Tau Fakatai 15:1-33
15 KO e tali totonu ke liliu kehe ai e ita; ka ko e kupu fakahukia kua tupu ai e ita.
2 Ko e tau alelo he tau tagata iloilo kua vagahau fakamitaki ke he iloilo; ka ko e tau gutu he tau tagata goagoa kua fakalua mai ai e goagoa.
3 Ha ha he tau mena oti ni e tau fofoga a Iehova; kua kitekite ni a ia ke he tau tagata mahani kelea katoa mo e tau tagata mahani mitaki.
4 Ko e alelo kua vagahau ke malolo ai, ko e akau he moui haia; ka ko e alelo kua vagahau fakakeukeu kua malipilipi ai e loto.
5 Kua tiaki he tagata goagoa e fakaakoaga he hana matua tane; ka ko ia kua omaoma ke he akonakiaga, kua loto matala ni a ia.
6 Ha ha he fale he tagata tututonu e tau koloa loga; ka ko e matematekelea ne toka ai ke he tau mena kua moua he tagata mahani kelea.
7 Kua fakamavehevehe ai e iloilo he tau laugutu he tau tagata iloilo; ka e nakai pihia e tau loto he tau tagata goagoa.
8 Ko e poa he tau tagata mahani kelea ko e mena vihiatia kia Iehova haia; ka ko e liogi he tau tagata mahani hakohako ko e hana fiafia haia.
9 Kua vihiatia e Iehova e puhala he tau tagata mahani kelea; ka e fakaalofa a ia kia ia kua tutuli e mahani tututonu.
10 Kua kelea e akonakiaga kia ia kua tiaki e puhala; to mate foki a ia, kua vihiatia e akonakiaga.
11 Ha ha i mua a Iehova a Seoli mo e malaia; kua au atu he pihia e tau loto he fanau he tau tagata.
12 Nakai fakaalofa e tagata fa vā kia ia ne akonaki atu kia ia; nakai fina atu a ia ke he tau tagata iloilo.
13 Ko e loto fiafia kua tupu ai e mata fiafia; ka ko e loto mamahi kua malipilipi ai e agaga.
14 Ko e loto he tagata kua manamanatu kua kumi ia ke he iloilo; ka ko e tau gutu he tau tagata goagoa kua kai ai e goagoa.
15 Kua kelea e tau aho oti, ke he tau tagata matematekelea; ka ko e loto fiafia, ko e galue nakai noa haia.
16 Kua mua e mitaki e mena tote, mo e matakutaku kia Iehova, ke he tau koloa loga, mo e fakaatukehe.
17 Kua mua e mitaki e tufaaga he tau lakau kai, ne age mo e fakaalofa, ke he povi mai he fale povi ne age mo e fakavihia.
18 Ko e tagata fa ita kua fakatupu ai e miha; ka ko ia ne mahani ke fakauka kua fakamitaki ai e ia e taufetoko.
19 Ko e puhala he tagata teva kua lata ia mo e pa akau fotofoto; ka ko e puhala kua o ai e tau tagata mahani hakohako, ko e puhala tanu haia.
20 Ko e tama tane iloilo kua fakafiafia ai e matua tane; ka ko e tagata goagoa kua fakateaga a ia ke he hana matua fifine.
21 Ko e mahani goagoa, ko e mena haia kua fiafia ai a ia kua noa mo e manamanatu; ka ko e tagata pulotu, kua fano a ia mo e mahani hakohako.
22 Kua ulu e tau mena ne manamanatu ki ai kaeke kua nakai fai pulega; ka e fakamau ai ni ke he tau pule tokologa.
23 Kua fai fiafia e tagata ke he mena ne tali atu ai he hana gutu; mo e kupu ke he hana aho ke lata ai, kua mitaki lahi haia.
24 Ko e puhala ke he moui, ha ha i luga ke he tagata iloilo; kia fano kehe a ia i Seoli i lalo.
25 To taaki e Iehova e fale he tau tagata fakatokoluga; ka e fakamau ai e ia e katofia he fifine takape.
26 Kua vihiatia e Iehova e tau fatuakiloto kelea he tau tagata; ka e meā e tau kupu fulufuluola.
27 Ko ia kua velevele koloa, kua fakalavelave e ia hana ni a magafaoa; ka ko ia kua fakavihia e tau mena fakaalofa, to moui a ia.
28 Kua manamanatu e loto he tagata tututonu, kia tali atu a ia; ka e fakalua mai he tau gutu he tau tagata mahani kelea e tau mena kelea.
29 Kua mamao a Iehova mo e tau tagata mahani kelea; ka e fanogonogo mai a ia ke he liogi he tau tagata tututonu.
30 Ko e maama he tau mata kua fiafia ai e loto; ko e ogo mitaki foki kua gako ai e tau hui motua.
31 Ko e teliga kua fanogonogo ke he akonaki ke moui ai, to nofo ai a ia fakalataha mo e tau tagata iloilo.
32 Ko ia kua tiaki e tau mena kua fakaako ai, kua fakavihia e ia hana ni a moui; ka ko ia kua fanogonogo ke he akonaki, kua moua ai e ia e pulotu.
33 Ko e matakutaku kia Iehova, ko e fakaako haia ke iloilo ai; kua mua atu foki e mahani fakatokolalo ke he lilifu.