Tau Salamo 103:1-22
103 HAKU agaga na e, kia fakamonu atu kia Iehova, ko e tau mena oti foki ha i loto ia au, kia fakamonu atu ke he hana higoa tapu.
2 Haku agaga na e, kia fakamonu atu kia Iehova, aua foki neke nimo ia koe ha mena taha he hana tau mena fakaalofa;
3 Ko ia kua fakamagalo hāu a tau mahani hepehepe oti, ko ia kua fakamaulu hāu a tau gagao oti kana;
4 Ko ia kua laveaki hāu a moui mai he tukuaga; ko ia kua fakafoufou a koe ke he fakaalofa mo e fakaalofa hofihofi;
5 Ko ia kua makona ai hāu a manako ke he tau mena mitaki; ti fakafou ai hau a fuata tuga ne aeto.
6 Kua eke e Iehova e tau mena tonu, mo e fakafiliaga ma lautolu oti kua pehia he favale.
7 Ne fakailoa e ia hana tau puhala kia Mose; mo e hana tau gahua ke he fanau a Isaraela.
8 Kua fakaalofa hohofi mo e fakaalofa noa mai a Iehova; kua fakatuai hana ita, ka e lahi ni hana fakaalofa.
9 Nakai totoko mau e ia; nakai taofi tukulagi hana ita.
10 Nakai eke e ia kia tautolu ke lata mo e ha tautolu a tau hala; nakai taui foki e ia a tautolu ke lata mo e ha tautolu a tau mahani hepehepe.
11 Ha ko e mena tuga ne lagi kua tokoluga ke he lalolagi, kua pihia ni e lahi he hana fakaalofa kia lautolu kua matakutaku kia ia.
12 Tuga ne vaha mamao e fahi uta mo lalo, kua fakamamao pihia e ia ia tautolu ha tautolu a tau holifono.
13 Tuga ne hofihofi e fakaalofa he matua ke he hana fanau, kua hofihofi pihia e fakaalofa a Iehova kia lautolu kua matakutaku kia ia,
14 Ha kua fioia e ia e mena ne eke aki a tautolu; kua manatu e ia ko e kelekele ni a tautolu nai.
15 Ko e tagata, tuga ne tau motietie hana tau aho; tuga e fiti mai he vao, pihia ni he fiti mai a ia.
16 Ha kua agi e matagi ki ai, ti nakai ha i ai a ia; nakai tuai iloa foki a ia ke he mena ha i ai a ia.
17 Ha ko e fakaalofa a Iehova mai i tuai ia, to tukulagi foki ia kia lautolu kua matakutaku kia ia; to hoko atu foki hana a tututonu ke he fanau he ha lautolu a fanau,
18 Kia lautolu kua omaoma ke he hana maveheaga, ko lautolu kua manatu hana tau poaki ke eke ai.
19 Kua fakatu e Iehova hana nofoaiki ke he lagi, kua pule okooko foki hana kautu.
20 Kia fakamonu atu kia Iehova a mutolu, ko e hana tau agelu, ko mutolu kua malolo lahi, ko mutolu kua eke hana tau fekau, kua fanogonogo ke he hana tau kupu.
21 Kia fakamonu atu kia Iehova a mutolu ko e hana kau oti kana, ko mutolu ko e hana tau fekafekau, ko mutolu kua eke hana finagalo.
22 Kia fakamonu atu kia Iehova e tau mena oti kua eke e ia ke he tau mena oti kua pule a ia ki ai. Haku agaga na e, kia fakamonu atu kia Iehova.