Tau Fakatai 17:1-28
17 KUA mitaki e mena kai tote kua magomago, kua kai ai mo e nofo fakatekiteki; ka e kelea e fale kua puke he tau manu tamate, kua eke ai mo e taufetoko.
2 Kua pule e fekafekau iloilo ke he tama tane kua fakatupu e mena ke mā ai; kua eke hana veveheaga he tufaaga fakalataha mo e tau matakainaga.
3 Kua fai kapiniu ke tunu ai e ario, mo e gutuumu ke tunu ai e auro; ka ko Iehova, kua kamatamata ai e tau loto.
4 Ko ia kua eke mena kelea kua hagao atu a ia ke he tau laugutu kua vagahau kelea; ko e tagata pikopiko foki kua fakateliga atu a ia ke he alelo kua kupu favale.
5 Ko ia kua vā ke he tagata nofogati, kua eke fakakelea e ia kia Ia ne eke a ia; ko ia kua fiafia ke he malaia, nakai noa a ia mo e fakahala.
6 Ko e foufou he tau tagata momotua ko e fanau he fanau ha lautolu haia; ko e fulufuluola he fanau, ko e tau matua tane ha lautolu haia.
7 Nakai gali ke he tau laugutu he tagata goagoa e vagahau ke he tau mena kua mua e mitaki; ti au atu he nakai gali ke he iki e tau laugutu pikopiko.
8 Ko e mena fakaalofa ko e maka uho haia kia ia ne toka ki ai; ko e tau mena oti kua hagao atu ki ai, kua monuina ai.
9 Ko ia kua ufiufi e holifono kua kumi e ia e fakaalofa; ka ko ia kua liu talahau e mena, kua vevehe kehekehe ai e ia e tau kapitiga.
10 Kua mua e mamahi he tagata loto manamanatu ka akonaki a ia, ke he mamahi he tagata goagoa kua fahi ke he tau fahi taha e teau.
11 Kua kumi e kelea hokoia he tagata kua fakafualoto; ka to fakafano atu kia ia e fekau favale.
12 Kia feleveia mo e tagata e urosa kua fofo ai hana tau punua; ka e aua neke feleveia mo ia e tagata goagoa ke he hana ni a goagoa.
13 Ko ia kua taui atu e mitaki ke he kelea, nakai ni fano kehe e kelea mo e hana magafaoa.
14 Ko e kamataaga he taufetoko, kua tuga he liligi atu e maga vai haia; ko e mena ia kia tiaki a e taufetoko ka e nakaila tupu ai e latau.
15 Ko ia kua talahau kua tututonu e tagata mahani kelea, mo ia kua fakahala e tagata tututonu, kua fakataufataua a laua, ko e mena vihiatia ia kia Iehova.
16 Ko e heigoa kia e mena he ha i ai e taui ke he lima he tagata goagoa ke fakafua mai e ia e iloilo, ka e nakai ni fai loto a ia ke lata ai.
17 Kua fakaalofa e kapitiga ke he tau aho oti kana; kua fanau foki e matakainaga ke lata ai mo e aho matematekelea.
18 Ko e tagata kua noa mo e manamanatu, kua fetotoaki e tau lima ha laua mo taha; kua eke a ia mo fakamoli ki mua hana tau kapitiga.
19 Ko ia kua manako ke holifono, kua manako ai a ia ke he taufetoko; ko ia kua fakatokoluga hana gutuhala, kua kumi ai e ia e malaia.
20 Ko e tagata loto hepehepe nakai moua e ia ha mitaki; mo ia kua fakavai ke he hana alelo, to veli a ia ke he mena ke matematekelea ai.
21 Ko ia kua fanau ai e tagata goagoa, kua eke ia mo mena ke fakaatukehe ai a ia; ko e matua tane foki he tagata goagoa nakai fiafia ai a ia.
22 Ko e loto fiafia kua eke mo vai lakau aoga haia; ka ko e loto malipilipi kua magomago ai e tau hui motua.
23 Kua talia he tagata mahani kelea e mena fakaalofa mai he fatafata, kia liliu kehe ai e ia e tau puhala he fakafiliaga.
24 Ha ha i ai ke he tagata loto manamanatu e iloilo; ka ko e tau mata he tagata goagoa ha ha i ai ke he motuaga he lalolagi.
25 Ko e tama tane goagoa kua fakamamahi ai e ia e loto he hana matua tane; kua fakahogohogomanava foki a ia kia ia ne fanau ai a ia.
26 Nakai mitaki ke fakahala e tagata tututonu; ti nakai mitaki ke fahi e tau iki ha ko e mahani hakohako ha lautolu.
27 Ko ia kua fai iloilo, kua taofi ai e ia hana tau kupu; ko ia kua totonu foki, ko e tagata pulotu a ia.
28 Ko e tagata goagoa foki, kua fakanono a ia, ti piko e tau tagata, ko e tagata iloilo a ia; ko ia kua fakatelotelo hana tau laugutu, piko e tau tagata, ko e tagata pulotu a ia.