Tau Fakafili 21:1-25
21 KUA omonuo ai he tau tagata Isaraela i Misepa, kua pehe, Nakai age he taha ia tautolu hana tamafine ke eke mo hoana ke he tagata Peniamina.
2 Ti hoko atu e motu ki Peteli, ti nonofo ai a lautolu ki mua he Atua kua hoko ke he afiafi. Ti tagi fakalahi ai a lautolu mo e leo lahi.
3 Kua pehe atu a lautolu, Iehova na e, ko e Atua a Isaraela, ko e ha kua hoko mai ai e mena nai kia Isaraela, ke galo ai ke he aho nai taha magafaoa a Isaraela?
4 Kua hoko ke he aho a pogipogi ti uhu matike e motu, ti ati ai e lautolu ke he mena ia e fatapoa, mo e eke ai e lautolu e tau poa huhunu mo e tau poa fakaaue.
5 Ti pehe age e fanau a Isaraela, Ko hai kia he tau magafaoa oti a Isaraela nakai o hake kia Iehova ke he fakapotopotoaga? ha kua omonuo fakamamafa ai e lautolu ke he tagata ke nakai hake kia Iehova i Misepa, ne pehe, Kia kelipopo e lautolu a ia.
6 Ti tokihala ai e fanau a Isaraela ha ko Peniamina ha lautolu a matakainaga, kua pehe age, Kua vevehe kehe ai ke he aho nai taha magafaoa ia Isaraela;
7 Ko e heigoa kia e mena ke eke e tautolu ke moua ai e tautolu e tau hoana ma lautolu ne toe? ha kua omonuo ai e tautolu kia Iehova, ke nakai age e tautolu ha tautolu a tau tama fifine ke eke mo tau hoana ha lautolu.
8 Ti pehe age a lautolu, Ko hao kia taha he tau magafaoa a Isaraela nakai o hake kia Iehova i Misepa? Kitiala, nakai hau taha ke he heaga api ke he fakapotopotoaga i Iapesa-Kiliata.
9 Ti totou ai e lautolu e tau tagata; kitiala, nakai hau ai ha tagata ia lautolu kua nonofo i Iapesa-Kiliata.
10 Ti fakafano atu he fakapotopotoaga ke he mena ia e tau tagata ne hogofulu ma ua e afe, ko e tau toa; kua poaki age e lautolu kia lautolu kua pehe age, Kia o ā mutolu, ti keli ai e mutolu ke he pelu a lautolu kua nonofo i Iapesa-Kiliata, ko e tau fifine katoa mo e tau tama ikiiki;
11 Ti eke ai e mutolu e mena nai, Ko e tau tane oti, mo e tau fifine oti kua iloa ha tane, kia fakaoti ai e mutolu a lautolu.
12 Ti moua ai e lautolu ia lautolu ne nonofo i Iapesa-Kiliata e tau tama fifine ne tokofa e teau, ko e tau tamāfine tote kua nakai iloa ha tane; ti ta mai ai e lautolu a lautolu ke he heaga api i Sailo ke he motu ko Kanana.
13 Ti fakafano atu ai he fakapotopotoaga oti e falu, kua vagahau ai a lautolu mo e fanau a Peniamina ke he maka ko Rimoni, ti ui atu ai e lautolu kia lautolu, kua mafola tuai.
14 Ti liu mai ai a Peniamina ke he vaha ia, ti ta age ai e lautolu kia lautolu e tau hoana ne fakamoui mai ai e lautolu he tau fifine i Iapesa-Kiliata; ka e nakai igatia ai a lautolu.
15 Ti tokihala ai e motu ha ko Peniamina; ha kua moumou e Iehova e tau magafaoa a Isaraela, ha kua galo tuai taha magafaoa.
16 Ti pehe age e tau patu he fakapotopotoaga, Ko e heigoa kia e mena ke eke e tautolu ma lautolu ne toe, ke moua ai e tau hoana, ha kua fakaotioti ai e tau fifine a Peniamina?
17 Ti pehe age a lautolu, Kia eke ai e tautolu e tufaaga ma lautolu ia Peniamina kua hao, kia nakai holoholo kehe ai e magafaoa a Isaraela.
18 Ka ko tautolu, nakai maeke kia tautolu ke age e tau hoana ma lautolu mai he tau tama fifine ha tautolu, ha kua omonuo ai he fanau a Isaraela, kua pehe, Kia malaia a ia kua age e hoana kia Peniamina.
19 Ti pehe age ai a lautolu, Kitiala, kua eke ai e galue kia Iehova ke he taha tau mo e taha tau i Sailo, ha ha i ai ke he fahi tokelau a Peteli, ke he fahi uta he puhala tu kua hake mai i Peteli ki Sikema, mo e fahi toga a Lepona.
20 Ti poaki atu a lautolu ke he fanau a Peniamina, kua pehe atu, Kia o ā mutolu, ke takahao ai ke he tau uluvine;
21 Mo e kitekite a mutolu; kitiala, kaeke ke o atu e tau tamafifine Sailo ke koli, ti o atu ai a mutolu he tau uluvine, mo e toho mai e mutolu takitaha e hoana hana he tau tamafifine Sailo, ti o a mutolu ke he motu a Peniamina;
22 Kaeke foki ke o mai kia mautolu e tau matua tane ha lautolu, po ke tau tugane ha lautolu, ke tagi mai kia mautolu, to pehe age a mautolu kia lautolu, Kia fakaalofa a mutolu kia lautolu ha ko mautolu, he nakai fakahao e mautolu falu a fifine ke he tau, kia igatia e tagata mo e hana hoana; ko e mena nakai age foki e mutolu ha mutolu a tau tamafifine kia lautolu ke he vaha nai, kia nonofo ai a mutolu mo e hala.
23 Ti eke pihia he fanau a Peniamina, kua uta hoana e lautolu ma lautolu ia lautolu ne koli, kua fofo ai e lautolu fakalata ma lautolu; ti o a lautolu, mo e liliu atu ai a lautolu ke he motu ha lautolu, mo e ati ai e lautolu ha lautolu a tau maga, mo e nonofo ai a lautolu.
24 Ti o ai e fanau a Isaraela ke he na aho ia he mena na, takitaha ke he hana faoa mo e hana magafaoa; kua o kehe a lautolu he mena ia takitaha ke he hana tufaaga.
25 Nakai fai patuiki a Isaraela ke he vaha ia, kua takitaha e tagata mo e eke ke lata mo e hana ni a manatu.