Tau Fakafili 9:1-57
9 TI fina age ai a Apimeleko ko e tama a Ierupaala ki Sikema ke he tau tugane he hana matua fifine, ti vagahau a ia mo lautolu katoa mo e magafaoa oti he matua tane he hana matua fifine, kua pehe age.
2 Kia vagahau atu a a mutolu ke logona ai he tau tagata Sikema oti, po ke mena fe kua mitaki kia mutolu, ke pule kia mutolu e tau tama tane oti a Ierupaala ko e tau tagata tokofitugofulu haia, po ke pule kia mutolu e tagata tokotaha? kia manatu foki e mutolu, ko au nai ko e tau hui motua ha mutolu mo e kakano ha mutolu.
3 Ti vagahau ai he tau tugane he hana matua fifine e tau kupu oti na kia ia, ke he tau tagata Sikema oti; ti hagao atu ai e tau loto ha lautolu kia Apimeleko, ha kua pehe age a lautolu, Ko e ha tautolu a matakainaga a ia.
4 Ti age e lautolu kia ia fitugofulu e tupe mai he fale a Paala-perita, ti totogi ai e Apimeleko e tau tagata fakateaga mo e matahavala, ti mumui age ai a lautolu kia ia.
5 Ti fano a ia ke he magafaoa he hana matua tane ki Ofera, ti kelipopo ai e ia ki luga he maka taha hana tau matakainaga, ko e tau tama a Ierupaala ne tokofitugofulu e tagata, ka e toe a Iotama ko e tama fakamui a Ierupaala he fakamumuli a ia.
6 Ti fakapotopoto ai e tau tagata Sikema oti, katoa mo e magafaoa oti a Milo; ti o a lautolu mo e kotofa ai e lautolu a Apimeleko ke eke mo patuiki ke he mena ne tu ai e aluna i Sikema.
7 Ti talahau ai e mena ia kia Iotamo; ti fina age ai a ia mo e tu he tapunu mouga ko Keresema, ti fakaleo lahi a ia, mo e ui, kua pehe age a ia kia lautolu, Kia fanogonogo mai a mutolu, ko e tau tagata Sikema na e, kia fanogonogo mai ai e Atua kia mutolu.
8 Ne o atu e tau akau ke fakauku ai e patuiki ma lautolu; ti pehe atu a lautolu ke he olive, Kia eke a koe mo patuiki ha mautolu.
9 Ka e pehe mai e olive kia lautolu, Ke toka kia e au haku a lolo, ko e mena kua fakalilifu atu ai e lautolu ke he Atua katoa mo e tau tagata, ke fina atu ai au ke pule ke he tau akau.
10 Ti pehe atu e tau akau ke he mati, Kia hau a a koe ke eke mo patuiki ha mautolu.
11 Ka e pehe mai e mati kia lautolu, Ke toka kia e au haku a humelie, mo e haku a tau fua mitaki, ke fina atu ai au ke pule ke he tau akau?
12 Ti pehe atu e tau akau ke he vine, Kia hau a a koe, ke eke mo patuiki ha mautolu.
13 Ka e pehe mai e vine kia lautolu, Ke toka kia e au haku a uaina, ko e mena ne fakafiafia ai e Atua katoa mo e tau tagata, ke fina atu ai au ke pule ke he tau akau?
14 Ti pehe atu ai e tau akau oti ke he akau mahukihuki, Kia hau a a koe ke eke mo patuiki ha mautolu.
15 Ti pehe mai ai e akau mahukihuki ke he tau akau, Kaeke ke fakamoli a mutolu ke fakauku ai e mutolu au ke eke mo patuiki ha mutolu, ati o mai a a mutolu, ke tua mai a mutolu ke he haku a malu; ka nakai, ti fina atu ai e afi mai he akau mahukihuki, mo e fakaoti ai e tau arasi a Lepanona.
16 Ko e hanai kaeke kua eke ai e mutolu e mena nai mo e fakamoli mo e mahani hako, kua kotofa ai e mutolu a Apimeleko mo patuiki; kaeke foki kua eke fakamitaki atu a mutolu kia Ierupaala mo e hana magafaoa, mo e eke e mutolu kia ia ke lata mo e tau mena ne eke ai e ia;
17 Ha ko e mena tau haku a matua tane ha ko mutolu, ti tuku lele atu e ia hana moui kia laveaki mai a mutolu he lima a Mitiana;
18 Ha kua tutu mai a mutolu ke he aho nai ke he magafaoa he haku matua tane, mo e kelipopo ai e mutolu hana tau tama tane, ko e tau tagata tokofitugofulu, ki luga he maka taha; ti eke ai e mutolu a Apimeleko ko e tama he hana fekafekau fifine mo patuiki he tau tagata Sikema, ha ko e matakainaga ha mutolu a ia.
19 Kaeke kua eke e mutolu mo e fakamoli mo e mahani hako kia Ierupaala mo e hana magafaoa ke he aho nai, ti fiafia ai a mutolu kia Apimeleko, ti fiafia foki a ia kia mutolu;
20 Ka nakai kia fina atu ai e afi ia Apimeleko ke fakaoti ai e tau tagata Sikema mo e magafaoa a Milo; kia fina atu foki e afi mai he tau tagata Sikema mo e magafaoa a Milo ke fakaoti ai a Apimeleko.
21 Ti alumaki a Iotamo, kua hola a ia, ti fina atu a ia ki Peeri, ti nofo ai a ia ha ko e hana matakainaga ko Apimeleko.
22 Ne pule a Apimeleko kia Isaraela ke he tau tau ne tolu;
23 Ti tuku atu ai he Atua e loto kelea kia Apimeleko mo e tau tagata Sikema; ti fakavai ai he tau tagata Sikema a Apimeleko;
24 Kia hoko kia ia e favale hana ne favale ai a ia ke he tau tama tane a Ierupaala ne tokofitugofulu, mo e taui ha lautolu a toto kia Apimeleko ha lautolu a matakainaga, ne kelipopo a lautolu, katoa mo e tau tagata Sikema ne lagomatai kia ia ke keli hana tau matakainaga.
25 Ti kotofa ai he tau tagata Sikema falu ke takahao kia ia ke he tapunu mouga; ti fofo e lautolu e tau mena ha lautolu oti ne o age ai ke he puhala kia lautolu; ti talahua atu e mena ia kia Apimeleko.
26 Ti o mai ai a Kaala ko e tama tane a Epeto mo e hana tau matakainaga, ti o atu a lautolu ki Sikema; ti tua kia ia e tau tagata Sikema.
27 Ti o a lautolu ke he fonua ti faki e lautolu e tau fua he tau ulu vine ha lautolu, kua taholi foki e lautolu e tau fua vine, ti lologo fiafia a lautolu; ti o atu a lautolu ke he faituga he atua ha lautolu, kua kai a lautolu mo e inu a lautolu, mo e kaialu ai e lautolu kia Apimeleko.
28 Ti pehe atu a Kaala ko e tama a Epeto, Ko hai kia a Apimeleko, ko hai foki a Sikema ke fekafekau ki ai a tautolu? Nakai kia ko e tama a Ierupaala a ia? ko Sipulu foki ne kotofa ai e ia ke pule? Kia fekafekau atu a mutolu ke he tau tagata Hamora ko e matua a Sikema; kua fekafekau he ha a tautolu kia ia?
29 Ane mai kua pule au ke he motu nai, po kua uta kehe e au a Apimeleko! Kua pehe atu foki a ia kia Apimeleko, Kia fakatokologa e koe e kau hau, ti hau ai a koe.
30 Kua logona foki e Sipulu ko e iki he maga e tau kupu a Kaala ko e tama a Epeto, ti tupu lahi ai hana ita.
31 Ti fakafano atu fufu e ia e tau fekau kia Apimeleko, kua pehe atu, Kitiala, ko Kaala ko e tama a Epeto mo e hana tau matakainaga, kua o mai a lautolu ki Sikema; kitiala kua alai e lautolu e maga ke tau kia koe.
32 Hanai, kia laga mai a koe ke he po a magaaho, katoa mo e motu ne fakalataha mo koe, ti tatao ai a mutolu ke he vao;
33 Ka hake e la a pogipogi, ti uhu mai a koe, mo e fofola ai ki mua he maga; kitiala, ko ia mo e motu ha ha ia ia, ka o atu a lautolu kia koe, ti eke e koe kia ia e mena kua loto a koe ki ai.
34 Ti laga mai ai he po ia a Apimeleko katoa mo e motu oti ne fakalataha mo ia, ti tatao ai a lautolu tata age ki Sikema ne la fa e kau.
35 Ti hu atu a Kaala ko e tama a Epeto, kua tu a ia ke he mena ke hu mai ai ke he gutuhala he maga; ti laga mai ai a Apimeleko mo e motu ne fakalataha mo ia he mena ne tatao ai.
36 Kua kitia atu e Kaala e motu, ti pehe atu a ia kia Sipulu, Kitiala, ko e motu ne hifo mai he tapunu mouga. Ti pehe mai a Sipulu kia ia, Ko e ata he tau mouga kua kitia e koe kua tuga ne tau tagata.
37 Ti liu vagahau ai a Kaala, kua pehe atu, Kitiala, kua o hifo mai e tau tagata he mena tokoluga he motu, kua hau ai foki e taha kau he aluna ha ha i Meoneni.
38 Ti pehe atu a Sipulu, Ko fe ainei kia e gutu hau ne pehe, Ko hai kia a Apimeleko ke fekafekau atu a mautolu kia ia? Nakai kia ko e motu hanā ne fakateaga a koe ki ai? Hanai, kia fano a koe ke tau mo lautolu.
39 Ti fina atu a Kaala ki mua he tau tagata Sikema, ti tau ai a ia mo Apimeleko.
40 Ti tutuli e Apimeleko a ia, ti hola ai a ia ki mua hana; ti veveli ai mo e tuina e tau tagata tokologa ke hoko atu ni ke he mena ne hu atu ke he gutuhala.
41 Ti nofo a Apimeleko i Aruma, ka e vega e Sipulu a Kaala mo e hana tau matakainaga, neke nonofo a lautolu i Sikema.
42 Kua hoko atu ke he aho a pogipogi, ti o atu e tau tagata he maga ke he vao; ti talahau ai e mena ia kia Apimeleko.
43 Ti uta e ia e tau tagata ti vevehe e ia a lautolu ke la tolu e kau, ti tatao ai a lautolu ke he vao; ti kitekite a ia, kitiala, kua o mai e tau tagata he maga, ti laga atu a ia kia lautolu, mo e keli e ia a lautolu.
44 Ti fofola atu a Apimeleko mo e kau ne fakalataha mo ia, ti tutu ai a lautolu ke he mena ne hu atu ai ke he gutuhala he maga, ka ko e na kau ne ua ne fofola atu a lautolu ke he tau tagata oti ke he vao, mo e keli e lautolu a lautolu.
45 Kua tau ni a Apimeleko mo e maga ke he aho oti ia; kua moua e ia e maga, ti keli ai e ia e tau tagata ha ha i ai, ti ulu ki lalo e ia e maga, mo e gana ai e ia e masima.
46 Kua logona ai he tau tagata oti ke he kolo a Sikema, ti huhu atu ai a lautolu ke he kolo tokoluga he faituga he atua ko Perita.
47 Kua tala age ai kia Apimeleko, kua fakapotopoto ai e tau tagata oti ke he kolo a Sikema.
48 Ti hake a Apimeleko ke he mouga ko Salemoni, ko ia katoa mo e tau tagata oti ha ha ia ia; kua uta e Apimeleko e tau toki ke he hana lima, ti hio ai e ia e la akau, ti lagaaki e ia, mo e fua ai ke he hana ua, ti pehe atu a ia ke he tau tagata, Ko e mena kua kitia e mutolu kua eke e au, kia eke pihia fakaave e mutolu.
49 Ti hio ai he tau tagata oti, takitaha ni mo e hana la akau, mo e mumui atu a lautolu kia Apimeleko; ti tuku atu e lautolu e tau la akau ia ke he kolo tokoluga, mo e tafu ai e afi ki luga ha lautolu; ti mamate ai e tau tagata oti ke he kolo a Sikema, tokai ko e taha e afe tagata, ko e tau tane mo e tau fifine.
50 Ti fano a Apimeleko ki Tipesa, kua he api a ia i Tipesa, ti eke ai e ia maana.
51 Ha ha he loto maga e kolo uka, ti fehola ki ai, e tau tane mo e tau fifine oti, ko e tau tagata oti ni he maga; ti pāpā ai e lautolu kia lautolu, mo e o hake a lautolu ke he tua kolo ki luga.
52 Kua hoko atu a Apimeleko ke he kolo, ti tau a ia ki ai; ti fakatata ai a ia ke he gutuhala he kolo ke huhunu ai e ia ke he afi.
53 Ti liti ai he taha fifine e fahi makaholo ki luga he ulu a Apimeleko, kua malipilipi ai hana ulu.
54 Ti ui age fakatepetepe a ia ke he fuata ne fua ai hana tau kanavaakau, kua pehe age kia ia, Kia aki mai e koe e pelu hau mo e keli e koe au, neke pehe a lautolu kia au, Ne kelipopo he fifine a ia. Ti hoka ai he fuata hana a ia kua ati e pelu, ti mate ai a ia.
55 Kua kitia he tau tagata Isaraela kua mate a Apimeleko, ti takitaha e tagata mo e fano ke he hana mena ke nofo ai.
56 Kua liu aki atu pihia he Atua kia Apimeleko e kelea ne eke ai e ia ke he hana matua tane, he keli ai e ia hana tau matakainaga ne tokofitugofulu;
57 Ko e kelea oti foki ne eke he tau tagata Sikema kua liuaki atu ai he Atua ki luga he tau ulu ha lautolu; kua hoko atu foki kia lautolu e kaialu a Iotamo ko e tama a Ierupaala.