Tau Fakatai 2:1-22
2 HAKU tama na e, kaeke ke talia e koe haku a tau kupu, mo e toka ai e koe ke he loto hāu haku a tau poaki,
2 Kua fakateliga hāu a tau teliga ke he iloilo, kua haga atu ai hāu a loto ke he manamanatu;
3 Kaeke kua ui atu a koe ke he loto matala, mo e fakaleo lahi atu ke he loto manamanatu;
4 Kaeke ke kumi e koe a ia, tuga he kumi ario; kaeke ke kumi fakamakutu ki ai, tuga he kumi e koloa galo;
5 Ti iloa ai e koe e matakutaku kia Iehova, mo e moua ai e koe e iloilo ke he Atua.
6 Ha ko Iehova kua foaki mai e iloilo; mai he fofoga hana e iloilo mo e loto manamanatu;
7 Kua toka ai e ia e iloilo ma lautolu ne mahani hakohako; ko e akau punuti a ia kia lautolu ne o mo e mahani tonu.
8 Kia leoleo e ia e tau puhala he tututonu; ke leveki foki e ia e tau puhala he hana tau tagata tapu;
9 Ti iloa ai e koe e mahani tututonu, mo e fakafiliaga, mo e mahani hakohako; ko e tau puhala mitaki oti ni.
10 Ha ko e mena hoko atu e iloilo ke he loto hāu; ti mitaki foki kia koe e pulotu;
11 To leveki a koe he loto manamanatu; to leoleo a koe he pulotu;
12 Kia laveaki a koe mai he puhala he tagata mahani kelea; mai he tau tagata kua vagahau ke he tau mena fakavai;
13 Ko lautolu kua tiaki e tau puhala hakohako; ka e o age a lautolu ke he tau puhala pouli;
14 Kua fiafia a lautolu ke eke e tau mena kelea; kua olioli a lautolu ke he tau fakavai he tagata mahani kelea.
15 Ko lautolu ne fakakeukeu ha lautolu a tau puhala, mo e mahani hepehepe ai a lautolu;
16 Kia laveaki a koe mai he fifine kehe, ko e fifine kehe ne fakavai ke he hana tau kupu;
17 Kua tiaki e ia a ia ne leveki a ia he vaha tamafine a ia; kua nimo foki ia ia e maveheaga he hana Atua.
18 Ha kua hoko atu hana fale ke he mate, mo e hana tau puhala ke he tau agaga ha lautolu ne mamate;
19 Ko lautolu oti ne o atu kia ia, nakai liliu mai a lautolu, nakai moua e lautolu e tau puhala he moui.
20 Kia fano ai a koe ke he puhala he tau tagata mahani mitaki, mo e tumau ai a koe ke he tau puhala he tau tagata tututonu.
21 Ha ko lautolu ne mahani hakohako to nonofo a lautolu ke he motu; mo lautolu ne katoatoa e mitaki ha lautolu a mahani to toe ai a lautolu;
22 Ka to vevehe kehe mai he motu a lautolu ne mahani kelea, to taaki ai foki a lautolu ne mahani fakavai.