Tau Fakatai 31:1-31
31 KO e tau kupu he patuiki ko Lemuelu, ko e perofetaaga ne fakaako ai a ia he hana matua fifine.
2 Ko e heigoa kia haku tau kupu kia koe haku tama na e? ti heigoa haku tau kupu kia koe ne fanau mai he manava haku? ti heigoa haku tau kupu kia koe ko e tama ne omonua ai au.
3 Aua neke ta age e koe hāu a malolo ke he tau fifine, mo e hāu a tau puhala ke he mena ne malaia ai e tau patuiki.
4 Lemuelu na e, nakai lata ke he tau patuiki, nakai ni lata ke he tau patuiki ke inu uaina, po ke tau iki ke manako ke he kava;
5 Neke inu a ia, ti nimo kia ia e fakatufono, mo e liliu kehe e ia e taufetoko he taha tagata ne matematekelea.
6 Kia ta age a e kava kia ia ko e mate ha ne fai; mo e uaina kia ia ne mamahi e loto;
7 Kia inu ai a ia, mo e fakanimo e ia hana nofogati; mo e nakai manatu foki e ia ke he hana matematekelea.
8 Kia vagahau ā koe ha ko lautolu ne kuhukuhu, kia eke a e fakafiliaga ha lautolu oti ne mamate ha lautolu a tau matua.
9 Kia vagahau la, kia fakafili a e koe mo e tonu, mo e eke e fakafiliaga ha lautolu ne matematekelea mo lautolu ne nonofogati.
10 Ko e fifine mahani mitaki, ko hai kia kua moua? Kua mua ue atu e mena ke fakafua aki a ia ke he tau penina.
11 Kua tua kia ia e loto he hana tane; nakai nofogati a ia ke he tau koloa.
12 Kua mahani mitaki a ia kia ia ka e nakai mahani kelea ke he tau aho oti he hana moui.
13 Kua kumi e ia e tau fulu mamoe mo e tau lino; kua gahua ai hana tau lima mo e fiafia.
14 Kua lata a ia mo e tau foulua he tau tagata fakafua koloa; kua mamao e mena kua tamai ai e ia hana tau mena kai.
15 Kua matike a ia ka kua po agaia ni mo e ta age e ia e tau mena kai ke he hana magafaoa; mo e gahua kua kotofa ke he hana tau fekafekau fifine.
16 Kua manamanatu a ia ke he fonua, ti moua ai e ia; ko e tau fua he hana tau lima kua to ai e ia e uluvine.
17 Kua pipi e ia hana tokupu ke he malolo; kua fakamalolo ai e ia hana tau lima.
18 Kua iloa e ia kua mitaki hana tau mena fakafua; nakai mate hana lamepa ke he po.
19 Kua tuku atu e ia hana tau lima ke he akau ne vakai ai e tau kala lino; mo e toto atu hana tau lima ke he mena ne lilo aki e filo.
20 Kua fofola atu e ia hana tau lima kia lautolu ne matematekelea; kua tuku atu foki e ia hana tau lima ke he tau tagata nonofogati.
21 Nakai matakutaku a ia he kiona ha ko e hana magafaoa; ha kua tapulu ai hana magafaoa oti ke he tau tapulu kula momoho.
22 Kua eke e ia e tau ie kafu māna; ko e ie lino mo e ie kula uhi, ko e hana tau tapulu haia.
23 Kua iloa hana tane ke he tau gutuhala, ka nofo ai a ia fakalataha mo e tau patu he motu.
24 Kua eke e ia e tau tapulu lino, mo e fakafua ai e ia; kua ta age foki e ia e tau pipi ke he tagata fakafua koloa.
25 Ko e malolo mo e lilifu kua eke ia mo tau tapulu hana; kua kata foki a ia ke he tau aho kua toka mai i mua.
26 Kua vagahau a ia mo e iloilo; ha ha i ai ke he hana alelo e fakatufono he fakaalofa.
27 Kua kitekite fakamitaki a ia ke he tau mahani he hana magafaoa; nakai kai foki a ia e tau mena kai mo e mahani teva.
28 Kua tutu mai e fanau hana mo e fakaaue atu kia ia; ko e hana tane foki kua fakaheke atu kia ia, kua pehe age.
29 Tokologa e fifine ne mahani mitaki, ka e homo atu a koe kia lautolu oti.
30 Ko e fulufuluola ko e fakavai haia, ko e tino mitaki ko e mena fakateaga haia; ka ko e fifine kua matakutaku kia Iehova, to fakaheke atu ni kia ia.
31 Kia ta age kia ia e tau fua he hana tau lima; ko e hana tau gahua foki ke fakaheke atu kia ia ke he tau gutuhala.