Tau Fakatai 9:1-18
9 KO e iloilo, kua ta e ia hana fale, kua talai ai e ia hana tau pou ne fitu.
2 Kua tamate e ia hana tau manu; kua taute e ia hana uaina; kua fakatokatoka atu foki e ia e tau mena ke he hana laulau.
3 Kua fakafano atu e ia hana tau fekafekau fifine; kua ui ai a ia ke he tau mena tokoluga he maga.
4 Ko hai kia kua magaogao, kia afe mai a ia ki hinei; ko ia kua nakai fai manamanatu, kua pehe age a ia kia ia,
5 O mai ā, kia kai e mutolu haku areto, mo e inu ā e uaina haku kua taute e au.
6 Ko mutolu ne goagoa, kia tiaki atu a e mahani goagoa, ti momoui ai a mutolu; mo e o atu a a mutolu ke he puhala ke pulotu ai.
7 Ko ia kua akonaki atu ke he tagata fa va kua moua ai e ia e mā; mo ia kua taufetoko mo e tagata mahani kelea to moua ai e ia e ila.
8 Aua neke akonaki atu a ko e ke he tagata fa vā, neke vihiatia e ia a koe; kia akonaki atu ke he tagata iloilo ti fakaalofa mai a ia kia koe.
9 Kia fakaako atu ke he tagata iloilo ti au atu ai he iloilo a ia; kia fakaako atu ke he tagata tututonu ti tolomaki atu hana iloilo.
10 Ko e matakutaku kia Iehova ko e kamataaga he iloilo haia; ke iloa foki a ia ne Tapu, ko e pulotu ni haia.
11 Ha ko au ke fakaloga ai hau a tau aho; ke lafilafi atu foki e au e tau tau ke he moui hāu.
12 Kaeke kua iloilo a koe kua iloilo ni a koe māu; kaeke kua fa va a koe, ko koe ni hoko koe kua nofo ai mo e hala.
13 Ko e fifine goagoa, kua tapāā a ia, kua goagoa ni a ia, nakai iloa e ia ha mena.
14 Kua nofo a ia ke he gutuhala he hana fale, ki luga he nofoa ke he tau mena tokoluga he maga;
15 Ke ui age a ia kia lautolu kua o age he puhala, ko lautolu ne o fakahakohako ke he tau puhala ha lautolu.
16 Ko ia kua magaogao, kia afe mai a ia ki hinei; ko ia kua nakai fai manamanatu, kua pehe age a ia kia ia,
17 Kua humelie e magavai kua kaiha, kua manogi foki e areto kua kai fufu.
18 Ka e nakai iloa e ia ha ha i ai ke he mena ia e tau agaga ha lautolu kua mamate; ha ha i ai ke he tau mena hokulo i Seoli a lautolu kua ui ai e ia.