Tau Fakatai 23:1-35
23 KAEKE kua nonofo a mua mo e taha iki ke taumafa ai, kia manamanatu fakamitaki a koe kia ia ha ha i mua hāu;
2 Mo e tuku atu e koe e titipi ke he hāu a ua, kaeke ko e tagata kai lahi a koe;
3 Aua neke manako a koe ke he hana tau mena kai manogi; ha ko e tau mena kai fakavai haia.
4 Aua neke gahua fakafita a koe, ke maukoloa ai; kia toka a hāu a pulotu.
5 To mataono atu kia a koe ke he mena nakai ha i ai? ha ko e mena eke ni he koloa e tau tapakau māna; tuga ne aeto ti lele atu a ia ke he lagi.
6 Aua neke kai e koe e tau mena kai hana ne mata kelea; ti ua manako a koe ke he hana tau mena kai manogi.
7 Ha ko e mena tuga he manatu e ia ke he hana loto, kua pihia ni a ia; kua pehe age a ia kia koe, Kia kai a mo e inu; ka e nakai ha ha i ai mo koe hana loto.
8 To fakalua mai e koe e mena kai kua oti he kai e koe, mo e moumou e koe hāu a tau kupu fulufuluola.
9 Ua vagahau atu a koe ke he tau teliga he tagata goagoa; ha ko e mena fakavihia e ia e iloilo he hāu a tau kupu.
10 Aua neke tolo e koe e tau katofia toka mai i tuai; ti ua fina atu a koe ke he tau fonua he tau tama kua mamate e tau matua.
11 Ha kua malolo ni ha lautolu a Fakamoui; ko ia ni ke eke ha lautolu a taufetoko mo koe.
12 Kia haga mai e koe hāu a loto ke he tau mena kua fakaako atu ai, mo e hāu a tau teliga ke he tau mena ke iloilo ai.
13 Aua neke toka e koe e tama mo e nakai akonaki; ha ko e mena ka fahi e koe a ia ke he akau ti nakai mate a ia.
14 To fahi e koe a ia ke he akau, mo e laveaki mai e koe hana agaga i Seoli.
15 Haku tama na e, kaeke kua iloilo hāu a loto, ti fiafia ai ni haku loto nai.
16 To olioli foki haku a tau manatu, ka vagahau ai hāu a tau laugutu ke he tau mena tonu.
17 Aua neke mahekeheke e loto hāu ke he tau tagata hala; ka kia matakutaku a koe kia Iehova ke he aho katoa;
18 Ko e mena fai fakahikuaga ni, ti nakai noa hāu a amaamanaki.
19 Kia fanogonogo mai a koe, haku tama na e, mo e iloilo a a koe; mo e takitaki tonu hāu a loto ke he puhala.
20 Ua eke a koe mo taha ia lautolu kua inu lahi ke he uaina; mo lautolu kua kai loto kai ke he maga kakano he tau manu;
21 Ha ko e tagata kua inu lahi ke he uaina, mo e tagata kai loto kai to nonofogati ai a laua; mo ia kua fia mohe mau to tapulu ai a ia ke he tau tapulu mahehe.
22 Kia fanogonogo a koe ke he hāu a matua tane, ne fanau ai a koe; ti ua fakavihia foki hāu a matua fifine ka motua a ia.
23 Kia fakafua mai ā e mena moli, aua neke fakafua atu; ko e iloilo ni, mo e ako mena, mo e loto manamanatu.
24 Kua olioli lahi ni e matua tane he tagata tututonu; ko ia kua fanau e tama iloilo kua fiafia a ia kia ia.
25 Kia fiafia hāu a matua tane mo e hāu a matua fifine; kia olioli ni a ia ne fanau ai a koe.
26 Haku tama na e, kia ta mai e koe hāu a loto kia au; kia fiafia foki hāu a tau mata ke he tau puhala haku.
27 Ha ko e fifine fakataka ko e luo hokulo haia; ko e fifine kehe ko e luo pukilu haia;
28 Kua takahao foki a ia, tuga ne tagata fofo mena, ne fakatokologa ai foki e tau tagata mahani keukeu.
29 Ha ha ia hai kia e aue? ha ha ia hai kia e matematekelea? ha ha ia hai kia e tau taufetoko? ha ha ia hai kia e fakaatukehe? ha ha ia hai kia e tau kafokia noa? ha ha ia hai kia e tau mata kula?
30 Ko lautolu kua mule he inu uaina; ko lautolu ne o age ke kumi e uaina fiofio.
31 Ua kitekite a koe ke he uaina ka kula mai; ka kolopupū ai ke he kapiniu, kua hifo ai fakahakohako.
32 Ko e fakamui kua gagau e ia, tuga ne gata, kua fakakafokia ai e ia tuga ne gata gagau.
33 To kitia he tau mata hāu e tau mena kehe; to vagahau foki e loto hāu ke he tau mena hepehepe.
34 To lata ni a koe mo taha kua takoto ki loto he tahi; ke lata foki mo ia kua takoto ke he tapunu fanā.
35 To pehe a koe, Ne ta e lautolu au ka e nakai mamahi ai au; ne fahi e lautolu au ka e nakai logona ai e au; to ala a fe au? To kumi ai foki e au.