Tau Salamo 107:1-43
107 KIA fakaheke a mutolu kia Iehova, ha kua mitaki ni a ia, ha kua tukulagi hana fakaalofa.
2 Kia pihia atu a lautolu kua laveaki e Iehova, ko lautolu kua laveaki e ia mai he lima hana kua favale mai,
3 Mo e fakapotopoto a lautolu mai he tau motu, mai he fahi uta mo e fahi lalo, mai he fahi tokelau mo e tahi.
4 Ne o fano a lautolu ke he tutakale, ke he hala vao; nakai moua e lautolu ha māga ke nonofo ai.
5 Ne fia kai mo e fia inu a lautolu, kua nakai fahia ha lautolu a tau loto ki loto ia lautolu.
6 Ti kalaga ai a lautolu kia Iehova ke he matematekelea ha lautolu, ti laveaki e ia a lautolu mai he ha lautolu a tau mamahi.
7 Ne takitaki foki e ia a lautolu ke he puhala hako, kia o atu ai a lautolu ke he maga ke nonofo ai.
8 Kia fakaheke atu a lautolu kia Iehova ha ko e hana fakaalofa, mo e hana tau mana kua eke ke he fanau he tau tagata.
9 Ha kua fakamakona e ia e tagata fia inu, ko e tagata hoge foki kua makona ia ia ke he tau mena mitaki.
10 Ko lautolu kua nonofo ke he pouli mo e ata he mate, kua lili a lautolu ke he mamahi mo e lapatoa;
11 Ha kua totoko a lautolu ke he vagahau he Atua, mo e fakavihia e pule hana ne homo ue atu.
12 Ti pēhi ai e ia ha lautolu a tau loto ke he gahua mamafa; ne tauveli a lautolu, ka e nakai fai lagomatai.
13 Ti kalaga atu ai a lautolu kia Iehova ke he matematekelea ha lautolu; ti fakamoui ai e ia a lautolu mai he ha lautolu a tau mamahi.
14 Ne ta mai e ia a lautolu mai he pouli mo e ata he mate, kua motumotu foki e ia ha lautolu a tau liliaga.
15 Kia fakaheke atu a lautolu kia Iehova, ha ko e hana fakaalofa, mo e hana tau mana kua eke ke he fanau he tau tagata.
16 Ha kua lipilipi e ia e tau gutuhala apa kula, mo e hehele motu e tau fakamau lapatoa.
17 Ko e tau tagata goagoa ha ko e tau holifono ha lautolu, mo e ha lautolu a tau mahani hepehepe, kua fakamamahi ai e lautolu a lautolu;
18 Kua fakavihia e lautolu ha lautolu a tau mena kai oti kana; kua fakatata foki a lautolu ke he tau gutuhala he mate.
19 Ti kalaga atu ai a lautolu kia Iehova ke he matematekelea ha lautolu; ti fakamoui ai e ia a lautolu mai he ha lautolu a tau mamahi.
20 Ne fakafano e ia hana kupu, mo e fakamalolo e ia a lautolu, mo e laveaki a lautolu mai he tau malaia ha lautolu.
21 Kia fakaheke atu a lautolu kia Iehova ha ko e hana fakaalofa, mo e hana tau mana kua eke ke he fanau he tau tagata.
22 Kia ekepoa foki a lautolu ke he tau poa fakaaue kia tokutoku atu foki mo e olioli hana tau gahua.
23 Ko lautolu kua o hifo ke he tau foulua ke he tahi, mo e eke ha lautolu a tau feua ke he tutavaha lahi;
24 Ko lautolu ni kua kitia e tau gahua a Iehova, mo e hana tau mana kua eke ke he moana.
25 Ha kua vagahau a ia, ti to ai e matagi lahi, ti hake taha ai hana tau peau;
26 Kua hake a lautolu ke he lagi, kua hifo ni ki lalo, kua oti e manava ha lautolu he fakaatukehe;
27 Kua lifa fano mo e tauveli a lautolu tuga ne tagata konahia, kua fakahiku foki ha lautolu a loto matala oti kana.
28 Ti kalaga ai a lautolu kia Iehova ke he matematekelea ha lautolu; ti takitaki e ia a lautolu mai he ha lautolu a tau mamahi.
29 Kua liu e ia e afa ke he milino, kua maha ai e tau peau.
30 Ti fiafia ai a lautolu, ha kua milino tuai; ti takitaki e ia a lautolu ke he ava ne loto ki ai a lautolu.
31 Kia fakaheke a lautolu kia Iehova ha ko e hana fakaalofa, mo e hana tau mana kua eke ke he fanau he tau tagata.
32 Kia fakatokoluga e lautolu a ia ke he fakapotopotoaga he motu, mo e fakaheke e lautolu kia ia ke he toloaga he tau patu.
33 Kua liu e ia e tau vai lele ke eke mo tutakale, ko e tau vai puna foki ke eke mo fonua magomago;
34 Ko e fonua talumelie ke eke mo mena taluē, ha ko e mahani kelea ha lautolu kua nonofo ai.
35 Kua liu e ia e tutakale ke eke mo loloto vai, ko e fonua pakepake ke eke mo tua vai puna.
36 Ti fakanofo ai e ia e tau tagata mate hoge; kua taute ai foki e lautolu e maga ke nonofo ai;
37 Mo e to saito e lautolu ke he tau fonua, ti to foki e tau ulu vine, ti fua mai ai e tau fua loga.
38 Kua fakamonuina e ia a lautolu, kua fakatokologa lahi foki a lautolu; nakai fakagahoa foki e ia ha lautolu a tau manu.
39 Ne fakatokogahoa foki a lautolu mo e pehia, ha ko e favale, mo e mahani kelea, mo e fakaatukehe.
40 Ne vihiatia e ia e tau iki, mo e fakaheke e ia a lautolu ke he mena toka noa, nakai ha i ai ha puhala.
41 Ka e lagaaki e ia e tagata nofogati mai he matematekelea, ti fakatu e ia e tau magafaoa tuga ne fuifui mamoe.
42 To kitia ai he tau tagata tututonu mo e fiafia ai a lautolu; ka e ponotia e tau gutu oti he tau tagata mahani kelea.
43 Ko ia ne iloilo to taofi e ia e tau mena nai; mo e manamanatu foki e lautolu ke he tau mena fakaalofa a Iehova.