Tau Fakatai 22:1-29
22 KIA mua e manako ke talahaua mitaki ke he manako ke he tau koloa loga; mo e mahani totonu, kia mua e manako ki ai ke he tau ario mo e tau auro.
2 Kua tutuuta ai e tau tagata maukoloa mo e tau tagata nonofogati; ne eke ai e Iehova a lautolu oti.
3 Kua kitia he tagata lotomatala e kelea, mo e fakamumuli ai a ia; ka ko e tau tagata goagoa, kua o age ai a lautolu, ti fakahala ai a lautolu.
4 Ko e taui he mahani fakatokolalo mo e matakutaku kia Iehova, hanai, ko e koloa, mo e lilifu mo e moui.
5 Ko e tau akau fotofoto mo e tau matahele, ne toka ai ke he puhala he tau tagata mahani keukeu; ko ia kua leveki hana loto, to mamao a ia mo e tau mena na.
6 Kia fakaako a e tama ke lata mo e hana puhala; ka hoko foki ke he vaha ke motua ai a ia, nakai ni fano kehe ai a ia.
7 Kua pule e maukoloa ke he tagata nofogati; ko ia foki ne ogo mena kua eke a ia mo fekafekau kia ia ne ta age hana tau mena kia ia.
8 Ko ia ne gana e mahani kelea to helehele mai e ia e malaia; to fakaoti foki e tokotoko he hana ita.
9 Ko ia ne mata fakaalofa to fakamonuina he tau tagata a ia; ha kua ta age e ia hana tau mena kai kia ia ne nofogati.
10 Kia vega a e tagata fa vā, ti mole atu ai e taufetoko; kua hiku foki e miha mo e mā.
11 Ko ia kua manako ke he loto meā, kua fulufuluola hana tau laugutu, kua eke a ia mo kapitiga he patuiki.
12 Ko e tau fofoga a Iehova kua leveki a ia ne iloilo; ka e ulu ai e ia e tau kupu he tagata mahani fakavai.
13 Kua pehe e tagata teva, ko e leona ha i fafo; to tamate ai au ke he tau male.
14 Ko e gutu he fifine kehe ko e luo hokulo haia; to to ki ai a ia kua ita lahi ki ai a Iehova.
15 Kua lili ai e goagoa ke he loto he tama; ka e vega mamao atu a ia ia ia he akau ne akonaki aki a ia.
16 Ko ia kua favale atu ke he tagata nofogati kia fakaloga ai e ia hana tau mena, mo ia kua foaki age e tau mena ke he tagata maukoloa, to fakahiku ai ni ke he nofogati.
17 Kia haga mai ā e koe hāu a tau teliga, mo e fanogonogo mai a koe ke he tau kupu he tau tagata iloilo; mo e manamanatu a e koe ke he haku a iloilo.
18 Ha ko e mena fulufuluola ni kaeke ke taofi ai e koe ke he loto hāu; ka fakamau ai fakalataha ke he hāu a tau laugutu.
19 Kua fakaako atu ai e au kia koe, ko koe ni, ke he aho nai, kia tua a koe kia Iehova.
20 Nakai kia tohi atu e au ke he tau mena ne mua ue atu e mitaki ke he tau fifiliaga mo e iloilo;
21 Kia fakailoa atu e au kia koe e tonu he tau kupu moli; kia liu a koe mo e tala age ai e tau kupu moli kia lautolu ne fakafano mai a koe?
22 Aua neke fofo e tau mena he tagata nofogati, ha kua nofogati a ia; ti ua favale atu a koe kia ia ne matematekelea ke he gutuhala.
23 Ha kua eke e Iehova e taufetoko ha lautolu, to kelipopo foki e ia a lautolu ne favale atu kia lautolu.
24 Aua neke kapitiga a koe mo e tagata fa ita; ti ua o a mua mo e tagata vale;
25 Neke fakaako ai e ia a koe ke he hana tau mahani; ti moua ai hāu agaga he matahele.
26 Aua neke eke a koe mo taha ia lautolu kua fetotoaki e tau lima mo e falu; po ke eke a koe mo tagata ke fakamoli aki e tau mena kua uta noa to taui atu.
27 Kaeke ke nakai fai mena a koe ke taui aki, ke uta kehe he ha e ia hāu a mohega kua takoto ai a koe?
28 Aua neke tolo e koe e katofia ne toka mai i tuai, ne eke ai he tau matua hāu.
29 Kua kitia kia e koe e tagata mafiti ke he hana tau gahua? to tu a ia ki mua he tau patuiki, nakai tu a ia ki mua he tau lalo tagata.