Tau Fakafili 4:1-24
4 KUA mate a Ehuta; ti liu foki mahani kelea a Isaraela ki mua a Iehova.
2 Ti tuku atu ai e Iehova a lautolu ke he lima a Iapino ko e patuiki a Kanana ne pule a ia i Hasora; ka ko e takitaki kau hana ko Sisera haia, ne nofo a ia i Haroseta ko e motu kehe.
3 Ti tagi atu e fanau a Isaraela kia Iehova; ha kua ha ia ia e tau kariota lapatoa ne hiva e teau; ti vale lahi atu a ia ke he fanau a Isaraela ke he tau tau ne uafulu.
4 Ko Taporā ko e perofeta fifine, ko e hoana a Lapatota, ne fakafili ai e ia a Isaraela ke he vaha ia.
5 Ne nofo a ia i lalo he pama a Taporā ke he vaha loto a Rama mo Peteli, ke he mouga ko Efaraimo; ti o hake e fanau a Isaraela kia ia ke fakafili ai a lautolu.
6 Ti fakafano atu e ia mo e ui atu kia Parako ko e tama a Apinoamo mai Katesanafatali; ne pehe atu a ia kia ia, Nakai kia poaki mai e Iehova ko e Atua a Isaraela, ke fano a koe mo e takitaki e kau ke he mouga ko Tapora, ti uta ai e koe fakalataha mo koe hogofulu e afe tagata he fanau a Nafatali mo e fanau a Sepulona?
7 To takitaki atu foki e au kia koe ke he vailele ko Kisona, a Sisera ko e takitaki kau a Iapino, mo e hana tau kariota, katoa mo e hana kau; to tuku atu foki e au a ia ke he hau a lima.
8 Ti pehe mai a Parako kia ia, Kaeke ke o a taua mo koe, ti fano au; kaeke ke nakai o a taua mo koe, ti nakai fano au.
9 Ti pehe atu a ia, To o ni a taua mo koe, ka e nakai tuai lilifu a koe ke he mena ke fano ai a koe; ha ko e mena to tuku ai e Iehova a Sisera ke he lima he fifine. Kua matike a Taporā ti o ai a laua mo Parako ki Katesa.
10 Ti fakapotopoto ai e Parako a Sepulona, mo Nafatali ki Katesa; ti o hake a ia katoa mo e hogofulu e afe tagata ne mumui atu kia ia; ti o hake ai foki a laua mo Taporā.
11 Ko Kaveru foki ko e tagata Keni, he fanau a Hopapo ko e matua fugavai a Mose, ne vevehe mai e ia mo e tau tagata Keni, ti fakatu ai e ia hana fale ie tata age ke he aluna i Saanaima, ha ha i Katesa haia.
12 Kua tala age foki a lautolu kia Sisera, kua hake a Parako ko e tama a Apinoamo ke he mouga ko Taporā.
13 Ti fakapotopoto ai e Sisera hana tau kariota oti, ko e tau kariota lapatoa ne hiva e teau, katoa mo e motu oti ne o mo ia, mai Haroseta ko e motu kehe ke hoko atu ke he vailele ko Kisona.
14 Ti pehe atu a Taporā kia Parako, Kia matike ā koe, ha ko e aho nai ke tuku atu ai e Iehova a Sisera ke he lima hau; nakai kia mua atu a Iehova kia koe? Ti hifo ai a Parako he mouga ko Taporā, katoa mo e hogofulu e afe tagata ne mumui atu kia ia.
15 Ti fakamavehevehe ai e Iehova a Sisera, mo e hana tau kariota oti, mo e kau oti ni ke he pelu ki mua a Parako; ti hifo mai a Sisera he hana kariota, mo e hola ke he hana tau hui.
16 Ka e tutuli atu a Parako ke he tau kariota mo e kau, kua hoko ni ki Haroseta, ko e motu kehe; kua mamate ai e kau oti a Sisera ke he pelu; nakai ni toe taha.
17 Ka ko Sisera ne hola a ia ke he hana tau hui ke he fale ie a Iaeli ko e hoana a Kaveru ko e tagata Keni; ha kua nonofo mo e mafola a Iapino ko e patuiki a Hasora mo e magafaoa a Kaveru ko e tagata Keni.
18 Ti fano ai a Iaeli ke fonofono a Sisera, kua pehe age a ia, Ko e iki na e, kia afe mai a, kia afe mai a koe kia au, aua neke matakutaku a koe. Ti afe age a ia kia ia ke he fale ie, ti fakakafu ai he fifine ia a ia ke he ie kafu.
19 Ti pehe age a ia kia ia, Kia ta mai e koe e maga vai tote kou inu; ha kua fia inu au. Ti vevete ai e ia e lupo kili manu puke huhu, mo e age kia ia ke inu ai; ti kafu ai a ia.
20 Ti pehe age foki a ia, Kia tu ai a koe ke he gutuhala he fale ie; kaeke ke hau ai e taha ke huhu atu kia koe, mo e pehe atu, Ne nofo nakai ha tagata i hinā? ti pehe age a koe, Nakai.
21 Ti toto ai e Iaeli e hoana a Kaveru e fao he fale ie, kua uta foki mo e hamala ke he hana lima, ti fina atu fakatekiteki ai a ia, ti pao ai e ia e fao ke he hana ofoofo ti ati hifo ai ke he kelekele; ha kua pulumohea a ia he mategugu; ti mate ai a ia.
22 Kitiala foki, kua tutuli mai e Parako a Sisera, ti fano ai a Iaeli ke feleveia mo ia, kua pehe age kia ia, Hau a, to fakakite atu e au kia koe e tagata ne kumi e koe. Ti fina age ai a ia, kitiala, kua takaveli ai a ia, kua mate, ha ha i ai foki e fao ke ke hana ofoofo.
23 Ko e aho ia ne fakatokolalo ai he Atua e patuiki a Kanana ko Iapino ki mua he fanau a Isaraela.
24 Ti kautu ai e lima he fanau a Isaraela, kua mamafa ni ke he patuiki a Kanana ko Iapino, ato fakaoti ai e lautolu a Iapino ko e patuiki a Kanana.