Tau Fakatai 25:1-28
25 KO e tau fakatai foki a Solomona hanai, ne lagaaki ai he tau tagata he patuiki a Iuta ko Hesekia.
2 Ko e lilifu he Atua ke fufu ai e tau mena; ka ko e lilifu he tau patuiki ke kumi ai e tau mena.
3 Ko e lagi kua tokoluga haia, mo e lalolagi kua tokolalo haia; ko e tau loto foki he tau patuiki nakai kitia he kumi ki ai.
4 Kia uta kehe e otaota he ario, ti moua ai e kapiniu ma e tufuga eke mena ario;
5 Kia uta kehe a e tagata mahanai kelea mai mua he patuiki ti fakamau ai e nofaiki ke he mahani tututonu.
6 Aua neke hula a koe ki mua he patuiki; ti ua tu a koe ke he mena ha ha i ai e tau tui.
7 Ha ko e mena mitaki ke pehe atu kia koe, Hake mai a ki hinei; ka e kelea ke fakatokolalo ai a koe ki mua he iki kua kitekite a koe ki ai.
8 Aua neke fano fakatepetepe a koe ke eke e taufetoko; neke fakahahaku a koe, ka hoko ke he hana fakahikuaga, he fakama ai a koe he tagata ne katofia mo koe.
9 Kia eke la e mua e taufetoko ha mua mo ia ne katofia mo koe; ka e ua fakakite atu e tau kupu galo he taha tagata;
10 Neke fakama ai a koe he tagata ne fanogonogo ki ai; ti nakai uta kehe ia koe e ekefakakelea.
11 Ko e tau kupu kua vagahau mo e lata ai kua tuga ne tau fua moli auro ia ke he tau kato ario kua lakuina.
12 Ko e tagata kua akonaki mo e iloilo ke he tau teliga kua fanogonogo ki ai, kua lata a ia mo e mama auro tau teliga, mo e kahoa auro mitaki.
13 Tuga ne momoko he kiona ke he vaha ne helehele ai e saito; kua pihia e fekau ne fakamoli kia lautolu ne fakafano age a ia; kua liuaki mai e ia e tau agaga he hana tau iki.
14 Ko e tagata kua vagahau lahi ke he hana tau mena ne foaki age, ka ko e tau pikopiko, kua lata a ia mo e tau aolagi mo e matagi, ka e nakai fai uha.
15 Ko e fakauka kua moua ai e takitaki ke fanogonogo mai; mo e alelo kua vagahau mo e totonu kua fatifati ai e tau hui motua.
16 Kua moua kia e koe e meli? kia kai fakalata ai; neke makona lahi ai a koe, ti fakalua ai.
17 Kia takilagataha hāu a fano ke he fale he tagata ne katofia mo koe; neke hoha a ia kia koe, ti fakavihia e ia a koe.
18 Ko e tagata kua fakamoli mena mo e pikopiko ke he tagata ne katofia mo ia, ko e katoua a ia, mo e pelu, mo e fana matila.
19 Ko e tua ke he tagata fakavai ke he aho matematekelea, kua tuga e nifo mapaki haia, mo e hui kua mahui.
20 Tuga ne tagata kua toka kehe e tapulu ke he aho makalili, tuga foki e vineta kua liligi ki luga he neteri, kua pihia a ia kua lologo e tau lologo ke he loto mamahi.
21 Kaeke kua fia kai a ia ne fai fi kia koe, kia fagai e koe a ia; kaeke kua fia inu a ia, kia ta age e koe kia ia e maga vai ke inu ai;
22 Ha ko e mena to ta age ai e koe e tau malala kaka ki luga he ulu hana; to taui mai foki e Iehova kia koe.
23 Ko e matagi mai he fahi tokelau kua tupu ai e uha; mo e alelo kua ekefakakelea hala kautua kua tutupu ai e tau mata ita.
24 Kua mitaki he nofo ke he hika he tua fale i luga; ka e kelea he nonofo mo e fifine favale ke he fale lahi.
25 Ko e tala mitaki mai he motu mamao, ko e maga vai momoko haia ke he tagata kua nakai fahia he fia inu.
26 Ko e vaipuna kua kalepu, mo e vaipuna kua fakakelea, kua lata ia mo e tagata tututonu kua veli ki mua he tagata mahani kelea.
27 Ko e kai lahi ke he meli, nakai mitaki ia; ke kumi foki he tau tagata ha lautolu a lilifu, nakai ko e lilifu haia.
28 Ko e tagata kua nakai pule ke he hana loto, kua lata a ia mo e maga kua maona, kua nakai fai kaupa.