Tau Fakafili 7:1-25
7 TI uhu matike a Ierupaala, ko Kiteona haia, mo e motu oti ne fakalataha mo ia, ti heapi ai a lautolu tata age ke he vaipuna i Harota; ha i ai e kau a Mitiana ke he fahi tokelau ia lautolu, ne tata age ke he mouga ko Morē ke he pahua.
2 Ti pehe mai a Iehova kia Kiteona, kua tokologa e motu ha ha ia koe ke tuku atu e au a Mitiana ke he tau lima ha lautolu, neke hula ai a Isaraela, ki mua haku kua pehe mai, Ko e haku lima ni kua moui ai au.
3 Ko e hanai, kia ui atu a koe ke he motu ke logona ai e lautolu, kia pehe atu, Ko lautolu kua matakutaku mo e vivivivi, kia liliu atu a lautolu, ti o atu ai a lautolu he mouga ko Kiliata. Ti liliu atu ai he motu uafulu e afe ti ua e afe tagata, ka e toe hogofulu e afe tagata.
4 Ti pehe mai ai a Iehova kia Kiteona, kua tokologa agaia e motu; kia ta hifo e koe a lautolu ke he vai, to kamatamata ai e au a lautolu māu ke he mena ia; ko ia ke pehe atu ai au, Kia o ā mua mo e tagata nai, ti o ai a mua mo ia; ko ia foki ke pehe atu ai au, Aua neke o a mua mo e tagata na, ti ua fano a ia.
5 Kua ta hifo e ia e motu ke he vai, ti pehe mai a Iehova kia Kiteona, Ko lautolu oti ke inu pipi e vai ke he tau alelo ha lautolu, tuga ne epoepo ai he kuli, kia tuku atu e koe a lautolu hoko lautolu; ti pihia foki a lautolu oti kua fakatokotui ke inu aufo.
6 Ti totou a lautolu ne ta hake e tau lima ha lautolu ke he tau gutu ha lautolu, mo e inu pipi ne tolu e teau tagata; ka ko e motu oti ne toe ne fakatokotui a lautolu ke he vai, mo e inu aufo.
7 Ti pehe mai a Iehova kia Kiteona, To fakamoui e au a mutolu ke he tau tagata ne tolu e teau ne inu pipi, mo e tuku atu ai e au a Mitiana ke he lima hāu; ka ko e motu oti ne toe, kia takitaha mo e fano ke he hana mena ke nofo ai.
8 Ti uta ai he motu e oho ke he tau lima ha lautolu, mo e ha lautolu a tau pu ke ulo; ti fakafano atu e ia e tau tagata Isaraela ne toe, ke takitaha mo e fano ke he hana fale ie; ka e taofi ai e ia e tau tagata tolu teau e tagata; ha i lalo hana foki ke he pahua e heaga api a Mitiana.
9 Ko e po ia ne pehe atu ai a Iehova kia ia, Kia matike a koe, mo e hifo atu a ke he heaga api; ha kua tuku atu e au a lautolu ke he lima hau.
10 Kaeke foki ke matakutaku a koe ke hifo; ti o hifo ai a mua mo e fekafekau hau ko Pura ke he heaga api;
11 To logona e koe e tau mena kua fevagavagahauaki ai a lautolu; ka mole ia ti malolo ai a koe ke hifo ke he heaga api. Ti o hifo a laua mo e hana fekafekau ko Pura ke he maga kau ha ha he fahi mai nai he heaga api.
12 Kua tatakoto ai ke he pahua, a Mitiana, mo Amaleka, katoa mo e tau tagata oti mai he fahi uta, kua tuga ne tau hē he tokologa; ko e tau kamela ha lautolu foki nakai maeke he totou, kua tuga ne tau oneone ke he mataafaga, he loga.
13 Kua hoko atu a Kiteona, kitiala, ko e tagata ha ne talahau ai hana miti ke he taha tagata; Kitiala, kua miti ni e au; kitiala, kua taveli mai taha areto karite pukupuku ke he heaga api a Mitiana, kua hoko ke he taha fale ie, kua lauia ai, ti veli ai, kua mafuluhi ki lalo, ti takaveli ai e fale ie.
14 Ti tali mai ai e taha, Nakai ko e mena kehe hanai ka ko e pelu a Kiteona ko e tama a Ioasa ko e tagata Isaraela; kua tuku atu ai he Atua ke he hana lima a Mitiana mo e hana kau oti.
15 Kua logona e Kiteona e tala ke he miti mo e hana fakamatalaaga, ti fakaveli fakafohifo ai a ia ki mua he Atua. Ti liu atu a ia ke he kau a Isaraela, ti pehe age a ia, Kia tutu a, ha kua tuku mai e Iehova e kau a Mitiana ke he tau lima ha mautolu.
16 Ti vevehe e ia e tau tagata ne tolu e teau ke la tolu e kau; ti age ai e ia e tau pu ke he tau lima ha lautolu oti, mo e tau gati vai, mo e tau hulu ki loto he tau vai.
17 Ti pehe age a ia kia lautolu, Kia kitekite mai a mutolu kia au, mo e fifitaki ai ni; kitiala foki, ka hoko atu au ke he fahi mai nai he heaga api, ti eke ai e mutolu tuga he eke e au.
18 Ka ulo e mautolu e tau pu, ko au mo lautolu oti ha ha ia au, ti ulo foki e mutolu ha mutolu a tau pu ke takai ai e heaga api oti, mo e pehe age a mutolu Ko Iehova, mo Kiteona.
19 Ti hoko atu a Kiteona mo e tau tagata tokoteau ne fakalataha mo ia ke he fahi mai nai he heaga api, ke he kamataaga he leoleoaga tuloto he tau veveheaga he po; kua totogi fou e kau leoleo; ti ulo ni e lautolu e tau pu, mo e fela ai e tau vai ha ha he tau lima ha lautolu.
20 Ti ulo ai he tau la kau ne tolu e tau pu, mo e lipilipi ai e lautolu e tau vai, kua toto foki e lautolu e tau hulu ke he tau lima hema ha lautolu, ka ko e tau pu ke he tau lima matau ha lautolu ke ulo ai; ti kalaga atu ai a lautolu. Ko e pelu a Iehova mo Kiteona.
21 Ti tutu ai a lautolu takitaha ke he mena ha i ai a ia ne takai ai e heaga api; ti tafepoi ai e kau oti, kua kalaga a lautolu, ti fehola ni a lautolu.
22 Ti ulo ai he tau tagata tolu e teau e tau pu, ti fakahoko atu e Iehova e pelu he taha tagata ke he taha ke he kau oti; ti fehola e kau ki Pete-sita i Sirerata, kua hoko atu ke he tau katofia a Apela-mehola, ne tata age ki Tapata.
23 Ti tolo ai e tau tagata Isaraela mai Nafatali, mo Asera, mo Manase oti, ti tutuli e lautolu a Mitiana.
24 Ti fakafano atu e Kiteona e tau ogo ke he mouga oti ko Efaraimo kua pehe age, Kia o hifo a mutolu ke hehele a Mitiana, kia mumua atu a mutolu kia lautolu, mo e moua ai e mutolu e vai ke hoko atu ki Petapara mo Ioritana. Ti fakapotopoto ai e tau tagata oti a Efaraimo, mo e moua ai e lautolu e vai ke hoko atu ki Petapara mo Ioritana.
25 Ti moua ai e lautolu e tau iki Mitiana ne tokoua ko Orepa mo Seepa; ti keli ai e lautolu a Orepa ki luga he maka ko Orepa, ka e keli e lautolu a Seepa ke he holiaga vine a Seepa; ti tutuli e lautolu a Mitiana. Ti uta e lautolu e tau ulu a Orepa, mo Seepa kia Kiteona ke he fahi atu a Ioritana.