Tau Fakatai 4:1-27
4 KIA fanogonogo mai a a mutolu ma fanau na e, ke he tau kupu fakaako he matua tane ha mutolu, mo e hahaga mai a mutolu kia fakalotomatala e au a mutolu.
2 Ha kua ta atu e au kia mutolu e iloilo mitaki; aua neke tiaki e mutolu haku a tau kupu ne fakaako atu.
3 Ha ko au nai, ko e tama he haku matua tane, ko e tama fakahele, ko e tama fuataha he haku matua fifine.
4 Ne fakaako mai e ia au, mo e pehe mai a ia kia au, Kia taofi a e koe haku a tau kupu ke he loto hāu, kia omaoma a koe ke he haku a tau poaki ti moui ai a koe.
5 Kia moua e koe e iloilo, ti moua e koe e pulotu; aua neke nimo ia koe e tau mena na; aua neke fano kehe a koe mo e tau kupu he gutu haku.
6 Ua tiaki e koe a ia, ti leveki ai e ia a koe; kia fakaalofa a koe kia ia, ti leoleo ai e ia a koe.
7 Ko e iloilo ko e mena ne mua ue atu haia, kia moua e koe e iloilo; ko e tau mena oti ne moua e koe, kia moua mai ai e koe e pulotu.
8 Kia fakaheke ā kia ia, ti fakamatalahi ai e ia a koe; to fakalilifu ai e ia a koe ka peka a koe kia ia.
9 To ta atu e ia e foufou fulufuluola ke he ulu hāu; ko e foufou lilifu ke ta atu ai e ia kia koe.
10 Kia fanogonogo mai a, haku tama na e, mo e talia e koe haku tau kupu, ti fakaloga ai e, tau tau he hāu a moui.
11 Kua fakaako atu e au kia koe e puhala he iloilo; kua takitaki e au a koe ke he tau puhala hakohako.
12 Ka fano a koe nakai fakaapiapi e mena kua fano ai a koe; kaeke ke poi foki nakai tupetupe a koe.
13 Kia taofi e koe ke mau e tau kupu ne fakaako atu ai a koe, aua neke tiaki e koe; kia omaoma a koe ki ai; ha ko e hāu a moui haia.
14 Aua neke fano a koe ke he puhala he tau tagata hala; ti ua fina atu ai ke he puhala he tau tagata mahani kelea.
15 Kia fakamamao a mo e puhala na, aua neke fina atu ai a koe, kia kalo kehe a, mo e fano kehe ai.
16 Ha ko e mena nakai momohe a lautolu kaeke kua nakai eke e lautolu e tau mena kelea; kua uta kehe foki ia lautolu e mohe kaeke kua nakai fakatupetupe ai e lautolu falu.
17 Ha kua kai e lautolu e areto he hala; kua inu foki e lautolu e uaina he favale.
18 Ka ko e puhala he tau tagata tututonu, kua lata ia mo e maama he aho, kua tupu tolomaki atu hana maama ke hoko ke he tupoula.
19 Ko e puhala he tau tagata mahani kelea kua lata ia mo e pouli; nakai iloa e lautolu e mena ne tupetupe ai a lautolu.
20 Haku tama na e, kia fanogonogo mai a koe ke he haku a tau kupu; kia haga mai hāu a tau teliga ke he tau mena ke vagahau atu ai au;
21 Aua neke toka kehe mo e tau mata hāu e tau mena ia; kia taofi ai e koe ki loto he loto hāu;
22 Ha ko e tau mena ia ko e moui haia kia lautolu ka moua; mo e mena ke malolo ai ha lautolu a tau tino oti.
23 Kia mua he leveki e koe e loto hāu ke he tau mena oti kua leveki ai; ha kua tupu mai ai e mahani.
24 Kia tuku kehe ia koe e gutu kua fakakeukeu; mo e tau laugutu faliuliu kia mamao ia koe ia.
25 Kia kitekite fakahako atu hāu a tau mata ki mua hāu; mo e hagao fakatonu hāu a tau tuamata ki mua hāu.
26 Kia fakamolemole a e puhala ma e tau hui hāu; kia taute ai foki hāu a tau puhala oti.
27 Aua neke afe a koe ke he fahi matau po ke fahi hema; kia kalo kehe e tau hui hāu mo e kelea.