Tau Fakatai 1:1-33
1 KO e tau fakatai a Solomona ko e tama a Tavita, ko e patuiki a Isaraela
2 Kia iloa ai e iloilo mo e tau mena ne fakaako atu; kia logona ai e tau kupu ke pulotu ai;
3 Kia moua ai e fakaako atu ke he iloilo, mo e tututonu, mo e fakafiliaga, mo e mahani hakohako;
4 Kia uta ai e loto matala kia lautolu ne goagoa; ko e iloilo mo e loto manamanatu ke he tau fuata.
5 Kia fanogonogo ai e tagata iloilo, kia tolomaki atu hana iloilo; ko ia ne pulotu foki ke moua ai e ia e iloilo ke pule ai;
6 Ke logona ai e fakatai mo e hana fakamatalaaga; ko e tau kupu he tau tagata iloilo mo e ha lautolu a tau kupu galo.
7 Ko e matakutaku kia Iehova, ko e kamataaga he iloilo haia; ka e vihiatia he tau tagata goagoa e iloilo mo e akonakiaga.
8 Haku tama tane na e, kia fanogonogo mai a ke he tau kupu ne fakaako atu ai he matua tane hāu; aua neke tiaki foki e koe e poaki he hāu a matua fifine;
9 Ha ko e mena to eke e tau mena ia mo foufou fulufuluola ke he ulu hāu, mo kahoa foki ke he ua hāu.
10 Haku tama na e, kaeke kua ole e tau tagata hala kia koe aua neke fanogonogo a koe ki ai,
11 Kaeke ke pehe atu a lautolu, Hau ke o a tautolu; kia lamalamati a tautolu ke he toto, kia takahao noa a tautolu ke he mena galo kia lautolu kua nakai hala.
12 Kia folo moui e tautolu a lautolu, tuga e tukuaga; kia folo katoatoa ai tuga na lautolu ne o hifo ke he luo.
13 To moua ai e tautolu e tau koloa uho oti ni, to fakapuke e tautolu e tau fale ha tautolu ke he tau mena ne fofo he tau;
14 Kia eke fakalataha e tautolu ha tautolu a tau vili; kia kofukofu tupe taha ni a tautolu oti.
15 Haku tama na e, aua neke o a mutolu ke he puhala fakalataha mo lautolu; kia taofi e koe hau a tau hui neke fano ai a koe ke he tau puhala ha lautolu;
16 Ha kua tafepoi e tau hui ha lautolu ke he kelea, mo e alumaki a lautolu ke fakamaligi e toto.
17 Ha kua fofola teao e kupega ka kitia ai he tau manu lele.
18 Ka ko lautolu na kua lamalamati a lautolu ke he toto ni ha lautolu; kua takahao he mena galo a lautolu kia mamate ni a lautolu.
19 Kua pihia e tau puhala ha lautolu oti kua velevele koloa; kua uta kehe e tau momoui ha lautolu ne toka ai.
20 Kua kalaga e iloilo i fafo; kua leo lahi ai a ia ke he tau malē.
21 Kua ui a ia ke he tau mena ne mua he mumu ai e motu o tagata, ko e mena ne huhu atu ai ke he tau gutuhala he maga; kua pehe age hana tau kupu ke he maga;
22 Ko mutolu ne goagoa, to loto a mutolu ke he mahani goagoa ato a fe? mo e tau tagata fa va, to fiafia a lautolu ke va ai ato a fe, mo e fakavihia he tau tagata goagoa ke he iloilo ato ha?
23 Kia liliu mai ā he akonaki atu e au kia mutolu; kitiala, to liligi atu e au haku Agaga kia mutolu; to fakailoa atu e au haku a tau kupu kia mutolu.
24 Ne ui atu au ka e nakai mafai a mutolu; ne fakaolo atu e au haku tau lima, ka e nakai haga mai taha;
25 Ne tiaki e mutolu haku a pule oti ni; mo e nakai mafai a mutolu ke fanogonogo ke he haku a tau akonakiaga;
26 Ko e mena ia to kata foki au ke he malaia ha mutolu; to va au ka hoko mai e mena ke matakutaku ai a mutolu;
27 Ka hoko mai tuga e afa e mena ke matakutaku ai a mutolu, ka hoko mai foki ha mutolu a malaia tuga ne hiohio; ka hohoko mai ai kia mutolu e matematekelea mo e fakaatukehe.
28 Ti ui mai a lautolu kia au ka e nakai tali atu ai au kia lautolu; to kumi fakamakutu e lautolu au ka e nakai ni moua e lautolu au.
29 Ne vihiatia e lautolu e iloilo; nakai manako foki a lautolu ke matakutaku kia Iehova;
30 Nakai mafai a lautolu ke omaoma ke he pule haku; ne fakavihia e lautolu haku a tau akonaki oti kana;
31 Ko e mena ia to kai ai e lautolu e tau fua he mahani ha lautolu; to makona foki a lautolu ke he tau lagatau ha lautolu.
32 Ha ko e liliu kehe he tau tagata goagoa ke kelipopo ai a lautolu; ko e nonofo fakahanoa he tau tagata goagoa ke mahaikava ai a lautolu.
33 Ka ko ia kua fanogonogo mai kia au to nofo ai a ia mo e monuina; to nofo fakatekiteki a ia, ti nakai matakutaku a ia he tau mena kelea.