Tau Salamo 109:1-31
109 KO e Atua na e, ko koe kua fakaheke atu au ki ai, aua neke fakamate a koe.
2 Ha kua fakamaga mai kia au e gutu he tagata mahani kelea mo e gutu fakavai; kua fai kupu kia au ke he alelo pikopiko.
3 Kua agaagai a lautolu kia au mo e tau kupu vihiatia, kua tau teao foki a lautolu kia au.
4 Kua fai fi a lautolu kia au ke totogi aki haku a fakaalofa; ka ko au, kua liogi ni au.
5 Ne tamai e lautolu kia au e kelea ke totogi aki e mitaki, mo e fakavihia mai ke totogi aki e fakaalofa haku.
6 Kia kotofa e koe taha kua mahani kelea ke pule kia ia, mo e taha kua fai fi kia ia ke tu ke he tapa he hana lima matau.
7 Kia fakahala a ia ka fakafili a ia; kia eke foki mo hala hana liogi.
8 Kia fakagahoa hana tau aho; kia eke e taha hana feua.
9 Kia eke hana fanau ke nakai fai matua, ko e hana hoana foki kia takape a ia.
10 Kia hekepefano hana fanau, mo e kaiole, mo e kumi e tau mena kai ke he tau mena kua moumou ha lautolu.
11 Kia uta hana tau mena oti he tagata kua nakai taui hana tau mena; kia fofo foki he tagata kehe e tau mena ne gahua a ia ki ai.
12 Aua neke tumau e fakaalofa he taha tagata kia ia; aua foki neke totonu atu taha ke he hana fanau kua nakai fai matua.
13 Kia motuhia hana tau ohi; kia holoholo kehe ha lautolu a higoa ke he hau ka tupu mai.
14 Kia manatu e Iehova e tau mahani kelea he hana tau matua tane; aua neke tamate e hala he hana matua fifine;
15 Kia toka ai ki mua a Iehova fakaoti, kia tamate e ia ha lautolu a fakamanatuaga mai he lalolagi.
16 Ha kua nakai manatu e ia ke eke mena fakaalofa, ka e favale ni ke he tagata matematekelea mo e nofogati, kia kelipopo e ia a ia kua loto malipilipi.
17 Ne loto a ia ke he kaialu, ti kua hoko tuai ia kia ia; nakai fiafia a ia ke he fakamonuina ti kua vaha mamao tuai mo ia.
18 Ne fakatapulu e ia a ia ke he kaialu tuga ne hana tapulu, ti kua hoko tuai ki loto ia ia tuga ne vai, ti tuga e puke lolo ke he hana tau huimotua.
19 Kia eke kia ia tuga ne tapulu kua tapulu ai a ia, tuga foki e pipi kua pipi ai a ia ke he tau aho oti.
20 Ko e taui ia mai ia Iehova kia lautolu kua fai fi kia ua, mo lautolu kua vagahau kelea kia mate ai au.
21 Ka ko koe Iehova na e, haku a Iki, kia mahani totonu a koe kia au ha ko e hāu a higoa; ha kua mitaki hāu a fakaalofa, kia laveaki e koe au.
22 Ha ko au kua matematekelea mo e nofogati au, kua tuina haku a loto ki loto ia au.
23 Kua mole atu au tuga ne ata loa, kua havilia kehe au tuga ne hē akerise.
24 Kua matagataga haku tau tulihui he fakakanopogi, ti kua tino kelea tuai au.
25 Ko au foki kua eke au mo mena ke mā ai a lautolu, kua kitia e lautolu au mo e luelue ha lautolu a tau ulu.
26 Iehova na e, haku Atua, kia lagomatai mai a koe kia au, kia fakamoui e koe au ke lata mo e hāu a fakaalofa;
27 Kia iloa ai e lautolu, ko e hāu a lima ni hanai; ko koe Iehova na e, ne eke ni e koe.
28 To kaialu mai a lautolu, ka ko koe, to fakamonuina mai e koe; kua tutu mai a lautolu, ka kia fakama a lautolu, ka e fiafia ni hāu a fekafekau.
29 Kia fakatapulu a lautolu kua fai fi kia au ke he mā; kia ufiufi a lautolu ke he ha lautolu a mā, tuga ne tapulu lahi.
30 To fakaaue fakalahi au kia Iehova ke he haku a gutu, to fakaheke atu e au kia ia ki mua he tokologa.
31 Ha ko e mena tu a ia ke he lima matau he tagata matematekelea, kia fakamoui a ia mai ia lautolu kua eke ke fakahala a ia ke mate.