Tau Fakatai 8:1-36
8 NAKAI kia ui mai e iloilo, mo e leo lahi mai e pulotu?
2 Kua tu a ia ke he tapunu he tau mena tokoluga ke he mena ne fina age ai he puhala, ke he mafegahala;
3 Kua ui fakaleolahi a ia ke he tapa he tau gutuhala, he puhala he maga, ke he mena ne huhu atu ai he tau gutuhala.
4 Kua ui atu au kia mutolu ko e tau tagata na e; mo e leo lahi atu au ke he fanau he tau tagata.
5 Ko mutolu ne magaogao kia iloa e mutolu e tau lagatau; mo mutolu ne goagoa kia loto matala a a mutolu.
6 Kia fanogonogo mai a a mutolu ha ko e mena to vagahau atu e au ke he tau mena mitaki ue atu; to vagahau atu haku tau laugutu ke he tau mena tonu.
7 Ha ko e mena vagahau mo e fakamoli haku gutu; ka ko e mahani kelea, kua vihiatia ia he haku a tau laugutu.
8 Ko e tau kupu oti he haku gutu ko e tonu haia; nakai ha ha i ai ha kupu keu mo e kupu fakavai.
9 Kua hakohako oti ni kia ia kua logona; kua tonu foki kia lautolu kua moua e iloilo.
10 Kia talia e mutolu haku a fakaako atu, ka e aua neke talia e ario; mo e talia e iloilo kua mua ia ke he auro kua homo he mitaki.
11 Ha kua mua e mitaki he iloilo ke he tau penina; ko e tau mena fakafiafia oti foki nakai tatai mo ia.
12 Ko au ko e iloilo, kua nonofo a maua mo e pulotu; kua moua foki e au e iloilo ke he tau lagatau.
13 Ko e matakutaku kia Iehova ko e fakavihia ke he mahani kelea haia; ko e mahani fakatokoluga mo e fakaikaluga, mo e mahani kelea, mo e gutu fakavai kua fakavihia e au ki ai.
14 Ha ha ia au e pule mo e iloilo; ko au nai ko e pulotu, ha ha ia au e malolo.
15 Ko au ne eke ai mo patuiki he tau patuiki; kua pule tonu ai foki e tau iki.
16 Ko au ne pule ai e tau tui mo e tau iki, ko e tau fakafili oti ni he lalolagi.
17 Kua fakaalofa atu au kia lautolu kua fakaalofa mai kia au; ko lautolu foki kua kumi fakamakutu kia au, to moua e lautolu au.
18 Ha ha ia au e koloa mo e lilifu; ko e koloa tumau ni mo e mahani tututonu.
19 Kua mua e mitaki e tau fua haku ke he auro, ko e auro mitaki ni; ko e tau mena foki ke tutupu mai ia au, kua mua hana mitaki ia ke he ario ne homo.
20 Kua fano au ke he puhala he tututonu, ke he tau puhala loto he fakafiliaga;
21 Kia ta age e au e koloa kia lautolu kua fakaalofa mai kia au, kia eke ma lautolu; to fakapuke foki e au e tau mena kua tatanaki ai ha lautolu a tau koloa.
22 Ne eke e Iehova au, ko e kamataaga, he hana tau puhala, ko e fakamua ni he hana tau gahua ne aho mua.
23 Ne fakauku ai au mai i tuai tigahau, mai he kamataaga, ka e nakaila ha ha i ai e lalolagi.
24 Ne fanau au ka e nakaila ha ha i ai e tau mena hokulo; ka e nakaila fai vaipuna foki ne puna lahi mai ai e vai;
25 Ne fanau au, ka e nakaila fakave ai e tau mouga; nakaila ha ha i ai foki e tau matiketike;
26 Kua nakaila eke e ia e kelekele mo e vao, mo e kamataaga he efuefu he lalolagi.
27 Ne ha i ai au he fakamau e ia e lagi, he tohi takai ai e ia ki luga he kili moana.
28 He fakamau e ia e tau aolagi i luga; he fakamau ai e ia e tau vaipuna he moana.
29 He kotofa ai e ia e katofia he tahi, kia nakai lofia hana mataafaga he puke tahi; he kotofa ai e ia e tau fakaveaga he lalolagi;
30 Ti ha ha i ai au mo ia, ko au ko e tufuga; ne eke foki au mo fiafia hana ke he taha aho mo e taha aho; ne olioli mau au ki mua hana ke he tau aho oti ni.
31 Ne olioli ai au ke he tau mena kua nonofo ai e tau tagata he hana lalolagi; ko e haku a fiafia foki, ha ha i ai ke he fanau he tau tagata haia.
32 Hanai, ko e fanau na e, kia fanogonogo mai ā kia au; ha kua monuina a lautolu kua omaoma ke he haku a tau puhala.
33 Kia fanogonogo mai a mutolu ke he tau mena kua fakaako atu, kia iloilo ai a mutolu, ka e aua neke tiaki e mutolu.
34 Uhoaki e tagata kua fanogonogo mai kia au; kua mataala ke he haku a tau gutuhala ke he taha aho mo e taha aho; kua leoleo ke he tau pou he tau gutuhala haku.
35 Ha ko ia kua moua au, kua moua e ia e moui; to moua foki e ia e fakaalofa mai ia Iehova.
36 Ka ko ia kua hala kia au kua moumou e ia hana moui; ko lautolu oti kua fakavihia mai kia au, kua manako a lautolu ke he mate.