Tau Fakatai 7:1-27
7 HAKU tama na e, kia omaoma a koe ke he tau kupu haku, mo e toka ai ia koe haku a tau poaki.
2 Kia omaoma a koe ke he tau poaki haku, ti moui ai a koe, mo e haku a tau fakatufono ke tuga ne alito mata hāu.
3 Kia pipi ai e koe ke he tau matalima hāu; kia tohi ai e koe ke he lapatohi he loto hāu;
4 Kia pehe age a koe ke he iloilo, Ko e mahakitaga haku a koe; mo e ui e koe e pulotu ko e hāu a magafaoa haia.
5 Kia leveki a koe mai he fifine kehe, ko e fifine kehe kua fakavai ke he hana tau kupu.
6 Ha ko e fakamaama he haku a fale, ne kitekite atu ai au mai he mena ne fakapupu he fakamaama;
7 Ne kitekite age au ke he tau tagata goagoa; ti kitia ai e au ke he fanau taha fuata, kua nakai fai manamanatu;
8 Ne fina age a ia ke he puhala kua tata age ke he mafegahala ne nofo ai e fifine; ti fano ai a ia ke he puhala ke he fale hana,
9 Ke he magaaho mahegihegi he afiafi, ke he tuloto po, ke he pouli;
10 Ti kitiala, ne feleveia mo ia e fifine ne tapulu ai ke he tau tapulu he fifine faivao, ha ha ia ia foki e loto fakavai;
11 Kua falea a ia, to matauka a ia, ti nakai tumau hana tau hui ke he fale hana.
12 Ko e taha magaaho ha ha he puhala a ia, ko e taha magaaho ha ha he tau male a ia; ne lamalamati foki e ia tata age ke he tau mafegahala oti.
13 Ti tapaki e ia a ia, mo e figita kia ia, mo e mata nakai mā ne pehe age a ia kia ia;
14 Ha ha ia au e tau poa fakaaue; ko e aho nai kua ta age e au e tau mena ne omonuo ai au.
15 Ko e mena ia ne hau ai au, ke feleveia a taua mo koe; kua kumi e au a koe, ti kua moua e au a koe.
16 Kua faliki tuai e au haku a moheaga ke he tau ie kafu, ko e tau ie avaava ne ta mai i Aikupito.
17 Kua fakamanogi e au haku a moheaga ke he muro, mo e aloe, mo e kinamoni;
18 Hau ā kia makona ai a taua he fakaalofa, ato hoko ke he aho a pogipogi, kia fiafia ai a taua ke he feofanaki.
19 Ha kua nakai ha ha i ai haku taane ke he hana fale; kua fano fenoga a ia ke he mena mamao.
20 Ne uta ai e ia e kofukofu tupe he fano; to hau a ia ke he hana magafaoa ke he aho ka kau ai e mahina.
21 Ne fakahehe e ia a ia ke he hana tau lagatau loga; ne toho e ia a ia ke he hana tau laugutu fakavai.
22 Kua mui age agataha a ia kia ia, tuga ne povi kua fano ke tamate; ke tuga ne tagata goagoa foki kua fano ke akonaki ai ke he tau liliaga;
23 Ato tuina ai hana ate ke he fana ti ati ni, tuga ne alumaki atu e manu lele ke he matahele; ka e nakai iloa e ia kua taute ia ke mate ai a ia.
24 Hanai, ko e fanau na e, kia fanogonogo mai a mutolu kia au; kia haga mai a a mutolu ke he tau kupu he haku gutu;
25 Aua neke afe atu hāu a loto ke he hana tau puhala; aua neke fano kehe a koe ke he hana tau puhala loto.
26 Ha ko e tokologa kua kafokia ne liti hifo e ia; ko e tau tagata malolo oti ne kelipopo e ia.
27 Ko e fale hana ko e puhala ki Seoli haia, kua hifo ai ke he tau ana he mate.