Tau Salamo 10:1-18
10 IEHOVA na e, ko e ha kia ne tu mamao mai ai a koe? mo e fakamumuli he ha ke he tau vaha matematekelea?
2 Ko e fakatokoluga he tau tagata mahani kelea kua favale ai kia lautolu kua matematekelea; kua moua a lautolu ke he tau lagatau ne manatu ki ai a lautolu.
3 Ha kua nava e tagata mahani kelea ke he tau manako he hana loto; ko ia ne velevelemena kua fakamonuina e ia a ia, kua vihiatia e ia e Iehova.
4 Ko e fakatokoluga he mata he tagata mahani kelea kua nakai kumi ai e ia; ko e hana tau manatu oti, Kua nakai fai Atua.
5 Kua monuina hana tau puhala ke he tau vaha oti; kua tokoluga hāu a tau fakafiliaga, nakai kitia e ia; kua ulo e ia kia lautolu oti kana kua ita kia ia.
6 Kua pehe hifo a ia ke he hana loto, Nakai fagahuatia au; nakai hoko kia au ha mena kelea tukulagi tukumuitea.
7 Kua puke hana gutu ke he kaialu, mo e fakavai, mo e favale; ha i lalo hana alelo e fakamamahi, mo e mahani hepehepe.
8 Kua nofo a ia ke he mena takahao he tau maga, kua kelipopo e ia ke he tau mena galo a lautolu kua nakai hala; ne takahao hana tau mata kia ia kua matematekelea.
9 Kua takahao a ia ke he mena galo, tuga ne leona ke he hana ana; kua takahao a ia ke tapaki e tagata matematekelea; kua tapaki e ia a ia ne matematekelea he toho mai e ia a ia ke he hana kupega.
10 Kua palu hifo a ia he malipilipi, kua veveli foki a lautolu ne matematekelea ke he hana hau malolo.
11 Kua pehe hifo a ia ke he hana loto, Kua nimo ke he Atua; kua ufiufi hana fofoga; nakai tuai fioia e ia tukulagi.
12 Iehova na e, kia tu mai a; ko e Atua na e, kia nikiti hāu a lima, aua neke nimo ia koe a lautolu ne matematekelea.
13 Ko e ha kia ne vihiatia ai e Atua he tagata mahani kelea? Kua pehe hifo ke he hana loto, Nakai tuai kumi e koe.
14 Kua fioia tuai e koe, ha ko koe ni kua kitekite ke he mamahi mo e ita ke tuku mai ai ke he hāu a lima; ko e tagata matematekelea kua tuku atu e ia a ia kia koe; ko koe ni ko e lagomatai hana kua nakai fai matua.
15 Kia fafati e koe e lima he tagata mahani kelea; mo e tagata hepehepe foki, kia kumi e koe hana tau mahani kelea ato nakai tuai fioia ai e koe.
16 Ko Iehova, ko e Patuiki a ia tukulagi tukumuitea; kua mahaikava e tau motu kehe mai he hana kelekele.
17 Iehova na e, kua logona tuai e koe e manako he tau tagata matematekelea; kua fakamau e koe ha lautolu a tau loto, kua haga ki ai hāu a na teliga;
18 Kia fakafili ai e koe a ia kua nakai faimatua, mo ia kua pehia he favale; kia nakai fakamatakutaku mai fakaoti he tagata he kelekele.