Tau Fakatai 20:1-30
20 KO e uaina kua tuga ne tagata fa vā haia; ko e kava, kua tuga e tagata tapāā haia; ko lautolu oti kua hehe ai, nakai iloilo a lautolu.
2 Ko e matakutaku ai ke he patuiki, kua lata ia mo e tagi he leona; ko ia kua ita kia ia, kua hala a ia kia ia ni.
3 Kua eke mo fakahekeaga ke he tagata, he nofo kehe a ia mo e taufetoko; ka ko e tau tagata goagoa oti kua latau a lautolu.
4 Nakai keli he tagata teva e kelekele, ha ko e vaha makalili; ko e mena ia to kaiole a ia ke he vaha ke helehele ai e tau saito, ka e nakai moua.
5 Ko e tau fatuakiloto he tagata, ko e vai hokulo haia; ka ko e tagata loto manamanatu, to utu mai ai e ia.
6 Ko e tau tagata tokologa kua takitaha a lautolu mo e fakamatala hana totonu; ka e moua e hai e tagata kua fakamoli?
7 Ko e tagata tututonu kua fano mo e hana mahani hakohako; to monuina hana fanau ka mole atu a ia.
8 Ko e patuiki kua nofo ke he nofoa fakafili; kua fakamavehevehe ai e ia e tau mena kelea oti ke he hana tau fofoga.
9 Kua maeke kia hai ke pehe, Kua fakameā e au haku loto; kua meā au he haku a tau hala?
10 Ko e tau maka kehekehe ke fafati aki e tau mena, mo e tau efa kehekehe, kua fakataufataua ia, ko e tau mena vihiatia kia Iehova.
11 Kua maeke ke iloa ai e tama ke he hana tau mahani; po ke mitaki mo e hakohako hana tau mena ne eke.
12 Ko e tau teliga ke fanogonogo ai, mo e tau mata ke kitekite ai; ko Iehova ne eke e na mena ua ia.
13 Aua neke fia mohe a koe, neke fakanofogati ai a koe; kia mataala a, ti makona ai a koe he tau mena kai.
14 Kua pehe age e tagata kua fakafua mena māna, Kua kelea, kua kelea; kua fano kehe a ia, ti hula ai a ia.
15 Ha ha i ai e auro mo e tau penina loga; ka ko e tau laugutu ne toka ai e iloilo, ko e kapiniu uho haia.
16 Kia uta e koe e tapulu hana kua eke mo fakamoli ma e tagata kehe; mo e taofi e koe a ia ke fakamau aki e fakafua kua eke mo fakamoli ma e tau tagata kehe.
17 Kua humelie ke he tagata e tau mena kai kua moua he fakavai; ka ko e fakamui, kua puke hana gutu ke he tau tepu kilikili.
18 Kua fakamau e tau mena kua manamanatu ki ai ke he fifiliaga; ko e pulega mitaki foki kia eke ai e tau.
19 Ko ia kua faifano mo e feutaaki tala, kua fakakite e ia e tau kupu galo; ko e mena ia ua kapitiga a koe mo e tagata kua fakamaga mau hana tau laugutu.
20 Ko ia kua kaialu ke he hana matua tane, po ke hana matua fifine; to tamate ai hana lamepa ke he pouli kikio.
21 Ko e mena ne moua fakatepetepe ke he kamataaga, nakai monuina ia ke he fakahikuaga.
22 Ua pehe age a koe, To taui atu e au e kelea; kia tatali atu a kia Iehova, ti laveaki ai e ia a koe.
23 Kua vihiatia e Iehova e tau maka kehekehe ke fafati aki; ko e fua tautau fakavai nakai mitaki ia.
24 Mai ia Iehova e fanoaga he tagata; ko hai kia e tagata kua iloa hana ni a puhala.
25 Ko e matahele he tagata ke vagahau fakatepetepe ke he tau mena kua fakatapu; ka oti foki hana tau omonuo he eke, ke huhu ai e ia.
26 Kua fakamavehevehe he patuiki iloilo e tau tagata mahani kelea; kua ta age foki e ia e veli ne taholi aki e saito ki luga ha lautolu.
27 Ko e loto manamanatu he tagata, ko e lamepa a Iehova haia; kua kumi ke he tau mena oti ki loto he loto hana.
28 Ko e fakaalofa mo e fakamoli, kua leveki e laua e patuiki; kua fakamau ai hana nofoaiki ke he fakaalofa.
29 Ko e malolo he tau fuata ko e ha lautolu a fulufuluola haia; ko e lilifu foki he tau tagata momotua ko e ulu hina haia.
30 Ko e tau kalavalava ne kafokia ai e tagata ne fakamea ai e kelea; kua hoko foki e tau tā ke he tau mena i loto he tagata.