Tau Fakatai 16:1-33
16 HA ha i ai ke he tagata ke taute hana loto; ka e mai ia Iehova e tali he alelo.
2 Kua mitaki e tau puhala oti he tagata, ke he hana ni a manatu; ka kua fafati e Iehova e tau loto.
3 Kia tuku atu a kia Iehova hāu a tau gahua; ti fakamau ai e ia e tau mena ne manamanatu ki ai a koe.
4 Kua eke e Iehova e tau mena oti ke hoko ai hana ni a finagalo; ko ia ne mahani kelea foki ke lata ai mo e aho kelea.
5 Kua vihiatia e Iehova a lautolu oti, takitaha ne loto fakatokoluga; pete he toto ai e lima ke he lima he taha, ka e nakai fakahao a lautolu.
6 Kua fakamagalo ai e mahani kelea ke he fakaalofa mo e fakamoli; ko e matakutaku foki kia Iehova kua kalo kehe ai e tau tagata mo e mahani kelea.
7 Ka fiafia a Iehova ke he tau puhala he tagata; ti eke e ia ke mafola ai a lautolu mo e tau tagata ne fai fi kia ia.
8 Kua mua e mitaki e mena tote mo e mahani tututonu, ke he tau mena loga mo e mahani hepehepe.
9 Kua manamanatu e tagata ke he hana loto he puhala ke fano ai a ia; ka e fakatonu e Iehova e mena ke fina atu a ia ki ai.
10 Kua talahau mena mo e iloilo e tau kupu kua to mai he tau laugutu he patuiki; nakai vagahau mo e fakavai he fofoga hana ke he fakafiliaga.
11 Ko e fua hahamo mo e fua tautau kua tonu, ko e tau mena a Iehova ia; ko e gahua hana ni e tau maka oti ke fafati aki e tau mena ha ha he kato.
12 Ko e mena vihiatia ke eke he tau patuiki e mahani kelea; ha kua fakamau ai e nofoaiki ke he mahani tututonu.
13 Kua fiafia e tau patuiki ke he tau laugutu kua vagahau mo e tututonu; kua ofania foki e lautolu a ia kua vagahau ai ke he tau kupu hakohako.
14 Ko e ita he patuiki, ko e tau fekau he mate haia; ka ko e tagata iloilo kua fakalotomafola e ia a ia.
15 Ha ha i ai e moui ke he maama he fofoga he patuiki; ko e hana fakaalofa mai kua lata ia mo e aolagi he uha fakamui.
16 Kia moua a e iloilo, kua mua ue atu hana mitaki ke he auro; kia moua foki e pulotu kua mua ue atu ia ke manako ki ai, ke he ario.
17 Ko e puhala tu he tau tagata mahani hakohako, ko e kalo kehe mo e tau mena kelea haia; ko ia kua leveki hana puhala, kua fakahao ai e ia hana moui.
18 Kua mua atu e mahani fakatokoluga ke he malaia; kua mua atu foki e mahani fakahakehake he loto ke veli ai e tagata.
19 Kua mitaki ke fakatokolalo e loto fakalataha mo e tau tagata matematekelea; ka e kelea ke tufatufa e tau mena ne moua he tau fakalataha mo e tau tagata fakatokoluga.
20 Ko ia kua manamanatu ke he kupu, to moua ai e ia e mena mitaki; ko ia foki kua tua kia Iehova, kua monuina a ia.
21 Ko ia kua loto iloilo, to talahaua a ia ko e tagata pulotu; ko e vagahau mitaki foki he tau laugutu kua tolomaki atu ai hana iloilo.
22 Ko e iloilo ko e puna he moui haia kia ia ne toka ai; ka ko e fakaako atu ke he tau tagata goagoa, ko e goagoa ni haia.
23 Ko e loto he tagata iloilo, kua iloilo ai hana gutu; kua lafilafi ai foki e iloilo ke he hana tau laugutu.
24 Ko e tau kupu fulufuluola, ko e meli kua hihina hifo haia; kua humelie ke he loto, ko e mena foki ke malolo ai e tau hui motua.
25 Ha ha i ai e puhala kua tonu ke he manatu he tagata; ka ko e hana fakahikuaga, ko e tau puhala ke mate ai haia.
26 Ko e tagata gahua, kua gahua ni e ia māna; ha kua omoomoi a ia he hana gutu.
27 Ko e tagata kolokolovao kua taute fakamakutu ai e ia e kelea; ha ha he tau laugutu hana e tau kupu tuga e afi kaka.
28 Ko e tagata mahani keukeu, kua fakatupu ai e ia e taufetoko; mo ia kua feutaaki tala kua vevehe kehekehe ai e tau kapitiga.
29 Ko e tagata favale, kua fakavai e ia e tagata ne katofia mo ia; ne takitaki foki e ia a ia ke he puhala nakai mitaki.
30 Ko ia kua mohe hana tau mata, kua eke ke manamanatu ai ke he tau mena keukeu; ko ia kua fakatelotelo hana tau laugutu, kua fakahoko ai e ia e kelea.
31 Ko e foufou fulufuluola e ulu hina, kaeke ke moua ai ke he puhala he tututonu.
32 Ko e tagata kua fakatuai ke ita, kua mua hana mitaki ke he toa; kua mua foki a ia kua pule ke he hana loto kia ia kua moua e maga motu he tau.
33 Kua eke e vili ke he fatafata he tapulu; ka e mai ia Iehova hana fakatonuaga oti ni.