Tau Fakatai 30:1-33
30 KO e tau kupu a Akuru ko e tama tane a Iake; ko e tau kupu he perofetaaga ne vagahau ai e tagata kia Itielu, ko Itielu katoa mo Ukala.
2 Ko au nai ni, kua mua e goagoa haku ke he tau tagata oti; nakai ha ha ia au e pulotu he tau tagata.
3 Nakai ako foki au ke iloilo; nakai moua foki e au e iloilo ke he tau mena tapu.
4 Ko hai kia kua hake ke he lagi, mo e hifo mai ai? Ko hai kia kua fakapotopoto ai e matagi ke he hana tau lima? Ko hai kia kua pipi ai e tau vai ke he hana tapulu? Ko hai kia kua fakamau ai e tau kala he lalolagi? Ko hai kia hana higoa? Ko hai foki e higoa he hana tama tane, kaeke kua iloa e koe?
5 Ko e tau kupu oti he Atua, kua tuga ne ario kua vevehe kehe mai he kelekele; ko e akau punuti ni a ia kia lautolu kua tua kia ia.
6 Ua lafilafi e koe ke he tau kupu he hana finagalo; neke akonaki atu e ia a koe, ti talahau ai a koe, kua pikopiko.
7 Ua e mena ne ole atu ai au kia koe; aua neke lamakai mai ai a koe kia au, ka e nakaila mate au;
8 Kia tuku mamao atu e koe ia au e tau mena fakateaga mo e tau kupu pikopiko; aua neke foaki mai e koe kia au e nofogati po ke muhu mena; kia fagai e koe au ke he tau mena kai kua lata mo au.
9 Neke makona ni au mo e fakatikai e au a koe, mo e pehe age au, Ko hai kia a Iehova neke nofogati foki au, mo e kaiha e au, mo e totoku teao ai e au e higoa he haku Atua.
10 Aua neke ekefakakelea e koe ke he fekafekau ke he iki hana; neke kaialu a ia kia koe, ti nofo foki a koe mo e kelea.
11 Ha ha i ai e atu tagata kua kaialu ke he tau matua tane ha lautolu, mo e nakai fakamonuina atu e lautolu ke he tau matua fifine ha lautolu.
12 Ha ha i ai e atu tagata, piko na lautolu kua meā a lautolu; ka e nakai holoholo kehe ai ha lautolu a kelea.
13 Ha ha i ai e atu tagata kua fakaikaluga na ati kehe ha lautolu a tau mata, mo e fakatokoluga ha lautolu a tau tuamata.
14 Ha ha i ai e atu tagata ko e tau nifo ha lautolu ko e tau pelu haia, ko e tau titipi foki e tau nifo gao ha lautolu; ke kai ai a lautolu kua matematekelea ke he motu, katoa mo lautolu kua nofogati.
15 Ne tokoua e tama fifine he aluka, kua pehe mai, Kia tamai a, kia tamai a, Ko e tolu la e mena kua nakai makona, ko e fa ni e mena kua nakai pehe mai, Tokai.
16 Ko e tukuaga, ko e manava nakai fanau, ko e kelekele kua nakai makona he vai, mo e afi kua nakai pehe age, Tokai.
17 Ko e tau mata kua vā ke he matua tane, mo e vihiatia ke omaoma ke he matua fifine, to kape ai he tau oreva he pahua ia, ti kai ai he tau punua aeto.
18 Tolu la e mena kua galo kia au; ko e fa foki e mena nakai kitia e au;
19 Ko e puhala he aeto ke he pulagi; ko e puhala he gata ki luga he kaumaka; ko e puhala he foulua ke he tutavaha; mo e puhala he taane mo e tamafine tote.
20 Kua pihia ni e puhala he fifine faivao; kua kai a ia mo e holoholo ai e ia hana gutu, mo e pehe age a ia, Nakai eke e au ha mena kelea.
21 Ko e tolu e mena kua luelue ai e lalolagi; ko e fa foki e mena kua nakai maeke ke fakauka ai hanai;
22 Ko e fekafekau ka pule a ia; mo e tagata goagoa ka makona a ia he tau mena kai;
23 Ko e fifine vihiatia ka kua faitane a ia; mo e fekafekau fifine kua eke mo hakeaga he hana iki fifine.
24 Fa ni e mena kua ikiiki ke he lalolagi, ka e mua ue atu ni ha lautolu a iloilo;
25 Ko e tau lo, ko e motu nakai malolo ia, ka e taute ai e lautolu ha lautolu a tau mena kai ke he tau mafana;
26 Ko e tau sifanai, ko e motu nakai malolo ia, ka e eke ai e lautolu e tau fale ha lautolu ke he maka tumau.
27 Nakai fai patuiki e tau hē akerise, ka kua vevehe ai ni ha lautolu a kau oti he o atu a lautolu;
28 Ko e moko taliga, kua toto atu e ia ke he tau lima hana, ha ha i ai foki a ia ke he tau fale he tau patuiki.
29 Ko e tolu e mena kua fulufuluola he o; ko e fa foki kua o fakamitaki;
30 Ko e leona ne malolo he tau manu he vao; nakai liu kehe foki a ia ki mua he taha;
31 Ko e solofanua kua taute ke tau, ko e koti tane; mo e patuiki ka fakalataha mo e hana kau.
32 Kaeke kua goagoa a koe, he fakatokoluga a koe, kaeke foki kua manatu a koe ke he mena kelea, kia tuku atu a e koe hāu a lima ke he hāu a gutu.
33 Kua pehi e puke huhu ti moua ai e puke huhu tuli; ka fofota e ihu, ti hau ai e toto; ka fakalagalaga e ita ti tupu ai e taufetoko.