Tau Fakatai 5:1-23
5 HAKU tama na e, kia fanogonogo mai a koe ke he haku a iloilo; kia fakateliga mai a koe ke he haku a pulotu.
2 Kia omaoma a koe ke he loto manamanatu; mo e leveki he tau laugutu hāu e iloilo.
3 Ha kua hihina hifo e meli mai he tau laugutu he fifine kehe; kua mua foki e molemole he hana gutu ke he puke lolo;
4 Ka e kona fakamui a ia tuga e laena; kua matila a ia po ke pelu ne matila fakafahiua.
5 Kua o hifo hana tau hui ke he mate; kua hohoko atu hana tau lakaaga ki Seoli.
6 Ti nakai moua ai e ia e puhala molemole he moui; ko e mena ia kua hehe fano ai a ia ke he hana tau puhala, ka e nakai iloa e ia.
7 Hanai, ma fanau na e, kia fanogonogo mai a mutolu kia au; aua neke kalo kehe foki a mutolu mo e tau kupu he haku gutu.
8 Kia fakamamao mo ia e puhala hāu; aua neke fakatata foki a koe ke he gutuhala he hana fale;
9 Neke uta e koe hāu a fulufuluola ke he falu, mo e hāu a tau tau kia lautolu ne favale;
10 Neke makona ai e tau tagata kehe ke he hāu a tau koloa; neke ha i ai foki ke he tau fale he tau tagata kehe e tau mena ne fakafitā ai a koe;
11 Ti oi ai a koe ke he hāu a vaha fakamui, ka kua fakaoti ai hāu a tino oti,
12 Mo e pehe age a koe, Ne fakavihia lahi ni e au e ako mena, mo e totoko atu e loto haku ke he akonakiaga;
13 Nakai fanogonogo foki au ke he tau kupu ha lautolu ne fakaako mai kia au; nakai fakateliga atu foki au kia lautolu ne fakaako mai kia au.
14 Toe tote ni, ti katoatoa e tau mena kelea ha ha i ai au, ki mua he tutuutaaga mo e fakapotopotoaga.
15 Kia inu e koe e maga vai mai he vai hāu, mo e vai ne tafe mai ai he vaikeli hāu.
16 Ke fakapuā kia hāu a vaipuna, mo e tafe ai kia e tau vailele ke he tau male?
17 Kia eke ai māu tokotaha ni; ka e aua neke fakalataha mo koe ha tagata kehe.
18 Kia monuina hāu a vaipuna, mo e fiafia a koe ke he hoana ne faihoana ai a koe ke he hāu a vaha fuata.
19 Kia tuga ne aila fakahele a ia, mo e samoi fulufuluola; kia makona a koe ke he hana tau huhu ke he tau aho oti; ti fiafia mau a koe ke he hāu a fakaalofa kia ia.
20 Haku tama na e, ke fiafia he ha a koe ke he fifine kehe; mo e falanaki ai a koe ke he fatafata he fifine kehe?
21 Ha ko e mena ha ha i mua he tau fofoga a Iehova e tau puhala he tagata; ne fakamolemole foki e ia hana tau puhala oti.
22 Kua moua e tagata hala ke he tau mahani kelea ni hana; kua taofi a ia he tau afo he hana tau hala.
23 To mate a ia ka e nakai fakaako ai a ia; ko e lahi ni hana goagoa, ti hehe ai a ia.