne hohoko ki ai a lautolu.