Tau Fakatai 24:1-34
24 AUA neke mahekeheke a koe ke he tau tagata mahani kelea; ti ua manako a koe ke fakalataha mo lautolu.
2 Ha kua manamanatu e tau loto ha lautolu ke he favale; kua vagahau he tau laugutu ha lautolu ke he tau mena ke mamahi ai.
3 Kua ati hake ai e fale ke he iloilo; kua fakamau ai foki ke he pulotu.
4 Ko e iloilo foki kua fakapuke ai e tau poko ke he tau koloa oti ni kua uho mo e fulufuluola.
5 Ko e tagata iloilo kua malolo a ia; mo e tagata lotomatala kua tolomaki atu hana malolo;
6 Ha ko e tau pulega mitaki ke eke ai hāu a tau; ko e tau pule tokologa foki ke hao mitaki ai.
7 Kua tokuluga e iloilo ke he tagata goagoa nakai ni vagahau a ia ke he gutuhala.
8 Ko ia kua manamanatu ke eke mena kelea, to talahaua a ia ko e tagata kua eke e tau lagatau kelea.
9 Ko e manatu he tagata goagoa ko e hala haia; kua vihiatia foki he tau tagata e tagata fa vā.
10 Kaeke ke fakalolelole a koe ke he aho matematekelea, kua tote ni hāu a malolo.
11 Kia laveaki e koe a lautolu kua uta ke mamate ai, mo lautolu ko e kelipopo ha ne fai, kia taofi a e koe.
12 Kaeke ke pehe a mutolu, Kitiala, nakai iloa e mautolu e tagata nai; ko ia kua kamatamata e tau loto nakai kia manamanatu ai a ia? ko ia kua leveki hāu a agaga nakai kia iloa e ia? nakai kia taui atu e ia ke he tagata ke lata mo e hana gahua?
13 Haku tama na e, kia kai e koe e meli, ha ko e mena mitaki ai; katoa mo e meli kua hihina hifo, kua humelie ke he hāu a gutu;
14 Kia iloa e koe kua pihia foki e iloilo ke he hāu a agaga; kaeke kua moua e koe ti ha ha i ai e taui; nakai hiku noa foki hāu a amaamanaki.
15 Ko e tagata mahani kelea na e aua neke lamalamati a koe ke he mena kua nofo ai e tagata tututonu; aua neke moumou e koe e mena kua takoto ai a ia.
16 Ha ko e lagafitu he veli e tagata tututonu, ka e liu tu a ia; ka ko e tau tagata mahani kelea kua liti hifo a lautolu ke he malaia.
17 Ka veli a ia kua fai fi kia koe, aua neke fiafia ai a koe; ka liti hifo foki a lautolu, aua neke olioli ai hāu a loto.
18 Neke fioia e Iehova ti kelea ia ki mua hana; mo e mafoki mai ai hana ita ia ia.
19 Aua neke fakamamahi e koe a koe ha ko lautolu kua eke e tau mena kelea; ti aua neke mahekeheke a koe ke he tau tagata mahani kelea.
20 Ha ko e mena nakai fakahiku mo e mitaki a lautolu kua mahani kelea; to tamate ni e lamepa he tau tagata mahani kelea.
21 Haku tama na e, kia matakutaku a koe kia Iehova katoa mo e patuiki; ti ua kapitiga a koe mo lautolu kua hikihikifano.
22 Ha ko e mena tu fakalutukia mai ha lautolu a malaia; kua iloa e hai foki e malaia ke hoko kia laua?
23 Ko e tau kupu foki he tau tagata iloilo hanai. Nakai mitaki ke fakamailoga tagata ke he fakafiliaga.
24 Ko ia kua pehe age ke he tagata mahani kelea, Kua tututonu a koe; to kaialu he tau motu kia ia; to ita lahi kia ia e tau kautu.
25 Ka ko lautolu kua akonaki atu kia ia, to fiafia a lautolu; to hoko atu kia lautolu e fakamonuina, ke mitaki ai.
26 Ko ia kua tali age mo e tau kupu tonu kua figita e ia ke he tau tagata.
27 Kia taute e koe hāu a tau gahua i fafo, mo e fakalatalata ai ke he vao; ka mole ia ti ta ai e koe hāu a fale.
28 Ua eke noa a koe mo tagata fakamoli mena ke he tagata ne katofia mo koe; ke pikopiko kia hāu a tau laugutu?
29 Aua neke pehe a koe, Tuga he eke he tagata kia au, to eke pihia ni e au kia ia; to taui atu e au kia ia ke lata mo e hana tau mena ne eke.
30 Ne fina age au ke he fonua he tagata teva, mo e uluvine he tagata nakai fai manamanatu;
31 Kitiala, kua pupu oti ai ni ke he tau akau talatala, kua ufitia oti ni ke he tau lakau magiho, mo e hana kaupa maka kua ulu ki lalo.
32 Ti kitekite ni au mo e manamanatu au; kua kitia e au, mo e ako ai au;
33 Tokai he mohe fakapiki fakatote foki, tokai ke mohealafia fakatote, tokai ke tui fakatote e tau lima ke mohe,
34 Ka to hoko mai hāu a nofogati tuga ne tagata fofo mena; mo e hāu a hogeia mena tuga ne tagata kua tauteute mo e hana tau kanavaakau.