Tau Fakatai 14:1-35
14 KO e tau fifine iloilo oti ne takitaha mo e ati hake hana fale; ka ko e fifine goagoa kua ulu moumou ai ke he hana tau lima.
2 Ko ia kua fano mo e mahani hakohako kua matakutaku a ia kia Iehova; ka ko ia kua mahani keukeu kua fakavihia e ia a ia.
3 Ha ha he gutu he tagata goagoa e akau he mahani fakatokoluga; ka ko e tau laugutu he tau tagata iloilo kua leveki ai a lautolu.
4 Ka nakai fai povi, ti meā ai e fale povi; ka e loga e mena ke moua ai he malolo he povi.
5 Ko e tagata fakamoli mena kua mahani tonu, nakai pikopiko a ia; ka ko e tagata fakamoli mena ne mahani fakavai kua pikopiko ni a ia.
6 Kua kumi iloilo e tagata fa vā, ka e nakai moua; ka e maeke vave e iloilo kia ia ne lotomatala.
7 Kia fano a mai mua he tagata goagoa, ha ko e mena nakai kitia e koe kia ia e tau laugutu he iloilo.
8 Ko e iloilo he tagata lotomatala, ke iloa ai e ia hana puhala; ka ko e goagoa he tau tagata goagoa ko e fakavai haia.
9 Kua va he tau tagata goagoa ke he hala; ka e feofanaki a lautolu ne mahani hakohako.
10 Kua iloa he loto e mamahi hana ni; ti nakai pule foki ha tagata kehe ke he hana fiafia.
11 To moumou ai e fale he tagata mahani kelea; ka to tupuolamoui e fale ie he tau tagata mahani hakohako.
12 Ha ha i ai e puhala kua hako ke he manatu he tagata; ka ko e hana fakahikuaga, ko e tau puhala ke mate ai haia.
13 Kua kata ni e tagata, ka e mamahi e loto; ko e fakahikuaga he fiafia ko e fakaatukehe haia.
14 Ko ia kua tukumuli ke he hana loto to makona a ia ke he hana ni a tau mahani; ka ko e tagata mahani mitaki to makona a ia he hana ni a mahani.
15 Kua talia he tagata goagoa e tau kupu oti; ka ko e tagata lotomatala, kua manamanatu a ia ke he hana tau puhala.
16 Kua matakutaku e tagata iloilo, ti kalo kehe a ia mo e kelea; ka ko e tagata goagoa, kua fakatokoluga a ia mo e nofo fakahanoa a ia.
17 Ko e tagata manava hogohogo kua mahani goagoa a ia; ko e tagata foki kua eke e tau lagatau kelea, kua vihiatia a ia.
18 Kua eke e goagoa mo tufaaga he tau tagata goagoa; ka ko e tau tagata lotomatala, kua fakafoufou ai a lautolu ke he iloilo.
19 Kua fakaveveli fakafohifo ai e tau tagata mahani kelea ki mua he tau tagata mahani mitaki; ko e tau tagata hala foki kua fakaveveli fakafohifo ai a lautolu ke he tau gutuhala he tagata tututonu.
20 Kua vihia e tagata nofogati he tagata ne katofia mo ia; ka e tokologa kua fakaalofa atu ke he tagata maukoloa.
21 Kua hala a ia, kua fakavihia e tagata ne katofia mo ia; ka e monuina a ia, kua fakaalofa ke he tau tagata matematekelea.
22 Nakai kia hehe a lautolu kua eke e tau lagatau kelea? ka e ha i ai e fakaalofa, mo e fakamoli kia lautolu kua eke e tau lagatau mitaki.
23 Kua fai mena kua moua ai ke he tau gahua oti; ka ko e vagahau he tau laugutu, kua fakahiku ia ke he nofogati hokoia.
24 Ko e foufou he tau tagata iloilo, ko e tau koloa ha lautolu haia; ka ko e goagoa he tau tagata goagoa ko e goagoa fakaali ni haia.
25 Kua laveaki e tau tagata he tagata fakamoli mena kua fakamoli; ka ko e tagata fakamoli mena pikopiko, kua vagahau a ia ke he tau mena fakavai.
26 Ko e matakutaku kia Iehova, ha ha i ai e mena tumau ke tua ki ai; to fai mena foki ke malu ai hana fanau.
27 Ko e matakutaku kia Iehova ko e puna he moui haia, ke kalo kehe ai mo e tau matahele ke mamate ai.
28 Ko e tokologa he tau tagata, ne toka ai e lilifu he patuiki; ka ko e hogeia tagata, ha ha i ai e malaia he iki.
29 Ko ia kua fakatuai ke ita, kua lahi hana pulotu; ka ko ia kua manava hogohogo, kua ta hake ki luga e ia e mahani goagoa.
30 Ko e loto mitaki, ko e moui he tino haia; ka ko e mahekeheke, ko e mena ke popo ai e tau hui motua haia.
31 Ko ia ne favale atu ke he tagata nofogati, kua eke fakakelea e ia kia Ia ne eke a ia; ka ko ia kua fakaalofa ke he tagata nofogati, kua fakalilifu atu a ia kia ia.
32 Kua palu hifo e tagata mahani kelea, ke he hana ni a mahani kelea; ka ko e tagata tututonu kua amaamanaki a ia ka mate a ia.
33 Kua nofo e iloilo ke he loto he tagata pulotu; ka ko e tau mena ha ha i loto he tau tagata goagoa kua fakailoa ia.
34 Ko e mahani tututonu kua fakamatalahi ai e motu; ka ko e hala, ko e mena haia ke mā ai e motu.
35 Ha ha i ai e fakaalofa he patuiki ke he fekafekau iloilo; ka e ha i ai hana ita, kia ia kua eke mena ke mā ai.