Tau Fakatai 28:1-28
28 KUA hola e tagata mahani kelea ka e nakai tutuli e taha a ia; ka ko e tau tagata tututonu kua tuga ne leona a lautolu he nakai matakutaku.
2 Ko e holifono he motu ne tokologa ai hana tau iki; ka ko e tau tagata loto manamanatu mo e iloilo kua fakatuleva ai e kautu.
3 Ko e tagata nofogati kua favale atu ke he tau tagata nonofogati, kua lata a ia mo e uha ne to lahi, ka e nakai tupu ai ha mena kai.
4 Ko lautolu kua tiaki e fakatufono kua fakaheke atu a lautolu ke he tau tagata mahani kelea; ka ko lautolu kua omaoma ke he fakatufono, kua mamahi ni a lautolu kia lautolu.
5 Nakai iloa he tau tagata mahani kelea e fakafiliaga; ka ko lautolu kua kumi kia Iehova kua iloa e lautolu e tau mena oti.
6 Kua mua e mitaki he tagata nofogati kua fano mo e hana mahani hakohako, kia ia kua mahani keukeu, pete he maukoloa a ia.
7 Ko ia kua omaoma ke he fakatufono ko e tama tane iloilo a ia; ka ko ia kua kapitiga mo e tau tagata kai lotokai kua fakamā ai e ia hana matua tane.
8 Ko ia kua fakalahi e ia hana koloa he taui fakaloga mai, po ke tau mena ke fakalahi aki, kua tanaki mena ai e ia mo ia kua fakaalofa age ke he tau tagata nonofogati.
9 Ko ia kua haga kehe hana tau teliga mo e nakai fanogonogo a ia ke he fakatufono, kua eke ni mo mena vihiatia hana a liogi.
10 Ko ia kua fakahehe e tagata mahani hakohako ke he puhala kelea, to to a ia ke he luo ni hana, ka ko lautolu ne katoatoa e mitaki ha lautolu a mahani to moua e lautolu e tufaaga mitaki.
11 Kua iloilo e tagata maukoloa ke he hana ni a manatu; ka ko e tagata nofogati ne ha i ai e manamanatu, kua kumikumi e ia a ia.
12 Ka olioli e tau tagata tututonu ti lahi ai e monuina; ka ko e mena ka mamatike e tau tagata mahani kelea, ti fakamumuli e tau tagata.
13 Ko ia kua ufiufi hana tau holifono, nakai monuina a ia; ka ko ia kua fakakite mo e tiaki ai, kua ofania a ia.
14 Uhoaki e tagata kua matakutaku mau; ka ko ia kua fakamao hana loto, to veli a ia ke he mena ke matematekelea ai.
15 Tuga ne leona tagi mo e urosa kua fia kai, kua pihia e iki mahani kelea kua pule ke he tau tagata nonofogati.
16 Ko e iki kua noa mo e manamanatu, kua favale lahi foki a ia; ka ko ia kua vihiatia e velevelemena, to fakaloga ai hana tau aho.
17 Ko e tagata kua eke mo kavega hana e toto he tagata ne keli e ia, to hola atu ni a ia ke hoko ke he luo; aua neke taofi a ia.
18 Ko ia kua fano mo e mahani hakohako, to fakamoui ai a ia; ka ko ia kua mahani keukeu to veli agataha ni a ia.
19 Ko ia kua gahua ke he hana fonua to makona ai a ia he tau mena kai; ka ko ia kua mui atu ke he tau tagata matahavala, to makona a ia he tau mena ke nofogati ai.
20 Ko e tagata kua fakamoli, kua fai mena loga a ia ke monuina ai; ka ko ia kua alumaki ke maukoloa, nakai noa a ia mo e fakahala.
21 Ko e fakamailoga tagata, nakai mitaki ia; kua holifono e tagata ia ha ko e taha maga areto.
22 Ko e tagata mata nanā kua alumaki a ia he fia eke koloa a ia; ka e nakai iloa e ia to hoko age e nofogati kia ia.
23 Ko ia kua akonaki ke he tagata to ofania fakamui a ia, ke homo atu ke he tagata kua vagahau mo e fakavai.
24 Ko ia kua fofo e tau mena he hana matua tane po ke hana matua fifine, ka e pehe age a ia, Nakai ko e mena holifono ia; kua fakalataha a ia mo e tagata moumou mena.
25 Ko ia kua loto fakatokoluga, kua fakatupu ai e ia e taufetoko; ka ko ia kua tua kia Iehova, to makona ni a ia.
26 Ko ia kua tua ke he hana loto, ko e tagata goagoa a ia; ka ko ia kua fano mo e iloilo, to laveaki ai a ia.
27 Ko ia kua ta age e tau mena ke he tagata nofogati, to nakai nofogati a ia; ka ko ia kua haga kehe hana tau mata to kaialu laga loga kia ia.
28 Ka tutu ki luga e tau tagata mahani kelea ti fakamumuli ai e tau tagata; ka ko e mena ka mahaikava a lautolu, ti fakatokologa ai e tau tagata tututonu.