Tau Salamo 104:1-35
104 HAKU agaga na e, kia fakamonu atu a koe kia Iehova; Iehova na e, haku Atua, kua homo ue atu ni a koe, kua tapulu a koe ke he fakahekeaga mo e fulufuluola.
2 Kua fakatapulu e koe a koe ke he maama tuga ne tapulu lahi; kua fofola e koe e lagi tuga ne ie ke puipui aki.
3 Kua eke e ia hana tau fale i luga ke he vai; kua eke e ia e tau aolagi mo nofoa fakataveli hana; kua haele fano a ia ke he tau tapakau he matagi.
4 Ko ia ne eke e tau matagi mo tau agelu hana, ko e afi puhopuho mo tau fekafekau hana.
5 Ko ia ne fakave e lalolagi ki luga he hana tau fakave, kia nakai tuai gahuahua a ia tukulagi tukumuitea.
6 Kua ufiufi e koe a ia ke he moana tuga ne tapulu: ko e vai foki kua lofia ai e tau mouga.
7 Ko e hāu a akonaki kua hola ai a ia, ko e leo he hāu a pakulagi kua fakatepetepe ni a ia.
8 Kua hake a ia ke he tau mouga, kua hifo ke he tau pahua, ke hoko ke he mena ne taute e koe ke o ki ai.
9 Kua tuku e koe e katofia ki ai kia nakai puā ai a ia, kia nakai liu a ia ke fakapuke e kelekele.
10 Kua fakafano atu e ia e tau vai puna ke he tau pahua; kua lele ni ke he vaha he tau mouga.
11 Kua inu ai e tau manu oti he vao, kua makona ai e tau asini vao.
12 Kua nonofo ki luga ai e tau manu lele, kua logona ha lautolu a leo ke he vaha he tau akau.
13 Kua fakamalū e tau mouga mai he hana tau fale ki luga; ko e tau fua he hāu a tau gahua kua makona ai e kelekele.
14 Kua fakatupu e ia e tau motie ke kai he tau manu huifa, katoa mo e tau lau kou ke gahua ai e tau tagata; ke tupu mai e tau mena kai mai he kelekele;
15 Mo e uaina ke fakafiafia ai e tau loto he tau tagata, kia kikila ai e tau mata ha lautolu ke mua ke he kikila he lolo, ko e mena kai foki ke fakamalolo e tau loto he tau tagata.
16 Kua makona e tau akau a Iehova, ko e tau arasi a Lepanona ne to e ia.
17 Kua eke ai e tau manu lele ikiiki ha lautolu a tau fata; ko e kasita ha he perosi hana fale.
18 Ko e tau mouga tokoluga ma e tau koti vao ia; ko e tau maka tumau ko e tau mena haia ke malu ai e tau sifanai.
19 Ne eke e ia e mahina ke kotofa ai e tau aho; kua iloa he la e mena ke to ki ai.
20 Kua eke e koe e pouli, ti po ai ni, kua totolo mai ai e tau manu favale oti he vao.
21 Kua tagi e tau punua leona he fia hēhē manu, ti kumi ni e lautolu ke he Atua ha lautolu a mena kai.
22 Kua hake e la, ti fakapotopoto ai a lautolu, mo e takoto ke he tau ana ha lautolu.
23 Kua fina atu ai e tagata ke he hana gahua, mo e hana mena ke eke ato afiafi.
24 Iehova na e, kua loga ue atu hāu a tau gahua! Ne eke e koe e tau mena oti ia mo e iloilo, kua puke e lalolagi ke he hāu a tau mena.
25 Ko e hanai e tahi lahi foki, kua laulahi ni, ha i ai e tau mena totolo nakai maeke ke totou, ko e tau mena momoui ikiiki katoa mo e tau mena lalahi.
26 Kua o fano ai e tau foulua; ko e leviatana foki ne eke e koe ke fefeua i ai.
27 Kua tatali atu e tau mena oti ia kia koe kia ta atu e koe ki ai ha lautolu a tau mena kai ke he tau aho ke lata ai;
28 Kua ta atu ai e koe, kua okooko e lautolu; kua fakamafola e koe hāu a lima, kua makona ai a lautolu ke he tau mena mitaki.
29 Kua haga kehe hāu a fofoga, ti fakahakuhaku a lautolu; kua uta kehe e koe ha lautolu a fafagu, ti mamate ai a lautolu, kua liu ke he kelekele.
30 Kua fakafano atu e koe hāu a Agaga, kua eke a lautolu; kua liu foki fakafou e koe e fuga kelekele.
31 Kia tumau e lilifu a Iehova tukulagi; kia fiafia a Iehova ke he hana tau mena ne eke.
32 Kua kitekite mai a ia ke he lalolagi, ti vivivivi ai a ia; ka piki atu a ia ke he tau mouga, ti ahua ai ni a lautolu.
33 To lologo atu au kia Iehova ke he haku a mouiaga nai; to uhu lologo au ke he haku Atua ka kua moui au.
34 To mitaki haku a manamanatu kia ia; to fiafia ni au kia Iehova.
35 To fakaoti e tau tagata hala mai he lalolagi, ti nakai tuai ha i ai e tau tagata mahani kelea. Haku agaga na e, kia fakamonu atu kia Iehova. Haleluia.