Tau Fakatai 19:1-29
19 KUA mua e mitaki he tagata nofogati kua fano mo e hana mahani hakohako, kia ia ne laugutu hepehepe, ko e tagata goagoa foki a ia.
2 Nakai mitaki foki ke noa e tagata mo e iloilo; ko e tagata foki ne alumaki ke he hana tau hui kua hehe a ia.
3 Ko e goagoa he tagata kua fakakeukeu ai hana puhala; kua ita foki hana loto kia Iehova.
4 Ko e koloa, kua lafilafi mai ai e tau kapitiga tokologa; ka ko e tagata nofogati, kua vevehe kehe a ia mo e hana kapitiga.
5 Nakai noa mo e fakahala e tagata fakamoli mena kua pikopiko; mo ia kua vagahau mo e pikopiko nakai ni hao a ia.
6 Ko e tokologa a lautolu kua ole atu ki mua he iki; kua kapitiga e tau tagata oti ni mo e tagata kua ta age e tau mena.
7 Kua vihiatia e tagata nofogati he hana tau matakainaga oti; ti au atu he fakamamao mo ia hana tau kapitiga; ne tutuli he tau kupu hana a lautolu, ka e nakai moua a lautolu.
8 Ko ia kua moua e iloilo, kua fakaalofa a ia kia ia ni; ko ia kua omaoma ke he pulotu, kua moua e ia e mena mitaki.
9 Nakai noa mo e fakahala e tagata fakamoli mena kua pikopiko; ko ia foki kua vagahau mo e pikopiko, to malaia ni a ia.
10 Ko e tau mena fakafiafia, nakai lata ia ke he tagata goagoa; kua au atu foki he nakai lata ke pule e fekafekau ke he tau iki.
11 Kua fakatuai e tagata ke ita, ha ko e hana loto manamanatu; ko e hana fakahekeaga foki, ke nakai manatu a ia ke he mena ne holifono ai e tagata kia ia.
12 Ko e ita he patuiki kua tuga ne tagi he leona haia; ka ko e hana fakaalofa, kua lata ia mo e hahau ke he motie.
13 Ko e tama tane goagoa ko e malaia he hana matua tane haia; ko e tau taufetoko foki he hoana ko e tutulu mau haia.
14 Ko e fale mo e tau koloa, ko e tufaaga mai he tau matua haia; ka ko e hoana iloilo, mai ia Iehova ni a ia.
15 Ko e mahani teva kua tupu ai e pulumohea; mo e tagata kua fakalolelole, kua fia kai ni a ia.
16 Ko ia kua omaoma ke he poaki, kua omaoma a ia ke he hana moui; ka ko ia kua fakateaga ke he hana tau puhala, to mate ni a ia.
17 Ko ia kua fakaalofa ke he tagata nofogati kua ta age e ia hana tau mena kia Iehova; to taui mai foki e ia e tau mena ne ta age kia ia.
18 Kia akonaki atu ke he tama tane hāu ha kua eke ai e koe mo e amaamanaki; ka e aua neke manako hāu a loto kia mate a ia.
19 Ko e tagata ita lahi, to fakahala a ia; ha ko e mena ka laveaki mai e koe a ia, to liu eke pihia foki ni.
20 Kia fanogonogo ā koe ke he tau mena kua fakatonu atu, mo e talia e fakaako atu; kia iloilo ai a koe ke he tau aho fakamui hau.
21 Ha ha he loto he tagata e tau manatu loga; ka ko e pule a Iehova to tumau ni a ia.
22 Ko e mena kua manako ai ke he tagata, ko e hana fakaalofa haia; kua mua e mitaki e tagata nofogati ke he tagata pikopiko.
23 Ko e matakutaku kia Iehova kua fakahiku ia ke he moui; ko ia ne toka ai, to makona mau ai a ia; nakai āhi a ia he malaia.
24 Kua fufu he tagata teva hana lima ke he kumete ne toka ai e mena kai; ka e nakai liuaki mai ni ke he hana gutu.
25 Kia ta e koe e tagata fa vā ti lotomatala ai e tau tagata goagoa; mo e akonaki atu ke he tagata loto manamanatu, ti iloa ai e ia e iloilo.
26 Ko ia kua moumou e tau mena he hana matua tane, mo e tutuli kehe hana matua fifine, ko e tama tane haia kua fakatupu ai e mā mo e ekefakakelea.
27 Haku tama na e, kia toka a e fanogonogo ke he tau mena ne fakaako atu ke fakahehe mai he tau kupu ke iloilo ai.
28 Ko e tagata fakamoli mena nakai aoga, kua vā a ia ke he fakafiliaga; ko e tau gutu foki he tau tagata hala kua folo fua e mahani kelea.
29 Kua taute e fakafiliaga ma e tau tagata fa vā; ko e tau tā foki ma e tau tua he tau tagata goagoa.