Tau Salamo 106:1-48
106 HALELUIA. Kia fakaheke atu a mutolu kia Iehova, ha kua mitaki ni a ia; ha kua tukulagi ni hana fakaalofa.
2 Ko hai kia kua maeke ke talahau e tau mana a Iehova? Ko hai ke fakailoa hana tau fakahekeaga oti kana?
3 Uhoaki a lautolu kua taofi e fakafiliaga, ko lautolu kua mahani tututonu ke he tau aho oti.
4 Kia manatu mai kia au, Iehova na e, ke lata mo e hāu a finagalo fakaalofa ke he hāu a tau tagata. Kia ahi mai e koe au mo e hāu a fakamouiaga;
5 Kia kitia ai e au e monuina ha lautolu ne fifili e koe, kia fiafia ai au ke he fiafia he haku motu; kia kolikoli ai au fakalataha mo e hāu a tau tagata.
6 Kua hala a mautolu katoa mo e ha mautolu a tau matua, kua mahani hepehepe a mautolu, kua mahani kelea a mautolu.
7 Kua nakai manamanatu he tau matua ha mautolu hāu a tau mana i Aikupito; kua nakai manatu e lautolu e loga he hāu a tau mena fakaalofa; ka kua fakafualoto a lautolu he tata age ke he tahi, ko e Tahi Kula ia.
8 Ka kua fakamoui e ia a lautolu ha ko e hana higoa, kia fakailoa atu ai hana malolo.
9 Ne akonaki e ia e Tahi Kula, ti momo ai; ne uta e ia a lautolu ke he tau mena hokulo tuga ne vao.
10 Ne fakamoui e ia a lautolu mai he lima hana kua fakavihia mai, mo e laveaki ai e ia mai he lima hana kua fai fi kia lautolu.
11 Ka kua tanumia he tahi a lautolu ne favale kia lautolu; nakai toe taha ia lautolu.
12 Ti talia fakatonu ai e lautolu hana tau kupu, kua lologo e lautolu hana fakahekeaga.
13 Kua nimo vave ia lautolu hana tau mena kua eke; nakai leo a lautolu ke he hana pule.
14 Ne manako lahi a lautolu ke he taha mena ke he tutakale, ne kamatamata foki ke he Atua ke he vao.
15 Ti foaki atu ai e ia kia lautolu e mena ne ole atu ai e lautolu; ka kua fakatupu e ia e pipili ke he tau tino ha lautolu.
16 Ne mahekeheke a lautolu kia Mose ke he heaga api, mo Arona ko e tagata tapu a Iehova.
17 Kua fakamaga e kelekele, ti folo fua ai a Tatano mo e tanumia a lautolu ne fakalataha mo Apiramo.
18 Ne vela foki he afi ha lautolu a fakapotopotoaga, kua huhunu ke he afi puhopuho a lautolu ne mahani kelea.
19 Ne eke e lautolu e punua povi i Horepa, ne hufeilo foki a lautolu ke he tupua lapatoa.
20 Ne fehikitaki e lautolu ha lautolu a lilifu mo e fakatino he povi kai motietie.
21 Kua nimo ia lautolu a Atua ko e ha lautolu a fakamoui, ko ia ne eke e tau mena lalahi i Aikupito.
22 Ko e tau mana ke he motu a Hamo, mo e tau mena matakutakuina ke he Tahi Kula.
23 Ti vagahau ai a ia ke fakaotioti ai e ia a lautolu, aua a Mose, ko e hana tagata fifili, ne tu ki mua hana ke he mena kua malŏlŏ, ti mafoki kehe ai hana ita, nakai fakaotioti e ia a lautolu.
24 Ne tiaki e lautolu e motu fulufuluola; kua nakai talia e lautolu hana vagahau;
25 Ka e loma ni a lautolu ke he ha lautolu a tau fale ie; ti nakai fanogonogo a lautolu ke he kupu a Iehova.
26 Ti nikiti ai e ia hana lima kia lautolu ke keli a lautolu ke he tutakale;
27 Kia keli foki ha lautolu a fanau ke he tau motu kehe, mo e fakatafola a lautolu ke he tau motu.
28 Ne fakalataha foki a lautolu mo Paalapeoro, mo e kai e lautolu e tau poa ne uta kia lautolu kua mamate.
29 Ne fakahogohogomanava a lautolu kia ia ke he tau mena ha lautolu ne fa eke; ti tupu mai ai ia lautolu e tatalu.
30 Ti tu mai ai a Fineaso, mo e eke e fakafiliaga; ti motuhia ai e tatalu.
31 Ti talahaua foki e mena ia kia ia mo tututonu ke he taha hau mo e taha hau tukumalagi.
32 Ne fakatupu foki e lautolu hana ita ke ha vai, ko Meripa, ne kelea ai foki a Mose ha ko lautolu.
33 Ha kua fakahogohogomanava e lautolu a ia, ti vagahau fakatepetepe a ia ke he hana tau laugutu.
34 Nakai fakaotioti e lautolu e tau motu ne tala age ai e Iehova kia lautolu.
35 Ka e nonofo fiofio a lautolu mo e tau motu kehe, ti fakamahani ni a lautolu ke he ha lautolu a tau mahani.
36 Ne fekafekau foki a lautolu ke he tau tupua ha lautolu; kua eke foki ia mo hele kia lautolu.
37 Ne eke foki e lautolu ha lautolu a tau tama tane mo e ha lautolu a tau tama fifine mo poa ke he tau temoni.
38 Mo e fakamaligi e lautolu e toto ha lautolu kua nakai hala, ko e toto he tau tama tane ha lautolu mo e tau tama fifine ha lautolu, he ekepoa ai a lautolu ke he tau tupua a Kanana; ti kelea ai ni e kelekele ke he tau toto.
39 Ti keleatia ai a lautolu he ha lautolu a tau mahani, ne feuaki a lautolu ke he ha lautolu a tau mena ne eke.
40 Ti kakā ai e ita a Iehova ke he hana motu, ne fakavihia foki e ia hana tau tagata.
41 Ti kua tuku atu ai a lautolu ke he tau lima he tau motu kehe; ne pule foki kia lautolu e faoa ne fakavihia a lautolu.
42 Kua favale foki kia lautolu e tau tagata ne fai fi kia lautolu; ne fakatokolalo foki a lautolu ki lalo he tau lima ha lautolu.
43 Lagaloga ne laveaki e ia a lautolu, ka e fakahogohogo e lautolu a ia ke he tau pulega ha lautolu; ne holia foki a lautolu ha ko e ha lautolu a tau mahani kelea.
44 Ka kua kitekite a ia ke he matematekelea ha lautolu, kua fanogonogo a ia ke he kalaga ha lautolu.
45 Ti manatu e ia ma lautolu hana maveheaga, mo e tokihala a ia ke lata mo e hana fakaalofa lahi.
46 Ne tuku foki e ia a lautolu kia ofania e lautolu oti kana kua fakatupatupa a lautolu.
47 Iehova na e, ha mautolu a Atua, kia fakamoui e koe a mautolu, mo e fakapotopoto e koe a mautolu mai he tau motu kehe, kia fakaheke ai ke he hāu a higoa tapu, kia fiafia foki ke he fakahekeaga kia koe.
48 Kia fakamonu kia Iehova, ko e Atua a Isaraela mai i tuai tigahau kia hoko ke he tukulagi; kia pehe atu foki e tau motu oti kana, Amene. Haleluia.