Tau Fakafili 3:1-31
3 KO e tau motu nai ne toka e Iehova ke kamatamata ai e lautolu kia Isaraela, ko lautolu oti nakai iloa e tau tau oti i Kanana.
2 Ko e mena nai hokoia ke iloa ai he tau hau he fanau a Isaraela ke fakaako tau kia lautolu, ko lautolu ni nakai iloa fakamua;
3 Ko e tau iki toko lima he tau tagata Filisitia, mo e tau tagata Kanana oti, mo e tau tagata Saitonu, mo e tau tagata Hivi ne nonofo ke he mouga ko Lepanona, mai he mouga ko Paala-heremoni ke hoko atu ke he mena ne fina atu ai ki Amato.
4 Ne ha i ai a lautolu kia kamatamata e lautolu kia Isaraela, ke iloa ai e lautolu po ke fanogonogo nakai a lautolu ke he tau poaki a Iehova ne poaki mai ai e ia kia Mose ke he tau matua ha lautolu.
5 Ne nonofo e fanau a Isaraela fakalataha mo e tau tagata Kanana, ko e tau tagata Heti, mo e tau tagata Amori, mo e tau tagata Perisi, mo e tau tagata Hivi, mo e tau tagata Iepusi.
6 Ti faihoana ai a lautolu ke he tau tama fifine ha lautolu; ti age e lautolu ha lautolu a tau tama fifine ke eke mo tau hoana he tau tama tane ha lautolu, ti fekafekau ai a lautolu ke he tau atua ha lautolu.
7 Ti mahani kelea e fanau a Isaraela ki mua a Iehova; ti nimo ia lautolu a Iehova ha lautolu a Atua, ka e fekafekau ai a lautolu kia Paala mo Asaira.
8 Ko e mena ia ne tupu lahi ai e ita a Iehova kia Isaraela, ti tuku atu e ia a lautolu ke he lima a Kusa-risataima, ko e patuiki i Mesopotamia; ti fekafekau ai e fanau a Isaraela kia Kusa-risataima ke he tau tau ne valu.
9 Ti tagi atu e fanau a Isaraela kia Iehova, ti fakatu ai e Iehova e tagata ke laveaki e fanau a Isaraela, ti fakamomoui ai e ia a lautolu, ko Otinielu haia ko e tama tane a Kenasa, ko e tehina a Kalepa.
10 Ne ha i luga ia ia e Agaga a Iehova, ti fakafili ai e ia a Isaraela; ti fina atu a ia ke tau ti tuku mai ai e Iehova ke he hana lima a Kusa-risataima ko e patuiki i Mesopotamia; ti kautu a ia kia Kusa-risataima.
11 Ti okioki ai e motu ke he tau tau ne fagofulu. Ti mate ai a Otinielu ko e tama a Kenasa.
12 Ti liu foki mahani kelea e fanau a Isaraela ki mua a Iehova, ti fakamalolo ai e Iehova a Ekelona ko e patuiki a Moapi ke tau mo Isaraela, ha kua mahani kelea a lautolu ki mua a Iehova.
13 Ne fakapotopoto age kia ia e fanau a Amoni mo Amaleka; ti fina atu a ia mo e keli a Isaraela, ti eke e lautolu ma lautolu e maga he tau pama.
14 Ti fekafekau ai e fanau a Isaraela kia Ekelona ko e patuiki a Moapi ke he tau tau ne hogofulu ma valu.
15 Ka kua tagi atu e fanau a Isaraela kia Iehova, ti fakatu ai e Iehova e tagata ke laveaki a lautolu, ko Ehuta ia ko e tama a Kera ko e tagata he magafaoa a Peniamina, ko e tagata hema a ia; ti fakafano atu he fanau a Isaraela a ia mo e mena fakaalofa ke he patuiki a Moapi ko Ekelona.
16 Ne taute e Ehuta māna e pelu matila fakafahiua ko e hana loa ko e taha e kupita, ti pipi ai e ia ki lalo he tapulu hana ke he hana hui matau.
17 Ti uta ai e ia e mena fakaalofa kia Ekelona ko e patuiki a Moapi; ko e tagata lahi mahaki a Ekelona.
18 Kua oti tuai e tau mena fakaalofa he age e ia kia Ekelona ko e patuiki a Moapi, ti faka fano atu e ia e moto tagata ne ta mai ai e mena fakaalofa,
19 Ka e liu mai a ia he mena ne toka ai e tau tupua kua ta i Kilikala. Ti pehe age a ia, Ko e patuiki na e, ha ha ia au e kupu ke tala atu fufu kia koe. Ti pehe age a ia, Kia fakanonono a. Ti o oti ia ia a lautolu oti ne tutu mai kia ia.
20 Ti fina age a Ehuta kia ia, ne nofo ai a ia ke he hana fale fakahauhau i luga, ne eke māna tokotaha, ti pehe age a Ehuta, Ha ha ia au e fekau mai he Atua kia koe; ti matike mai a ia he nofoa.
21 Ti fakaolo e Ehuta hana lima hema mo e toto mai e pelu ha he hui matau hana, ti hoka aki e ia a ia ke he hana manava.
22 Ne komo ai e kalihe katoa mo e pelu, ti kati ai e gako he manava, ti nakai maeke ke aki mai e pelu he manava hana, kua ati ai ke he nofoaga.
23 Ti hu atu a Ehuta ke he fakamaluaga, ti pa ai e ia e tau gutuhala he fale i luga ki tua hana mo e fakamau ai e ia.
24 Kua hu atu a ia, ti o age ai hana tau fekafekau; ti kitia e lautolu, kitiala, kua fakamau ai e tau gutuhala he fale; ti pehe age ai a lautolu, Na kua ufiufi ni e ia hana tau ve ke he fale fakahauhau.
25 Ti tatali ai a lautolu ati ma na lautolu; kitiala, nakai vevete e ia e tau gutuhala he fale i luga, ti uta e lautolu e kei mo e vevete aki; kitiala, kua to hifo ke he kelekele ha lautolu a iki, kua mate tuai a ia.
26 Ne hola a Ehuta ka e tatali agaia a lautolu; ne mole atu ki tua hana e tau tupua kua ta, ti hao atu a ia ki Seirata.
27 Kua hoko atu a ia, ti ulo ai e ia e pu ke he mouga ko Efaraimo; ti o hifo mai he mouga fakalataha mo ia e fanau a Isaraela, ti mua atu a ia kia lautolu.
28 Ti pehe age a ia kia lautolu, Kia mumui mai a mutolu kia au; ha kua tuku mai e Iehova a lautolu kua fai fi kia mutolu, ko e tau tagata Moapi ke he tau lima ha mutolu. Ne mumui hifo a lautolu kia ia, ti moua ai e lautolu e hala potaki a Ioritana ne fina atu ai ki Moapi; ti nakai toka e lautolu ha tagata taha ke fina atu ai.
29 Ti keli e lautolu ke he aho ia e tau tagata Moapi tokai ko e hogofulu e afe tagata, ko e tau tagata lalahi to toa a lautolu oti ni, ti nakai hao ha tagata taha.
30 Ne fakatokolalo ai a Moapi ke he aho ia ke he lima a Isaraela. Ti okioki ai e motu ke he tau tau ne valugofulu.
31 Kua mole atu e tau mena ia ti nofo ai a Samekara ko e tama a Anato, ti keli ai e ia e tau tagata Filisitia ne ono e teau ke he mena ne huki aki e tau povi; ti laveaki foki e ia a Isaraela.